7
Israel ten Ai Khopi Alel’u
1 Ahinla Israel’in sapset changsa thil ho chunga hin thupeh ana palkeh un ahi. Achan kitipa hin sapset changsa thil ho phabep chu ana gudoh tan, hijeh chun Pakai chu Israel chungah ana lunghang lheh jengin ahi. Achan kitipa hi, Judah phung sunga Zerah chapa Zimri chilhah a kon Carmi chapa ahi.
2 Joshua’n Jericho a kon'in, Beth-aven kom, Bethel solam a um Ai khopi velhi dingin mi phabep asol in ahi.
3 Amaho ahung kile phatnun Joshua kom'a chun hitin aseijun ahi, “Eiho ibon uva ichetouvu angaipoi ajeh chu hiche Ai khopi nokhum ding khun mi sangni ahilouleh sangthum kal ngai ponte atiuvin ahi. Amaho khu lhomcha bou ahiuvin eiho iboncha uva ichetou khoh u angaipoi atiuve.”
4 Hijeh chun mi 3,000 tobang asol'un ahileh gimneitah in gal ahinlal tauvin ahi.
5 Ai khomi ten Israel ho chu akhopiu kelkotna kon'in Sheberim geijin ahin dellutnun lamsah lamma nungjam ho chu mi somthum le gup tobang athatnun ahi. Hitobang thilsoh a kon hin Israel te chu kichatnan adim tauvin alungu adai lheh jeng tauvin ahi.
6 Joshua leh Israel upate jouse lunghemin aponsil u abot-eh jengun, aluchang uvah leivui akinu uvin Pakai thingkong maija chun tolla abohkhup un nilhah lang geijin akisehgim jengun ahi.
7 Hichun Joshua akapjah jengin, “O thanei tah Pakai, hiche Amor mite thagam ding bepma hi ipi dinga hiche Jordan hi neihin pui galkaiju ham? Hiti ding sanga hi Jordan gallang khatna chu nei chenden sah jengu leh iti aham?
8 Pakai, Israel hi agal mitea konna hi ajam thei bepma ahileh ipi kasei thei ding ham?
9 Ajeh chu, Canaan mite le hiche gamsunga cheng mite ho hin hiche hi ajahdoh phat uleh, ama hon eihin umkimvel’un tin hiche gam leisetna konna hi eisuhmang tah lou diu ham? Chutengleh amin loupi jaangaina hi iti ding hitam?” ati.
10 Ahinlah Pakaijin Joshua kom'ah ahin seijin, “Kithoudoh loijin, ipi dinga bohkhupma kijam jeng nahi ham?
11 Israel’in kakitepna asukeh in sapset changsa thil ho agu uvin, eijoulhepmun athilkeo lah uva akoijun ahi.
12 Hiche jeh a hi Israel te agalteu masanga dingjou louva gallel’a jam'a ahiuve. Tua hi Israel te amaho jeng jong hi suhmang dinga uma ahi tauve. Nalah uva um sapset changsa thilkeo ho chu na suhmang lou uleh keiman nangho kaumpi louding nahiuve.
13 Thoudoh inlang, jing nikho kigotna dingin namite hi amaho le amaho kisuhthengsah in. Ajeh chu, Pakai Israel Pathen'in aseije, O Israel, sapset changsa thilkeo ho chu nalah uva akiselden nalaije, hiche ho hi nahin lahdoh tokah uva gal masanga nadin joulou diu ahi.
14 Jingkah tengleh naphung dungjui uva nahung kigol diu ahi, hiteng chuleh Pakaijin achonsepa chu koiphung pen a kon ham ti ahin phondoh ding ahi. Pakaijin ahin lhendoh phung chu aphungkhaija nahung kigoldoh diu, Pakaijin achonse phungkhai chu ahin lhendoh ding ahi. Pakaijin ahin lhendoh phungkhai chu hung kigol diu achonse insung chu ahin lhendoh ding ahi. Ajonapen’a chu achonse insung mite chu khat-khatna hung kigoldoh diu ahi.
15 Koi hileh hiche sapset chang thil ana gupen pen ama tah chu anei jouse toh halvam tha ding ahi, ajeh chu aman Pakai kitepna chu apalkeh a Israel chunga hitobang hamsetna chu achuh sah ahi,” ati.
Achan Chonsetna
16 Joshua’n jong jingkah matah in athouvin Israel phungho chu Pakai maijah ahin goldoh in ahileh Judah phung chu matdoh ahitai.
17 Hijeh chun Judah phungkhai chu ahung kigoldoh in ahileh Zerah phungkhai chu akimandoh kittan ahi. Hichejou chun Zerah insungmi chu ahung kigoldoh un ahileh Zimri insung chu matdoh ahitai.
18 Zimri insung mite jouse chu ama chang cheh in ahung kigoldoh un ahileh Achan chu ahin mandoh tauvin ahi.
19 Hichun Joshua’n Achan kom'a chun hitin aseije, “Kachapa, Israel Pathen loupina hi jana penlang thudihtah seijin, ipi bepseu na-na bol hitam phongdoh inlang, nei seipeh in, imacha im hihbeh in” ati.
20 Achan’in adonbutnin, “Adih’e, Pakai dounan kana chonsetai.
21 Thil kichomdoh lah a chun, Babylon pon hoitah khattoh, dangka shekel 200 toh, shekel sangnga gih sana lhonkhat toh kamun ahileh ka deichan kana kilah tai. Hiche ho chu ka ponbuh sungah dangka chutoh tolla kavuijin ahi,” ati.
22 Hichun Joshua’n akholtoh dingin mi phabep asollin, amaho acheuvin ahileh Achan'in asei bang chun thil kiguho chu dangka chutoh akivuitha chu agamu uvin ahi.
23 Ama hon ponbuh a kon chun hiche thil ho jouse chu ahin choijun Israel te leh Joshua kom'a chun ahin choijun, hiche ho chu Pakai angsung tollhanga chun asekhom'un ahi.
24 Hichun Israel te leh Joshua’n Achan toh, dangka leh ponloupi, sana lhon toh, achapa te le achanu te, abongchal ho, asangan ho, akelngoiho le akeltah ho, aponbuh leh athil ho jouse chu Achor phaicham'ah ahin polutnun ahi.
25 Hichun Joshua’n Achan jah a chun, “Ipi dinga nangin ilah uva hitobang hamsetna hi nahin pohlut ham?” ati. Hichun Israel te jousen Achan leh a insung mite chu song’in aseplih un atahsa long’u meiyin ahalvam tauve.
26 Achan chunga chun songlom aseuvin tuni chan geijin aum jing nalaije. Hijeh chun hiche mun chu hichenia pat chun Lungkhamna Phaicham akisah tan ahi. Hiche pet chun Pakai lunghanna chu adailha tai.