41
Pakaijin Achoujom
1 “Ngakoija Leviathan namat thei ding ham
ahiloule aha a khaokol nabu peh thei ding ham?
2 Anahhom sunga khao nathil lut theija,
ahilou le akhalhang thihhem a nasut vong thei ding ham?
3 Na khoto ding ngehna a hung taova
ahilou le na lainatpi dinga hung tao tun-tun nam?
4 Ahinkho a nasoh a panga,
na natong dinga na noppeh ding hinam?
5 Nangin hiche khu vacha banga na ngailut bol thei hiya,
ahilou le na chapang neonu kichepna dinga napeh thei ding ham?
6 Kivei mihon athil joh nau mun ho a joh dinga
ahung kichoh diu hinam?
7 Avun khu tengcha a nasut khah theija
ahilou le aluchang ngathal a nakap khah thei ding ham?
8 Achunga nakhut ngam inlang hile chun,
kidounan ahin jui ding khu geldoh in nate.
Avel a nabol patep kit louhel ding ahitai.
9 Ahipoi, hiche mat ding got chu phatchomna bei ahi.
Sadel hatpa thiltup jong chu kisuhnem peh ding ahi.
10 Chuleh a itih a koima chan asuh nohphah ngamlou ahin,
koiham kamasanga ding ngam ding chu?
11 Ka ngaichat pettah a kalepeh kit ding thil eipe chu koi ham?
Vannoija thil um jouse hi keija ahi.
12 “Leviathan tibah ho hoidan chuleh athahat loupi dan
chule agongso hoidan ho kasei nom'e.
13 Avun khu kon alahdoh peh theija,
chule athoa um agalvon khu kon amulet pai thei ding ham?
14 Akhalhang khu kon akal keh a ahondoh ding ham?
Ajeh chu aha khu tijat-jat um behseh jeng ahi.
15 Alip ho chu pho banga agol-gol a detchet a mohor kinam banga
thakhat a kinam detchet ahi.
16 Kimatchet a umkhom ahijeh chun
akah a hui themcha jong alut theipoi.
17 Alip khat chu aban'a alip chunga beh detchet ahi.
Khat leh khat kikam toa kimulet pai theilou ahi.
18 “Anah akhon tengleh avah lap-lap jenge!
Amitchang teni jong jingkah nichangsat pettoh abang'e.
19 Akamsunga kon'in meisi apah lah-lah jin;
meikou ahung vahdoh ji e.
20 Mei chunga twibel kisonga twihu pot bangin
anahhom'a kon'in meikhu ahung kitung dohji e.
21 Akam sunga konna meikou alendohji jeh chun,
ahai husa chun meihol ahal kou jeng jin ahi.
22 Leviathan ngongchang thahatna chun
achena jousea kichat tijatna asosah e.
23 Aphe ho chu atah in chuleh adetchet in
akimulet theipoi.
24 Alungchang chu song bangin atah in,
sumhei song bangin atah e.
25 Ahung kithodoh tengleh thahat chungnung ho akicha jiuvin,
kichat tijatnan amanchah kheh jin ahi.
26 Chemjam, tengcha, thalchang ahilou le
tengcha neoho khat chan asutang joupoi.
27 Hiche thilsem hin thih jong changpol abahsah in,
chuleh sum-eng jong thing motsa tobang bep ahi.
28 Thal changin adeljam joupoi.
Song aboma kisep jong chu hampan ajepkhah abang bep e.
29 Akivoh ho jong chu ham donthah toh abahsah in,
chule tengcha neo euvel vul hung leng jong chu anuisat bep e.
30 A oipoh chu haihal hemtah tobang alip in atom e.
Ama chena nung chu loukainang pan lou akainangna nung abahsahji e.
31 “Leviathan chun twi lah a aum tengleh twi chu belphul abahsah ji e.
Twikhanglen to jong thao kiloijol abahsah jin ahi.
32 Twi lah a ache tengleh twi kinong ho chu aval lah-lah jin,
gah vet dingin twikhanglen chu akangin akilang ji e.
33 Leiset chunga ama kibahpi aumpon,
ama tobanga kichat neilou thilsem ganhing dang aumpoi.
34 Thilsem ganhing jouse lah a akiletsah pen ahi.
Ama hi ganhing jouse leng ahi.”