JOSHUA
LEKHABU
Joshua Lekhabu Sung Thu Umdan
Na thilgon losamna umkha em? Israel te ana losam uve… Tahsan lhahsamna le thungai louna jeh in kum somthum le get jen athilgon'u lolhing jou louvin ana tang'un ahi. Hiche jou chun phat kilemchang khat ahung um'in, hichu alhaso tapouve! Thungai toh thon ache tauvin ahileh gal mite ajouvun phat sottah ana nga jing’u alungtup uchu molson aum tan ahi.
Joshua lekhabu hi hopnin akihom khen'in, amasapa hin hansanna, tahsan, thil kidang tah-tah chule gal mite jona thudol aseijin ahi. Lungtup ahilouleh thilgon khat molso kiti hi boltheina jeh ahipon, let le neo jong ahipon chule nei le gou jeh jong ahipoi. Amavang Pathen tahsan le Ama thungaija bou kingam ahi!
Joshua lekhabu hop nina chan hin Pathen tohgon akijom peh in—itobang gim le hesoh dinmun hijongleh Pathen'in amite adalha ngaipon, ama-ama nam sunga chamna le thudih a akhosahna diuvin gam le go kicheh tah apen ahi. Hiche lekhabu nasim’a kon a hi Pathen'in nam som le ni ho chunga thilgon kicheh tah anei na simdoh ding kitilkhouna a nanei thei ding ahi. Hiche bang chun Pathen'in mimal cheh chunga thilgon aneiye, ti akicheh in ahi.
Lekhabu Jihpa Chule Ajih Kum
Lekhabu hi Johsua in anajih ahi. Chule achaina lam Joshua thi-opna thudol hi Aaron chapa Eleazar thempu in ajih ahi. Hichu 1390 BC vel’a kijih ahi.
1
Pathen'in Joshua Atilkhou
1 Pakai lhacha Mose athi phatnin, Nun chapa Mose lhacha a pang Joshua kom'a chun Pakaijin thu ahin seijin,
2 “Ka lhacha Mose athitai. Hijeh chun nangma kipat inlang hiche Jordan hi galkaijin, nang le hiche mipi ho hin Keiman Israel chate kapehna gam hi jonlut tauvin.
3 Mose kom'a kana teppehna bang-banga chu hoilai mun hijongleh na kengphang’un achot phahna muntin chu nangho kapeh ding nahiuve.
4 Gamthip gam le Lebanon gam'a vadunglen chan gei, Eupharates vadung, Hit mite gam pumpi chuleh nisa lhumna lang twikhanglen chan gei nagam’u hi ding ahi.
5 Na hinkho lhumkei uva na masang uva koimacha ding joulou ding, Mose kana dinpi banga nangho jong kadinpi jing diu, ka dalhah louhel diu chuleh kanungsun louhel ding nahiuve.
6 Hat inlang hangin, hiche mite hi peh dinga apu apateu kana teppeh gam chu agoulo diuva na hoppeh ding ahi.
7 Hat inlang hang pou-pouvin, Ka lhacha Mose kana peh danthu jouse nanit jouna dingin, hichea kon hin jetlang hihen veilang hijongleh kiheimang hihbeh in, chutileh na chena channa na khantou thei ding ahi.
8 Hiche danthubu hi nakam'a kon mangthah louhel ding, amavang asun ajanna nagel joh ding, akijih dungjuiya hi nachon jing diu ahi. Chitile bou na khantou ding chuleh na lolhin tei ding'u ahi.
9 Keiman thupeh kahinpeh louva nabol ham? Hat inlang hangin, kicha hihbeh in, tijatna jong neihih in ajeh chu Pakai na Pathen'in na chena chan uva na lhonpi jing dingu ahi,” ati.
Joshua’n Israel te Atohdiu Aseipeh
10 Chujou chun, Joshua’n mipi lamkaiho chu thu apen hitin aseije,
11 “Ponbuh sunga khun cheuvin lang mipi ho khu aneh diu akigot toh dingun gaseipeh un, ajeh chu nithum sunga hi Jordan luipi khu na galkai uva Pakai na Pathen'in napeh u gam khu galo tauvin.”
12 Chuleh Reuben phung leh Gad phung chuleh Mannasseh phung akehkhat ho kom'a chun Joshua’n hitin aseije,
13 “Pakai lhacha Mose’n nakom uva asei chu sumil hih un, 'Pakai na Pathen uvin na kicholdo sah tauvin, chuleh hiche gam hi napeh u ahitai.'
14 Najiteu le na chateu, chuleh na gancha teu chu Mose’n napeh nau hiche Jordan solam gamkaiyah hin umsah un, ahinlah nalah uva gal-hat ho leh mihangsan chengse chun gal manchah akipat uva asopihou masanga hi gal lamkaija pang diu,
15 Pakaijin nangho gam napeh bang uva amaho jong alodiu gam apeh kahseuva nakithopi diu ahi. Chujou tengleh nahung kileuva Pakai lhacha Mose’n napehnau Jordan solam nagam uva nachen diu ahi.
16 Hiti chun ama hon Joshua chu adonbut un, “Ipi hileh nangin nei thupeh jouseu chu kabol diu, chuleh nei sol-sol nauva chu kache jeng diu ahi atiuve”.
17 “Keihon Mose thu kana ngai bang- bang uva chu imalam jousea nangma thu jong kangai diu ahi. Pakai na Pathen chun Mose ana umpi bang bangin nang jong naumpi jinghen,” atiuve.
18 “Koi hileh nangma thupeh jouse chu nit louva aum'a, nahin dou uva aum pou-pou leh thadoh jeng ding ahi. Hat inlang hangpou pouvin!”