5
1 Jordan lhumlam'a cheng Amor mite lengho leh Mediterranean panga cheng Canaan mite leng hon Israel mipite hi a Pathen uvin Jordan vadung asuhkhang peh in ahin palgalkai sahtai ti ajahdoh phatnun kichatnan alungthim'u alhulhop gam tauvin ahi.
Gilgal Mun a Chep Kitan
2 Hiche pettah chun Pakaijin Joshua kom'ah “Songhem chu chemcha bangin sem inlang Israel te chu akhangni chanin achep u tanpeh in,” ati.
3 Hiti chun Joshua’n jong songhem chemcha in asemin Israel te chu Gibeath-haaraloth mun'ah achep u ana tanpeh in ahi.
4 Joshua’n amaho chu achep u atanpeh louva khoh a ahi, ajeh chu Egypt ahin dalhah uva galsat thei pasal ho jouse chu gamthip gam'a ana thigam ahi tauve.
5 Egypt hin dalha a pasal ho jouse chu achep u ana kitan sohkeija ahiuvin, ahinlah Egypt a konna ahung potdoh uva gamthip noija ahung kholjin nau kum sunga pengho chu achep u kitan loulai ngen ahiuve.
6 Israel ten Egypt ahin dalhah uva galsat thei jouse athigam kahseuva kum somli sung hi gamthip noija hung kholjin ahiuve. Ajeh chu ama hon Pakai thupeh anitlou jeh un Pakaijin khoiju le bongnoi lonna gam peh dinga ateppeh nau gam chu alutsah louna dinga ana kihahsel'a ahi.
7 Hijeh chun Joshua’n apateu mun lothei dinga hung kikhanlhit ho chu achep u atanpeh u ahi. Ajeh chu amaho hin Gamtep Gam ahinjot nauva hi achep u ana kitan khaloulai ngen ahiuve.
8 Pasal jouse achep u akitan jeh chun amaho adamdoh kahsen ngahmun a chun ana kicholdo tauvin ahi.
9 Hichun Pakaijin Joshua kom'a chun “Tunia hi Egypt gam'a na sohchan nauva najum nau chu katolmangpeh u ahitai,” ati. Hijeh a chu hiche mun chu tuni chan geija Gilgal kitia ahitai.
10 Israel ten Gilgal mun a ngahmun asem sungu lhamasa nisom le nili chan nilhah chun Jericho phaicham a Kalchuh Kut ana mangun ahi.
11 Hiche jou ajing nikho tah chun agamsung soh agamga cholsolou changlhah a kisem leh anchang kikang chu anepan tauvin ahi.
12 Ama hon agamsung soh agamga aneh masat ni uva pat chun Manna akimu tapon, mu jong akimukit mong-mong tapon ahi.
Pakai Sepai Jalamkai pan Joshua Akimaitopi
13 Joshua chu Jericho khopi kom aga lhun chun akhodah in chunglang avetleh akhut a chemjam kichoi mikhat amasanga adin chu amun ahi. Joshua chun ajonlutnin amapa chu ana dongin, “Nang hi eipanpi ding kagol nahim ahilouleh galmi nahim? ati.
14 Ama chun ahin donbut in “Khatcha chu kahipoi, keima Pakai sepaite lamkaija pang tua hi hungkon kahitai,” ati. Hichun Joshua chu tolla abohkhup in achibaijin, “Ka Pakaijin na lhacha keima hi ipi nei bolsah got ham?” ati.
15 Pakai sepaite lamkai pa chun adonbutnin, “Na kengkoh chu sutlhan ajeh chu na dinna chu muntheng ahi,” ati. Hichun akiseipeh bang chun Joshua’n aboltai.