4
Melchihna Song Kiphut
1 Mipiho chu Jordan agalkai sohhel phatnun, Pakaijin Joshua kom'a chun thu ahin seije,
2 “Tun phungtin'a kon'in pasal som le ni lhengdoh inlang,
3 Jordan vadung lailung nadin nauva kon'in song som le ni hin choidoh un, hichu choijun lang tunilhah a nagena diu mun achun sekhom'un,” ati.
4 Hiti chun Joshua’n Israel phungtin'a konna alhendoh som le ni ho chu akou khom’in ahi.
5 Amaho kom'a chun, “Jordan lailung Pakai na Pathen'u thingkong masanga khun cheuvin lang mikhat in songkhat cheh na lengkou uvah hinpu uvin lang, Israel phung som le ni a kon'in phungkhat a song khat cheh, song som le ni chu hin choijun tin aseipeh in ahi.
6 Eihon hiche song ho hi melchihna khat a iman diu ahi. Khonung tengleh nacha teuvin hiche song hi ipi vetsahna ham tia ahindoh tengu leh,
7 nanghon hitia hi nadonbut diu ahi, 'Pakai kitepna thingkong chu akiput galkai phat chun Jordan vadung chu atanghel jengtan ahi,' Israel mipi ten itih chan hijongleh ahetjingna diuva hiche songho hi amelchihna hi ding ahi tia na seipeh diu ahi.” ati.
8 Hiti chun mipi hon Joshua athupeh bang bangin abol’un ahi. Pakaijin Joshua ana thupeh bang bangin Jordan vadung lailunga kon chun phung khat a songkhat cheh toh kitoh dingin song chu som le ni ahinpu uvin ahi. Ama hon hichu ajan genau ngahmun'ah apolut u hetjingna song dingin aphut tauvin ahi.
9 Joshua’n jong achombeh in Jordan lailunga kitepna thingkong puho keng phangin achotpha nau laitah a chun song som le ni aphutnin ahi. Hiche chu tuni geijin aum nalaijin ahi.
10 Mose’n Pakai thupeh ho Joshua ana pehson ho chu akitoldoh sohkei tokah in thingkong pua thempuho chu vadung lailunga chun ading jingun ahi. Alangkhatnah, mipi ho chu kinotah in vadung chu agalkaijun ahi.
11 Mipiho jouse chu bitkeija agalkai sohkei phatnun Pakai thingkong puho jong chu mipi ho mitmu changtah chun agalkaijun ahi.
12 Gal manchah kichoi Reuben leh Gad phungmi ho leh Manasseh phung akehkhatnin Mose thupeh bangin Israel te chu alamkaijun Jordan agalkai masauvin ahi.
13 Hitobanga gal manchah kichoi mihem sangsomli ho chu galsat dinga kigosadem ahiuve, chuleh, amaho chu Pakai mapuina chang pum'in Jericho khopi phaicham lang’ah chun agalkai tauvin ahi.
14 Hiche nikho chun Pakaijin Joshua chu Israel te jouse mitmun atunglen in ahi, hiti chun ama hon ahinkho lhumkei uvin agingun, Mose anaja bang bangun jana ana peuvin ahi.
15 Pakaijin Joshua kom'a chun hitin ana seije,
16 “Vadung tolgo laiya kon chun Pakai kitepna thingkong puho chu hungdoh dingin thu pen,” ati.
17 Hiti chun Joshua’n jong thupeh chu aneitan ahi.
18 Pakai kitepna thingkongpu thempuho chu vadung golaija konna ahung potdoh uva akengphangun vadung pang tolgo lah chu ahinchot phat uvin Jordan vadung twi chu ahunglong kitnin tumasanga bang bangin vadung pang aletdoh sohkei kittan ahi.
19 Mipi chu lhamasapen nisom channi chun Jordan chu ahung galkaijun Jericho solam Gilgal munna chun ngahmun asem'un ahi.
20 Joshua’n Jordan vadunga konna song som le ni ahinlah chu hiche Gilgal mun a hin alom changin asekhomin ahi.
21 Hichun Joshua’n Israel te kom'a chun aseijin, “Khonung leh nacha teuvin hiche hi ipi vetsahna ham tia nahindoh tengu leh,
22 Hiteng chuleh nang hon 'Hiche laiya hi Israel chate Jordan tolgo laiya ahung galkaina mun u chu ahi,' tia na donbut diu ahi,
23 Ajeh chu, na Pakai na Pathen uvin nangho mitmu tah a twi chu akansah a hitia chu twikhanglen San eigalkai sah kahseuva akansah banga chu igalkai sohkei tokah uva akansah ahi.
24 Leiset chunga nam jousen Pakai ban thahat anasatje ahetsohna diu leh nang hon jong Pakai na Pathen'u itih chan hijongleh nagin jing theina diu ahi tia na seipeh diu ahi.” tin aseipeh tai.