3
Israel te Jordan Agalkai U
1 Joshua chu Israel te jouse toh jingpitah in Shittim ahin dalhauvin Jordan vadung pang chu ahung lhungun, galkaipai louvin hilai mun achun ngahmun akisem tauvin ahi.
2 Hiti chun nithum jouvin Israel lamkaiho chu ngahmun achun acheuvin,
3 mipiho chu thupeh aganeijun: “Nanghon Pakai na Pathen'u kitepna thingkong khu Levi thempu hon ahinput u namu tengu leh naum nau mun cheh uva kon'in kipat unlang anungu juiyun.
4 Nangho hiche lampia hi na-na chekhah lou jeh un ama hon napui diu ahi. Nangho le amaho kikah chu tong sangni hi ding hiche kalval'a hi na chenai louhel diu ahi,” atiuve.
5 Hichun Joshua’n mipi ho kom'a chun “Nangho le nangho kisuthengun, ajeh chu jing nikho leh Pakaijin nangho lah a thil kidang abol ding ahi,” ati.
6 Jingkah in, Joshua'n thempuho kom'a chun aseijin, “Kitepna thingkong chu pu-uvin lang mipi ho masang langa chun cheuvin,” ati. Hichun amaho akipatdoh un, kitepna thingkong chu apu uvin mipi ho masanga chun acheuvin ahi.
7 Pakaijin Joshua kom'a chun, “Tuni hin keiman nangma hi Israel mite jouse mitmua katunlet ding nahi, chutengleh ama hon Mose kana umpi bang banga nangjong kaumpi hi ahetdoh thei diu ahi.
8 Kitepna thingkong pua thempuho kom'a chun hiche thupeh hi seipeh in: 'Nangho Jordan vadung pang nalhun tengu leh Jordan vadung chu chonlut un lang ding denun,'” ati.
9 Hiti chun Joshua’n jong Israel te jah a chun “Hungun lang Pakai na Pathen uvin ipi na jahsah nom uvem hung ngaijun.
10 Tunia hi nang hon hingjing Pathen chu nalah uva aum'e ti nahet diu ahi. Aman Canaan mite, Hit mite, Hivi mite, Periz mite, Girgas mite, Amor mite chule Jebus mite jouse namasang uva na nomang peh diu ahi.
11 Ven, vannoi leiset pumpi Pakai kitepna thingkong chun nangho hiche Jordan vadunga hi napui galkai diu ahi!
12 Tun, Israel phung som le ni lah a kon chun phungkhat a mikhat cheh lhengdoh in.
13 Vannoi leiset pumpi Pakai, Pakai thingkong chu thempu hon aput diu ahi. Akengun twi agah chotkhah khah uleh, sah langa konna twi hung long chu tan jeng ding, chuleh vadung chu banglai banga kikhang jeng ding ahi,” ati.
14 Hiti chun mipi ho chun angahmun uchu ahin dalhauvin Jordan palgalkai ding chun ahung kijot tauve, chuleh kitepna thingkong pua thempu ho chu ahung masauvin ahi.
15 Hichu chang-at phatlai ahijeh in Jordan chu akam'a twi letjenga ahi. Ahinla thingkong pua thempuho keng chun vadung geichin twilah chu agah chotkhah phatnun,
16 sah langa konna hunglong twi chu akitingtan jengin Adam kiti Zerethen kom'a khopi gei chun gamla tah geijin twi alom changing akikhanghel jengin ahi. Chuleh hiche noilanga twi ho chu alon kanghel tokah in Dead Sea ah alonglutnin ahi. Hijeh chun mipi ho chu Jericho khopi kom'a chun agalkaijun ahi.
17 Hiti chun mipi ho akijot sungu chun Pakai thingkong pu thempuho chu vadung kim tolgolaiya chun ading denun ahi. Ama hon Israel nam pumpi chu Jordan tolgolai ajot galkai soh tokah uvin angah un ahi.