5
Eliphaz In Adonbutjom
1 “Na kithopi ding kou temin, mikhat beh in nahin donbut na dem?
Vantil ho koipen in nahin kithopi ding ham?
2 Tahbeh in lunghanna hin mingol asumang jin,
chule thangsetna in chihna neilou ho athat ji e.
3 Keiman mingol ho chomkhat kahsung alolhin nau kamui.
Ahinla vangset na chun hetman louvin alhunkhum jitai.
4 Achateu jeng jong amaho panpi dingin agamlan;
ahuhdoh diu umlouvin thutanna mun'a amehgoi jiuve.
5 Achang chu lingleh khauva akium jeng vang'in,
agilkel ten avallhum peh un ahi.
Agou chu adangchah ten hai hot-hot in adel uve.
6 Thilse hi leivui lah a konna hung putdoh ahipoi,
chule hahsatna hi leisetna konna hung dondoh ahipoi.
7 Meilah a konna meisi chunglanga lengtou dinga gotsa aum banga
mihem tehi ahahsa ding monga penga ahi.
8 “Kei hi nang chu hileng, Pathen kom'a cheng ting
chule kachung chang thu ama kom'a kase lhah ding ahi.
9 Aman thil loupi tah hetdoh jou hoi hilou aboldoh ahi.
Ajat sim joulou thil kidang aboldoh e.
10 Aman leiset chunga go ajuh sah jin
chule loulaija jong twi alonsah sohkeije.
11 Aman mivaichate khantouna apen
chule genthei hesoh thoh te ahuhdoh ji e.
12 Athilgon'u asuh nohphah peh in
hijeh chun akhut uva atoh jouseu amolso joulou diu ahi.
13 Miching ho chu aki chihsah nauva amang jin
hijeh chun aduha thuh nauva athilgon'u asuhbei pehji tai.
14 Ama hon sun laijin muthim atoh khauvin,
sunkim laijin amaho chu janlai bangin akimaile leuve.
15 Mikam hatte a kon'in mi vaichate ahuhdoh jin
chule mi thahat ten atuhchah kheh hou jong amaho a kon'in ahuhdoh ji e.
16 Chule hiche ho a chun achaina leh mivaichan kinepna aneijin,
chule mihahem te kam jong ahuhbit jin ahi.
17 “Ahinla Pathen'in asuhdih ho kipana khu ngaito temin!
Na chonset tengleh Hatchungung pan nahilna khu don louvin koi hih in.
18 Aman amavo jin, aman atompehji.
Aman ajep jin, ahinla akhut in asudam kitjin ahi.
19 Vangsetna gup a kon'in nahuhdoh intin;
asagi veina teng jongleh, thilse a kon'in nahoi doh inte.
20 Kellhah lai jongleh thina a kon'in nahuhdoh intin,
gallai jongleh chemjam a kon'in na huhdoh inte.
21 Misuminse nom te a kon'in hung hoidoh in natin
chule manthahna ahung lhun teng kicha tapon nate.
22 Manthahna le kel alhah teng nangin nanuisat ding,
gamlah a gamsa jouse nagin louding ahitai.
23 Nangma gam lah a songho toh lungmong tah a naum khoma,
chule gamlah a gamsa ho toh lungmonga nalhat khom diu ahitai.
24 Na chenna na in abitne ti nakihet e.
Nanei nagou ho nagavet teng, imacha akiholmo umlou ding ahi.
25 Nangin chate tamtah neijin natin;
nason na chilhah te hampa banga hung tam diu ahi!
26 Nateh teng lhankhuh hin jonin natin,
aphatcha changphol'a changpal kichom khom nahung bah ding ahi!
27 Keihon hinkho hi kakhol uvin, chule hiche hi dih din kamu doh uve.
Kahilna hi ngaijin, chule nangma tah a dingin mangchan.”