39
Pakaijin Achouna Aseijom
1 “Gamkel ho khun itih phat le nou anei jiuvem ti nahet em?
Sajuh ho gamlah a aso u khu namu khah tah em?
2 Lha ijat gai uvem ti nahet khah em?
Itih phat le soh diu ham ti nahet em?
3 Anou neina dingin tolla aboh mat jiuvin
chule ason chu ahing doh jiuve.
4 Anou ho chu tollhanga akivah khang jiuvin,
chuti chun achennau adalhah teng ahung kinungle ji tapouve.
5 “Gamlah sangan khu kon chamlhatna apeh a?
Chule akihenna khao kon alhap peh ham?
6 Gamthip lah hi amaho umna dinga kapeh ahin;
achenna diuvin hamhing kelouna gam kepei.
7 Khopi sung husa atheinom pon
chuleh ahohsal diu kangtalai tol jong aumpoi.
8 Molsang lah chu akivahnau mun ahin,
hamhing don thah jouse ahol lelei.
9 “Gamlah bongchal chu vahngoi din anoppeh dem?
Na gancha an koina huong sunga chun jan khat beh aumna dem?
10 Gam bong chu na loukhoina langkon’a chu nakhum theijem?
Nalou na khoipeh ding hinam?
11 Athahatna chu eipente, ti na tahsan em?
Na dalhah a chule na-na natoh peh ding chu na tahsan em?
12 Na chang inlanga po dinga na nganse ding ham?
Chuleh na changphol a konna chang nahin pohpeh ding hinam?
13 “Vangongchai jin alha ahin jap jin,
ahinlah nachakang toh tekah thei ahipoi.
14 Vangongchai jin atui leiset chunga atha jin,
leivui khun akahlum dinga akoiji ahi.
15 Thilkhat touvin akengin chonkeh inte
ahilou le gamsa khat touvin sumathah inte tijong agelpoi.
16 Anoute chunga jong a engse lheh jengin,
ama a hilou bang bangin athi diu jong khoh asapoi.
17 Ajeh chu Pathen'in ama a konna chihna alahdoh peh ahi.
Aman thil hetkhen theina apehlou ahi.
18 Ahinlah itih phat hijongleh lhai dinga ahung chopdoh phat-phat uleh,
sakol lhaihat pen-pen jong achunga toupa toh adalha tha jitai.
19 “Sakol thahat khu nangin napeh hija
ahilou le angonga amul bahkai khu nangin nakesah ham?
20 Khaokhopi kichop thei banga akichop theina khu nangin napeh ham?
Anah khon gin khu tijat jat aum jenge!
21 Galsat dinga ahung kipatdoh tengleh atin in leiset akhot in
athahat in akipah jin ahi.
22 Chemjam masanga ajampoi.
Kichat kiti chu anuisat in chuleh kichatna aneipoi.
23 Thalchang amalam ngan aleng jeng jungin,
chuleh tengcha leh tenglung aval lah-lah jenge.
24 Lunghang tah in akengtin in tol akhot jal lah-lah in
chule kelngoi ki ahung kimut ging phat in galmun manon alhaikit jitai.
25 Saki kimut gin chun anah akhong ging e.
Gamla tah a kon'in gal gimnam ajai.
Gal kisat gin thong leh gal lamkaipa thupeh ngah in akinuh-nuh jenge.
26 “Mu khu nangin na chihna a nahil'a vanlam'a sangtah a leng le-le a
chule alhaving teni khu lhanglam nga a ajahji ham?
27 Muvanlai sangtah a alen touva
chunglang peh a buh asah khu nangin napeh ham?
28 Kolsong chunga achengin,
gamla tah songkuo hoa chenna in akisem'e.
29 Hiche a kon hin aneh ding sahing akihol in,
mitchim keuvin avelhi jingin ahi.
30 Anouten thisan achop-chop uve.
Gancha thikam umna hiche mun'a chu ama namu ding ahi.”