42
Job In Pakai Adonbutna
1 Chutah chun Job in Pakai chu adonbut tai:
2 “Thil ijakai bolthei nahi kahen,
chule koiman nasuh tang theilou chu keiman kahei.
3 'Thil hetkhen theina beija kathil hetkhen theina dongpa chu koiham? tin na dong'e.
Hiche pa chu Kei kahi—chule keiman kahet khah louhel thu,
keija dinga kidang behseh aumpoi.
4 Ngaijin keiman na seipeh inge!
Keiman nangma thu kadoh a,
chuleh nangin nei donbut ding ahi.
5 Masanga chu nangma hi athu a bou kana jah tho ahin,
ahinlah tun vang kamit tah in kamutai.
6 Kana thusei jouse kageldoh sohkei tai,
chuleh keima kakisih tai ti vetsahnan leivui leh vutvam lah a hin katouve.”
Thu khumkhana: Pakaijin Job Phatthei Aboh
7 Pakaijin thu hijatpi hi Job kom'a asei nungin Teman mipa Eliphaz kom'ah aseitai: “Nangma leh nagol teni chunga kalung ahang'e. Kasohpa Job sei bangin ka chung chang thu adihchet in nang hon nasei pouve.
8 Hijeh chun bongchal sagi leh kelngoichal sagi ma kikai unlang kasohpa Job kom'a cheuvin, chuleh nangma ho a dingin kilhaina govam thilto gabol un. Kasoh pan nangho dingin na taopeh untin chuleh keiman taona chu nangho min'a kasan peh a, natoh dungjui uva kalethuh tah louding ahi. Ijeh inem itile nang hon kasohpa Job bangin ka chung chang thu adihchet in nasei pouve,” ati.
9 Hiti chun Teman mipa Eliphaz, Shuh mipa Bildad chule Naamat mi Zophar chun Pakai thupeh bangin agabol un chuleh Pakaijin Job taona asanpeh tai.
10 Job chun aloi agolte dinga ataopeh phat in Pakaijin vangphat nan akile sah in, tahbeh in Pakaijin masanga anei jat sanga ajatni a tamjon apetai.
11 Chutah chun asopi pasal ho leh numeiho chuleh masanga akihetpi aloi agolte ahungun a in'ah an anehkhompi uvin ahi. Pakaijin ama douna a achung changa thilse ana lhunsah ho jouse jal chun amapa chu alhem un chuleh alhamon un ahi. Chuleh amaho khat cheh chun amapa din thilpeh sum le sana khutjem ahin choipeh uve.
12 Hijeh chun Pakaijin Job hinkho anukhah lang chu akipat tillai sangin phatthei aha boh jon, hijeh chun tun kelngoi 14,000 aneijin, sangong sao 6,000 aneijin, bongchal kop 1,000 aneijin, chule sanganpi 1,000 aneitai.
13 Aman jong Job chu chapa sagi apeh ben, chule numei jong thum jen apeh bei.
14 Amapan achanu masapen chu Jemimah asah in, anina Keziah asah in, chule athumna Keren-happuch asah e.
15 Gamsung jouse a numei lah a Job chanu te banga mel-hoi dang aumpoi. Chuleh apauvin amaho chu asopi pasal ho toh alung lhaina bang tah in asem khomin ahi.
16 Hicheng nung hin Job chu kum140 ahingin, achate leh atute khangli chan geijin amun ahi.
17 Chutah chun Job chu hinkho bulhingset in ahingin, tehse mong-monga hingin atehthi tai.