6
Jericho Khopi Kisuhchim
1 Tun Jericho mipite chun Israel te chu akichat jeh un akhopiu kelkot chu akam chahkheh jengun ahi. Mi koimacha avadohsah pouvin lut jong alutsah pouvin ahi.
2 Ahinlah Pakaijin Joshua kom'ah, “Hiche khopi leh alengpau chuleh asepai teu jouse jong nakhut a ka pehdoh ahitai.
3 Nang leh na sepai chengse toh nigup sunga hi niseh leh khopi hi khatvei navel diu ahi.
4 Thingkong masanga hi thempu sagi in kelchalki khat cheh akichoi uva kijot diu ahi. Nisagi channi leh nang hon hiche khopi hi sagivei navel diu ahi.
5 Thempu hon kelchalki ho chu ahin mut-mut uleh mipi ten na onei chasun sun uva sangtah a nasap diu ahi. Hiteng chuleh khopi kulpi chu chimlha ding, hiteng chuleh mipi ho chu khopi sunga chu na lhailut uva na delkhum jeng diu ahi,” ati.
6 Hiti chun Joshua in thempuho chu akoukhom'in hiti hin aseipeh tai, “Pakai kitepna thingkong chu pu uvinlang, thempu sagi chun kelchalki kichoi cheh unlang mipi masanga khun kijotnun” ati.
7 Hijou chun aman mipi ho chu thu apen, “Khopi vella chun kijotnun, gal manchah kichoi chengse chu Pakai thingkong masanga cheuhen lang mipi chu lamkai uhen,” ati.
8 Joshua’n mipi ho kom'a thu ana seijou chun Thempu sagiho chun pengkul akichoi cheh un Pakai masanga chun akijotnun pengkul ho chu amutnun ahi. Chuleh Pakai kitepna thingkong chu ajuijun ahi.
9 Gal manchah kichoi phabep chu pengkul kichoi thempuho masanga akijotnun, loikhat chu thingkong nung langa akijotnun, thempuho chun pengkul chu amutjom jingun ahi.
10 Joshua’n thu ahinpen, “Koima chan kholhang sam hih un, pao jong paopoh hih un, keiman sam'un kati tokah in thu chengkhat cha jong nakam uva kon'in gindohsah hih un,” ati.
11 Hiti chun Pakai thingkong chu apu uvin hiche nikho chun khatvei khopi chu avellun, chujouvin abonchauvin ngahmun chu ajonun aga geh un ahi.
12 Ajingin Joshua chu jingkah matah in akipatdoh in ahileh thempuho jong chun Pakai thingkong chu apukitnun ahi.
13 Thempu sagi ho chun pengkul chu akichoi cheh un Pakai thingkong masanga chun akijotnun, pengkul chu amutnun ahi. Avellin, gal manchah kichoi ho chu pengkul kichoi thempu ho masang leh Pakai thingkong puho nung’ah akijotnun ahi. Hiche sungse hin thempuho chun pengkul chu amut-mut jengun ahi.
14 Anini channa in jong ama hon khopi chu avelkitnun chujouvin ngahmun a ahung kile kitnun ahi. Hitobang hin nigup sungse chun abollun ahi.
15 Nisagi channa in Israel te chu khovah lhah in akipatdoh un tumasanga abol bang bangun khopi chu avel kitnun ahi. Ahin tuchunga hin khopi chu sagivei avellun ahi.
16 Sagivei avel jouvun thempu hon pengkul thongjen jun'a ahin mutphat uchun Joshua’n mipi ho chu thu ahinpen, “Kholhang sam'un! Pakaijin hiche khopi hi nepeh u ahitai!
17 Jericho khopi leh asunga um jouse hi Pakaijin asuhmang sohkei ding ahitai: Rahab kijohnu leh a insung mite jouse chu kihinghoi ding ahi, ajeh chu amanun gamvelhi a kisol ho chu ana hoidoh sah in ahi.
18 Suhmang dinga um thil ho chu khatcha suloh hihbeh un, achutilouleh nangho jong na kisuhmang tha dingu ahi, chuleh Israel ngahmun'a hi hamsetna nahin lhutkhumlo diu ahi.
19 Amavang dangka le sana, chule thih le sum-eng’a kisem thil ho chu Pakaiya atheng ahin hiche ho chu Pakai sumkholna a lut ding ahi,” tin thupeh ana neitai.
20 Mipiho chun pengkul kimut gin chu ajah phatnun a onei chasunun asamun ahileh Jericho kulpi chu achimlha jengin ahi. Hiche phat chun Israel ten khopi sung chu anokhum'un ala tauve.
21 Ama hon khopi sunga umho jouse, numei pasal, ateh akhang, bong, kelngoi, kelcha chuleh sangan abonchan asumang sohkeijun ahi.
22 Hichun Joshua’n gam velhia che teni kom'a chun, nakitepna lhon dungjuijin akijohnu in achun lut lhon'in lang amanu le a insung mite jouse chu gapuidoh lhon'in ati.
23 Gamvelhia che teni chu achelut lhon'in Rahab chu ama toh umkhom apa le anu, asopiho le a insung mite jouse chutoh aga puidoh lhon'in ahi.
24 Hijou chun, Israel ten khopi chu asunga um jouse toh ahallhauvin asumanghel tauvin ahi. Ahin sum le sana, chule sum-eng le thih a kisem thil ho vang chu Pakai sumkholna mun'ah akoijun ahi.
25 Hiti chun Joshua’n Rahab kijohnu chu insunga aum khompi a insung mite jouse toh ahuhdoh in ahi, ajeh chu aman Jericho velhi dinga asol teni chu ana seldoh a ana hoidoh sah lhon ahi.
26 Hichun, Joshua’n Jericho khopi chu ana gaosap in:
“Koi hileh hiche Jericho khopi sapha go chan chu
Pakai sapset changhen,
Abul tungdohgo a chu,
achapa masapen loulo hen,
akelkot tungdohgoa chu,
achapa lhumpen chaanlo hen,” ati.
27 Hiti chun Pakaijin Joshua chu ana umpin hijeh chun gamsung pumpia chun amin ana kithang lheh jeng tan ahi.