6
Job Thusei Nina: Eliphaz Adonbutna
1 Hichun Job apaodoh kit in:
2 “Ka gentheina ho hi tedoh thei hihen lang
ka natna hi kileptoh thei henlang hileh,
3 twikhanglen'a neldi umjat sangin gih jonte.
Hiche ho jeh a chu khongai man louhella kaseidoh ji ahi.
4 Hatchungungpa thal changin eikap lhutan ahi.
Athal gu chun kalhagao asukha tai.
Pathen’a kon tijatna ho chu keidou din ahung kigoltoh tauve.
5 Ka lunglhai louna thu seitheina tha kanei hilou ham?
Gamlah sangan chun neh ding hampa akimu jilou teng penglouva umjia,
chule bongchal ten jong neh ding aneilou teng buji hilou ham?
6 Chiso louna anneh chunga chu mihon alung lhailou nau aseiji louvu ham?
A-alna bei ahtui kang khu kon adu ding ham?
7 Kavet jiteng ka anduna abei jitai;
neh dinga kangaitona jouse akikhah tansoh jitai.
8 “Oh, keiman kadei khat kaki thum thei ding hihen,
Pathen chun kadei chu eipeh ding ahi.
9 Aman eisuh chip jeng ding kadeije.
Akhut ahin lhandoh a chule eitha jeng ding kadeije.
10 Natgim genthei thoh a kimusetna ho a konna
hiche beh a hi lungmonna kanei ding,
Athengpa thusei nahsahmon kabol khapoi.
11 Ahinlah athoh jouna ding thahat kaneipoi.
Keiman hinpi ding imacha kaneipoi.
12 Song thahatna chu nei kahim?
Katahsa hi sum-eng a kisem ham?
13 Ahipoi, keima ahin lolhinna phat gomkom neilou,
kithopi beihel kahi.
14 “Agol apai lhasam khat dinga lungsetna nei mi hi ding,
ahinla nangin Hatchungungpa kicha louvin themmo neichanne.
15 Kasopi teho, aphat-phat cha long ji vadung neocha banga
tahsan theilou khaltwi vadung neocha akam dima long tobang nahiu na phochenun
16 buhbang lhang le buhbang twi kikhol khom chu.
17 Kholum phat ahung lhun tengleh twi chu amangji.
Vadung neocha chu asat jeh chun amang jitai.
18 Kholjin miho chu holdoh kitna dingin akihei doh jiuvin,
ahin donding aum loujeh chun, athiji tauve.
19 Tema a hung kholjin miho chun twi ahol jiuvin,
Sheba a hung kholjin miho chun nei ding akinem uve.
20 Akinep nau chu asim jiuvin ahinlah alunglhaiji pouve.
Ahung lhun tengleh akinep nau akisudongji tauve.
21 Nanghon jong kithopina neipe pouve.
Ka vangsetna namu uvin chule nakicha uve.
22 Ahinlah ipi jeh ham? Keiman thilpeh khattou kathum khah em?
Keiman nanei ikhat tou kei ding tuma kathum khah em?
23 Melma pa a kon'in nei huhdoh un tia kasei khah a,
ahilouleh lungsetna neilou miho a kon'in nei huhdoh un tia kaseikhah em?
24 Neihillin, chutileh thipbeh in um inge.
Ipi kabol khel um'em nei vetsah in.
25 Lung thengsel’a thu kiseidoh chu na thei ahin,
Ahin neidem nau ijat aphah hitam?
26 Kalung natna ka kana ija naselou tengu leh
na thusei hou hin mi jouvinte natiuvem?
27 Naochaga jeng jong soh a nasol uva
ahilouleh nagol napai ujong na johdoh diu ahi.
28 Neihin vetan!
Na maichang tah a kajou ding ham?
29 Ka chonsetna hi dih nante tin gelda tauvin,
ijeh inem itile keiman bolkhel kaneipoi.
30 Thujou seidinga nei gel uvem?
Apha le ase hekhen theilou ding kahim?