40
1 Hichun Pakaijin Job kom'a aseijin,
2 “Hatchungnung pa chu na kinilpi nom nah laijem?
Pathen thutan dihlouna podohpa nahin, ahileh donbutna ding nanei nahlai em?”
Job In Pakai Adonbutna
3 Hichun Job in Pakai chu adonbut in,
4 “Keima ima hilou kahi—adonbutna ding chu iti kaholdoh jou ding ham?
Kakhut in kamuh kisip ing katin.
5 Thu tamtah kaseidoh ahitai.
Keiman seibe ding kanei tapoi.”
Pakaijin Job Achoukit
6 Hiti chun Pakaijin chimpei lah a kon'in Job ahin donbut in:
7 “Pasal phatah bangin nakong kigah in,
keiman nangma doh ding thudoh themkhat kaneijin,
chuleh nangin hiche ho chu na donbut ding ahi.
8 “Ka thutan dihna hi tahsan louva nakoija
chule nangma dihna photchetna dinga kei themmo neichan joh ding ham?
9 Pathen banga thahat nahim?
Pathen ogin banga nangin van nagin sah thei ding ham?
10 Aphai na loupina leh na gunche nan kivon inlang,
ja naumna leh aminthan nan kivon temin.
11 Na lunghanna ngoh ding hol in.
Mi kiletsah te ho jouse chunga chuhen.
12 Mi kiletsah te chu namit hei chun jachat sah inlang;
mi giloute chu adin nauva chun chot phan.
13 Leivui lah a chun vuijin.
Amaho chu mithigam songkul'a khun khum den tan.
14 Chutia chu kei jengin jong ka pachat ding nahi,
ijeh inem itile naban gol thahat chun na huhdoh ahitai.
15 “Behemoth khu vetemin,
nang kasem banga kasem ahin,
bongchal bangin hampa ane e.
16 Akengphang athahatna le
a oipoh a aphe ho khu ven.
17 Amei jong khu Cedar thing bangin atah e.
Akhel teni a aphe ho khu detchet a kipheh khom ahi.
18 Agu ho jong sum-eng long ahi.
Atibah ho jong thihjol ahi.
19 Pathen khutsem ho lah a vetkah theipen ahin,
chuleh asempa bouvin agihsal thei ahi.
20 Gam'a gamsa jouse lhat lena mun hiche molsang ho hin,
amaho dinga anneh pha pen-pen chu apeh nom u ahi.
21 Thambal pahcha phung noija chun akol jin,
pengphung boh lah a akisel jin ahi.
22 Vadung pang thingnem ho lah a
pahcha phungho chu amadin lim in apange.
23 Vadung twisoh in ama asunoh phah pon,
Jordan vadung soh hen lang chup jongleh alungkham deh poi.
24 Koima chan amandoh joupoi
ahilou le anah avu a thihkol abupeh a chuleh akaimang theilou ahi.