8
Israel ten Ai Khopi Ajo U
1 Hiche jou chun Pakaijin Joshua kom'a chun aseije, “Kicha hih’in, lungthoina jong neihih in, na sepai ho chu puijin lang Ai khopi khu gadelkhum tan, ajeh chu Ai lengpa le amipi te, akhopi le agam chu nangma khutna kapehdoh ahitai.
2 Jericho le alengpau na suhgam banga amaho jong na suhgam ding, amavang tuchunga hi agancha hou leh anei agou na chomdoh hou chu nakilah theiju ahi. Akhopiu nung langa khun gachangpang tauvin,” ati.
3 Hiti chun Joshua leh asepai te chu Ai khopi gadelkhum dingin akon touvun ahi. Joshua’n asepaite lah a galsat hat cheh 30,000 alhengdoh in janin asoldoh in,
4 hiti hin thupeh aneijin ahi: “Nangho cheuvin lang khopi nung langa khun kinaichan gachangpang unlang khopi delkhum ding khun kigosademin umun.
5 Hiteng chuleh kei le kaloiho chengin khopi chu ka dellut diu chutengleh amasa-a bang-bang chun amaho keiho satdin hung kondoh un tin chutengleh amaho masanga chu keiho kajam diu ahi.
6 Khopia konna chu keihon amaho chu ka kidelmang sah diu, chutengleh ama hon Israel te hi amasa bang-banga imasang uva jamkitna ahi tauve ati diu ahi. Chujou teng chuleh keiho amahoa konna kajam sung uva chu,
7 nangho na changpan nauva kon chun hung potdoh unlang akhopiu chu nalonvuh jeng diu ahi, na Pakai na Pathen uvin nangho khutna nahin pehdoh diu ahi.
8 Chutengleh Pakaijin na thupeh bang bangun akhopiu chu meiyin hallha jengun hichu thupeh ahi,” ati.
9 Hiti chun amaho akipatdoh un Bethel leh Ai khopi lhumlam kikah achangpanna diu munah chun ache tauvin ahi. Ahinlah Joshua chu hiche jou chun mipi ho toh ngahmun a chun agehkhomun ahi.
10 Joshua chu jingkah langin matah in akipatnin amite asuthouvin Ai khopi lang ajontan, hichea hin Israel upahon ana juijun ahi.
11 Joshua chu ama toh umkhom sepaiho cheng chutoh khopi maija chun akijotnun sahlanga chun ngahmun asemun ahi. Amaho leh Ai kikah a chun phaicham khat aumin ahi.
12 Chuin aman mi 5,000 tobang apuijin Bethel leh Ai khopi kikah khopi lhumlam'a chun achangpan sah in ahi.
13 Hiti chun asepai bulpi pen chu khopi sah langa apansah in chuleh khopi lhumlam'a chun changpang loi akoiyin, Joshua ama tah chu phaicham'a chun ageh in ahi.
14 Ai lengpan phaicham langa um Israel te chu agahmu phatnin ama le asepai te jouse chun jingpitah in Jordan phaicham gah kigalmuna mun a chun anokhum tauvin ahi. Ahinla khopi nunglanga chun amaho aguh a changpanga aume tichu aman ahetlou ahi.
15 Joshua leh Israel sepaite chu gallel tobangin gammang langa chun ajam tauvin ahi.
16 Hiche chun khopi sunga um jouse chu akikoudoh un abonchauvin amaho chu adel tauvin, hiti chun amaho chu khopia kon chun alhemdoh tauvin ahi.
17 Ai ahilouleh Bethel'a chun mi khatcha kidalha louvin Israel te chu adel sohkei tauvin ahi. Hiti chun khopi ahom keuvin adalha tauvin ahi.
18 Hiche jou chun Pakaijin Joshua kom'a chun hitin ahin seije, “Na tengchau chu domsang unlang Ai khopi lang ngatsah tauvin, ajeh chu keiman hiche khu nangho khutna ka pehdoh ahitai” ati. Hichun Joshua’n akhutna um atengcha chu adomsang’in khopi lang chu agah ngatsah tan ahi.
19 Joshua’n akhut adopsang phatnin changpang ho jouse chu akisel nauva kon'in ahung potdoh un khopi langa chun alonglut jeng tauvin ahi. Ama hon gangtah in khopi chu alouvin meiyin ahallha tauvin ahi.
20 Ai khomite chu akinung heijun agah veuvin ahileh, khopia konna meikhu chu vanlaijol langa akitung jengin ahileh chena ding helouvin abeiden tauvin ahi. Ajeh chu Israel te gammang langa ana jamlut ho chu ahung kileheijun amaho chu ahin nungdel tauvin ahi.
21 Joshua leh Israel te chun apanlah nau chu alolhing’in khopia kon chun meikhu akitungdoh tai tichu amu phatnun ahung kileheijun Ai mite chu ahin delkhum tauvin ahi.
22 Alangkhat ah khopi sunga um Israel te chu ahung potdoh un galmi ho chu anunglang uva konin ahin delkhum uvin, hiti chun Ai khopi mite chu ajet avei uva Israel ten aum chinto tauvin amaho alailunga chatmo hellin aum tauve. Israel ten adelkhum'un mi khat jong asohcha ahilouleh ahingdoh a aum pouve.
23 Ai lengpa changseh chu ahingin amanun Joshua kom'ah ahin puilutnun ahi.
24 Israel sepai ten Ai mite chu adel uva tollhanga um jouse chu athajou phatnun amaho akinung heijun asung langa um jouse jong chu athat chaihel tauvin ahi.
25 Hiti chun Ai khopi sunga cheng mipite jouse, numei ti pasal ti abonchan hiche nikho chun athat gamsoh hellun ahileh mi 12,000 alhingin ahi.
26 Ai khopi sunga cheng jouse chu akisuhmanghel kahsen Joshua’n atengcha chu adomsang jing jengin ahi.
27 Pakaijin Joshua athupeh bangin, khopi sunga um agancha hou leh anei agou hou chu sumang louvin Israel ten amaho chan dingin akichom tauve.
28 Hiti chun Joshua’n Ai khopi chu ahallha tan ahileh hichu tuni chan geijin amangthah paitan ahi.
29 Joshua’n Ai lengpa chu nilhah lang geijin thing chungah ana khaijin, ni ahunglhum phatnin Joshua thupeh dungjuijin atahsa chu thing chunga kon'in ala lha uvin, khopi kelkot maija chun ana seplha uvin ahi. Ama hon achunga chun song asetkhum'un tuni chan geijin mutheijin aum nalaije.
Pakai Kitepna Kithah Suhhing
30 Hijou chun Joshua’n Ebal mol chungah Pakai Israel Pathen kom'ah maicham asemin,
31 Pakai lhacha Mose’in Israel chate ana thupeh Mose danbua ana kijih bangin, thihhem'a ana kikheng khalou songtum maicham chungah pumgo thilto leh chamna thilto ana bollin ahi.
32 Hiti chun aman Israel te mitmu changtah chun Mose dan thupeh ho chu song chunga chun ana jihdoh in ahi.
33 Hiche jou chun Israel te jouse agamsunga pengden ho ahin khopem mi ahiuvin, upaho jouse, vaihom ho jouse le thutan ho jouse ahiuvin hopnin akihomun, hopkhat chu Gerazin mol maija adingun, hopkhat chu Ebal mol maija adingun ahi. Ahopni chun aki-angngat touvin akikah uvah Pakai kitepna thingkongpu Levi thempuho chu adingun ahi. Hiche hi Israel mipi ten phatthei achanna diuva Pakai lhacha Mose thupeh dungjuiya anabol jiu dungjuiya chu abol'u ahi.
34 Hiche jou chun Mose’n adan lekhabua ana jihlut phatthei bohna le sapsetna ho chu Joshua’n mipi ang'a chun asimdoh in ahi.
35 Mose thupeh thucheng ho jouse chu Israel mipi ahung kikhomho leh nunao chapangho, chuleh alah uva cheng gamdang miho pum'a ajah sohkei diuvin asimdoh soh hellin ahi.