2
Rahab In Gam Velhi a Cheho Ahuhdoh
1 Joshua’n Shittim’a kon'in aguh’a gam velhi dingin mini ana soldoh in hiti hin ana vailhah in ahi. Chelhon inlang Jericho geijin agam chu gakholpeh lhon'in ati. Hiti chun amani ache lhon'in Rahab notinu in'a agalhung lhon'in hichea chun aga geh lhon tan ahi.
2 Hiche chu Jericho lengpa kom agalhut tauvin, “Ven, hiche gam kholtoh dingin Israel mi phabep tujanin ahung uve,” aga tiuvin ahi.
3 Hichun Jericho lengpan Rahab kom'a chun mi asol'in hiti hin aga seisah e: “Hiche gamsung velhi dinga hungho na inna hunglut ho chu hin puidoh in” atin ahi.
4 Rahab chun mi teni chu ana sel ahinai, ahinla aman ana donbut in, “Amani chu ahung lhonnai ahin hoiya konna hung lhon ham ti keiman kahepoi.
5 Kho ahung jinkon kelkot kikha ding koncha khun apotdoh lhontai, hoilangpen ajot lhon ham keiman kahepoi, delloi leuchun naphah diu ahi,” ati.
6 Ahinlah amanun amani chu indan chunglanga apui touvin patkung lom inchunga ana phou lah achun asellin ahi.
7 Hiche jou chun lengpa sepai ten Jordan panmun lampi geijin aga nungdel’un ahi. Anungdel ho chu apotdoh jou jouvun Jericho khopi kelkot chu akhah tauvin ahi.
8 Gam velhi teni jan alup masang lhon'in, Rahab inchunga amani chu kihoulimpi dingin akaltouvin,
9 ajah lhonnah hitin aseije, “Pakaijin hiche gam hi nangho napeh u ahitai ti keiman kahei, nangho ginnan eilodim tauvin, hiche gam mite hi nangho kichatna a tijagam kahi tauve.
10 Ajeh chu Egypt gam'a konna nahung potdoh u chun Pakaijin nangho dingin Twipi San akansah in, chuleh Jordan luigal langa um Amor leng teni Sihon le Og na suhmanghel'u jong chu kana jauvin ahi.
11 Hiche thu hi kajah jeh un kalungu hi alhalhop jengin, nangho kimaitopi ding hi koima angapcha um talou ahi. Ajeh chu Pakai na Pathen uhi thaneitah, chunga van le noiya lei Pathen ahi.
12 Hijeh chun, keiman nangni kakithopi lhon bang’a hi nangnin jong kei le ka insung mite hi khotona nei neilhon ding hinam Pakai minin kihahsel lhon’in lang,
13 hiche Jericho khopi hi nalah tengu leh, kapa le kanu, kasopi pasal ho le kasopi numeiho, ka insung mite jouse le keima nei hinghoi diu hinam amelchihna khat neipe lhon'in ati.
14 Amanin adonbut lhon'in, nangin nei seidoh lhonlou pouleh na insungu hoidohna dingin keini hinkho hi kakitepna lhon ahi jeng'e. Pakaijin hiche gam hi eipeh tengu leh kakitepna lhon dungjuiya khotona kahin nei diu ahi ati lhon'e.
15 Hichejou chun, Rahab in jong, amani chu khao khat in bangkot a kon chun agah khailhan ahi. Ajeh chu Rahab in chu hiche khopi kulpi pal'a kingam ahi.
16 Amanun ajah lhonnah, “Molchung langa kaltou lhon'in, ajole minungdel ho chun nahin tohkha get unte, hiche achun nithum hung um lhon'in minungdel ho chu ahung kile kahsen kisel lhon'in, chujou tengleh nachena nom lhonnah chelhon tan,” ati.
17 Apotdoh masang lhon'in, amanin amanu kom'a chun, “Nanghon na kiseipeh u dungjuiya hi nahung chon uleh keiho jong kakitep nau banga hi kahin toh diu ahi atilhon'e
18 Keiho hi hiche gam'a hi kahung tengu leh nangin hiche khaosan hi keini nei khailhah lhonna hiche bangkot a konna hi nana khailhah ding ahi. Chujou teng, na insung mite jouse, napa, nang, nasopiho jouse le na insung mite jouse na insung uva hi na-na um diu ahi.
19 Ijemtia napotdoh uva lamlen dunga na-na chekhah uva nathi khah uva ahileh keiho thepmo hilou ding ahi. Amavang hiche insunga hi naum uva khat touvin na suhkhah uleh hitobanga thina nato uleh keiho mopohna hi ding ahi.
20 Ahinlah nang hon nei joulhep uva ahivang leh hiche kihahselna hi panna bei hi ding ahi,” atipeh lhon'e.
21 Amanun “Nasei lhon chu kapom'e,” ati. Hiti chun amani chu asoldoh in, khaosan chu bangkot achun akhai tan ahi.
22 Gam velhi teni chu thinglhang gam langah akaltou lhon'in nithum aga chaam lhon'in ahi. Amani nungdel ho chun lamlen lang chu muntin aga phetleng jengun ahinlah ajona in lolhing louvin ahung kile tauvin ahi.
23 Hichun gam velhi teni chu thinglhang gam'a kon'in ahung kumsuh lhon'in Jordan vadung ahin pal galkai lhon'in Joshua kom'a chun thilsoh jouse chu alhut lhon tan ahi.
24 “Pakaijin gam jouse hi eipe tauve, ajeh chu agam mite ho jouse khu eiho kichatnan atija gam tauve,” ati lhon'e.