4
Eliphaz In Job Adonbutna Masa
1 Teman mi Eliphaz chun Job chu adonbut in:
2 Thu khat hinsei ingting thohhat in na ngai thei dem?
Koiham thusei louva eikoi ding chu?
3 Phat chesa ho ah nangin mi tamtah natil khoujin;
alhasam ho na-na hatdohsah jin ahi.
4 Alhu ding ho jong nangma thusei chun atilkhou jin ahi;
akhup kithingho jong na tilkhou ji'e.
5 Ahinlah tua genthei nan nahin phah phat in, lungthim nalhaso tai.
Hiche hahsat nan nahin phah phat in kichat tijatnan nanei tai.
6 Na Pathen ginna chun tahsan detna napeh hilou ham?
Na chonphatna chun kinepna napeh hilou ham?
7 Khongaijin lang chule ngaito temin! Themmona bei mi hi thi ngaiji ham?
Itih a mi lungthengsel ho kisumang ji-em?
8 Kei thil hetna in vang hahsatna muchi tua kitu ho leh thilse bol hon
thakhatna aga akilo cheh diu ahi.
9 Pathen hu haikhum chun asemgo jiuve.
Alunghanna husa ginna chu mang del jiu ahi.
10 Keipi akitumin chule sangah in mi angih in,
ahin keipi thahat tah hajouse kisubong ding ahi.
11 Sahing neh ding lhahsam jeh in keipi bahkai hang leiloijin kel athohjin,
chule keipi bahkai noute jong kithecheh diu ahi.
12 “Hiche thutah hi guhthim chan
kana benga mao hiuheuvin eikisei peh e.
13 Mihem a imut lhuh pettah jan laiya imut sunoh phah in,
hiche gaova mang thilmuna hi kaheng'a ahunge.
14 Kichatnan eiphan
chule kagu kachang ho akithing'e.
15 Lhagaovin kamai ahin jap in,
chule akichaijin katimul ahung kithou setsot e.
16 Thilha chu adingin, ahinla kenla agongso kamuthei poi.
Kamit teni masanga agongso aum den e.
Phat thip laitah chun hitia kisei o khat kajai.
17 'Thithei mihem hi mona beija Pathen anga um theijem?
Asempa masanga athenga um thei ding hinam?'
18 “Pathen'in avantil ho jeng jong atahsan louva
chule athupole ho angol nauva apho jia ahile,
19 nikhat a kisem mihem hi ichan gei tahsanna anei lhom tadem!
Amaho chu leivuija kisem, bailam tah a suhchip thei mitthah tobangbep ahi.
20 Amaho chu jingkah langleh ahing jiuvin ahinlah nilhah langleh athi jiuvin,
amelchihna beijin athiji tauve.
21 Aponbuh henna akibo lhuh tengleh,
aponbuh u alhujin chule hetna lhasam in athidenji tauve.