10
Israel in Lhanglam Sepaiho Ajo
1 Jerusalem lengpa Adoni-Zedek hin Joshua’n Jericho khopi le alengpau asuhmang banga Ai leh alengpau asuhmang hel chu ajadoh tan ahi. Gibeon miten jong Israel te chu akichampi uvin amaho mi in akiheilut tauve tijong ahetan ahi.
2 Hijeh chun ama leh mipite akicha lheh jengun ahi. Ajeh chu Gibeon hi khopi lentah ahin leng khopi dang ho ahin chuleh Ai sanga jong khopi lenjo ahin, Gibeon mite jong chu galsatna hatte ahiuve tijong ajan ahi.
3 Hijeh chun Jerusalem leng Adoni-Zedek chun leng dang ho akou khomin, amaho chu Hebron lengpa Hoham, Jermuth lengpa Piram, Lachish lengpa Japhia chuleh Eglon lengpa Debir ahiuve.
4 “Hungun lang Gibeon mite suhmangna din neihung kithopi uvin,” tin atemun ahi, ajeh chu “ama hon Joshua leh Israel te toh kichamna asemun ahi,” ati.
5 Hijeh chun Amor mite leng-nga ho chu galsat dingin akiloikhom tauvin ahi. Hichun ama hon asepai teu chu akhom khomun Gibeon mite chu ana nokhum tauvin ahi.
6 Gibeon miten Gilgal ngahmunna um Joshua kom'a chun thulhut ding mi gangtah in asol tauvin ahi. “Nasohte hi nei donda hihbeh un, gangtah in hungun lang neihung kithopi uvin lang neihung huhdoh un, ajeh chu thinglhanga cheng Amor lengho akitho khomun eihung delkhum tauve,” atiuve.
7 Joshua leh asepai te chengse leh gal-hat laise toh Gilgal adalha uvin Gibeon te kithopi dingin akon tauve.
8 Pakaijin Joshua kom'ah “Amaho khu kicha hih un, ajeh chu keiman amaho chunga khu galjona kapeh u nahi tauve. Amaho khatcha nangho masanga ding ngam louding ahiuve.” Tin aseipeh tai.
9 Joshua chun Gilgal'a kon'in jan khovah in lam ajotnin Amor gal mite chu kigingman louhel'in anokhum tauvin ahi.
10 Pakaijin amaho chu atijatsah in, hiti chun Israel ten Amor mite chu Gibeon’ah atam a tam athatnun ahi. Hijou chun Israel ten galmi ho chu Beth-horon geijin adellutnun Azekah leh Makkedah lampi geijin aban thapeh un ahi.
11 Amor mite chu Beth-horon lamlen lamah anungjam peh un ahileh Pakaijin vanna kon'in gellom nasatah ajuhlhah sah in Azekah alhunkah seuvin aban thagam peh in ahi. Israel ten chem'a atha sang’un gellin atha atamjon ahi.
12 Hicheni chun Pakaijin Israel te chu Amor mite chunga galjona anapen ahi. Joshua’n Israel mipite mitmu changtah in Pakai hengah ana taovin,
“Gibeon chungah nisa dingden hen,
chuleh lha jong Aijalon phaicham chungah dingden hen” ati.
13 Hiti chun nisa leh lha chu Israel nam miten agal mite ajokah seuvin ama muncheh a adingden lhontan ahi. Hiche thilsoh hi Jashar Lekhabua kijihlutna hilou ham? Nisa chu vanlaijol'a ana ding denin nidanga nisalhum ngai bangin ana lhumpon ahi.
14 Pakaijin amite taona ana sanna ah hitobang hi tumasang leh khonung jengin jong anaum khapon ahi. Tahbeh mongin Pakaijin hiche nikho chun Israel te dingin gal ana satpeh in ahi.
15 Hiche jou chun Joshua leh Israel sepaite chu Gilgal ngahmun'ah ahung kilekit tauvin ahi.
Israel In Lhanglam Leng Nga Ho Athau
16 Gal kisat laitah chun leng nga ho chu Makeddah songkoa ana kisel'un ahi.
17 Joshua’n amaho chu ahin mudoh phatnun,
18 hiti hin thupeh ana neijin ahi, “Songkohom chu song lentah in sing’un lang lengho chu ahung potdoh louna diuvin apangah chun angah ding mi koijun,” ati.
19 “Adangse chun galmi ho chu nungdel'un lang anung langa kon'in satchap jengun, akhopiu nung lhunsah kit louvin sugam jengun, ajeh chu Pakai na Pathen uvin amaho chu nangho khutna na pehdoh u ahitai,” ati.
20 Joshua le Israel sepai ten galmi ho chu asuhmang soh kahseuvin athat-that jengun ahi. Hiti chun kul kigetkhum akhopi uva jamlut mi themcha khat tailou adangse chu abon chauvin asumang soh hel'un ahi.
21 Hiche jou chun, Israel te chu Joshua kom Makkedah ngahmun'ah bitkeijin akile kitnun ahi. Hiche kal chu koiman Israel te dounan thu themcha khatcha jong aseipoh ngam tapouvin ahi.
22 Hiche jou chun Joshua’n, “Songkohom kisinna songlentah chu ladoh unlang leng nga ho chu kakom'ah hin puijun” ati.
23 Hichun ama hon leng nga ho chu songko homma kon chun ahin puidoh’un, amaho chu, Jerusalem lengpa, Hebron lengpa, Jermuth lengpa, Lachish lengpa chuleh Eglon lengpa ahiuve.
24 Amaho chu ahin puidoh phatnun, Joshua’n gal lamkai ho kom'a chun, “Hungun lang na kengphang’un lengho ngongchang hi chotpha uvin” ati. Hichun ama hon asei bang chun abollun ahi.
25 Joshua’n amite kom'a chun, “Kicha hih un tijatna jong neihih un, hat unlang hang’un, ajeh chu Pakaijin nagal miteu chunga hitobanga hi abol sohkei ding ahi” ati.
26 Hiche jou chun Joshua’n leng nga ho chu athat sohkeijin thingphung nga chunga chun akhai sang'in, nilhah chan geijin akhaijun ahi.
27 Nisa lhum kon'in, Joshua thupeh dungjuijin lengho tahsa chu thingchunga kon'in alalhauvin ana kiselnau songkohom sunga chun aseplutnun ahi. Hijeh chun hiche songkohom chu songlentah ho asekhum'un tuni chan ngeijin aumin ahi.
Israel Lhanglam Khopiho Asuhmang
28 Hicheni ma-ma chun Joshua leh Israel ten Makkedah khopi chu alauvin asumang tauve. Aman khopi sunga um jouse chu alengpau pummin athat gam'un koimacha ahinghoi pouve. Aman amaho chu athatsoh in Jericho lengpa atha bangin Makkedah lengpa jong chu athatnin ahi.
29 Hiche jou chun, Joshua le Israel te chu acheuvin Libnah aga nokhum’un ahi.
30 Hiche jou chun, Pakaijin hiche khopi le alengpau chu amaho khutnah ana pedoh tan ahi. Aman khatcha jong hinghoi louvin athat sohkeijin ahi. Hiche jou chun Joshua’n Jericho lengpa atha bangin Libnah lengpa jong chu ana that in ahi.
31 Libnah a kon'in Joshua leh Israel te chu Lachish a acheuvin agadel khum’un ahi.
32 Hichea jong hin Pakaijin Lachish chu amaho khutnah apedoh in, Joshua’n anini chanin hijong chu ajouvin Libnah abolna bang bangin athatgam sohkeijin ahi.
33 Lachish ana delkhum’u chun, Gezer lengpa Horam chu hiche khopi kithopi ding chun asepai te ahin puijin ahung lhung tan ahi. Ahinlah Joshua’n khatcha jong hinghoi louvin asepai te le amaho chu athatgam tan ahi.
34 Hijou chun Joshua le Israel sepai te chu acheuvin Eglon aga delkhum’un ahi.
35 Hicheni chun hiche khopi jong chu alauvin asunga mijouse chu athat tauve. Aman Lachish ana bolna bangin abonchauvin ana sumang sohkeijin ahi.
36 Eglon’a kon'in Joshua le Israel te Hebron geijin ache touvun aga nokhum'un ahi.
37 Ama hon hiche khopi chu alauvin amipite chu alengpau pum'in athatnun, khatcha ahinghoi pouvin ahi. Amaho vella um kho jouse jong chu hitima chun ana bollun, Eglon abolna bang bangu chun asunga um mipite jouse chu asumang sohkeijin ahi.
38 Hiche jou chun Joshua le Israel te chu ahung kinung heijun Debir ahin delkhum'un ahi.
39 Akhopi chu alenpau toh avella kho jouse jong chu alauvin ahi. Aman khatcha hinghoi louvin abonchan ana that gam'in ahi. Aman Debir leh alengpa abolna bang le Hebron leh alengpa chuleh Libnah leh alengpa abolna bangin ana bollin ahi.
40 Hiti chun Joshua’n gam pumpi chu ana joutan ahi, thinglhang gamkol sunga alenghou le amipi teu, Negev gam leh lhumlam molbul gamgi chuleh molnoisuhse ana losoh in ahi. Pakaijin ana thupeh bang bangin aman koimacha hinghoi louvin agam sunga mipi ho jouse ana sumang sohkeijin ahi.
41 Joshua’n Kadesh-barnea apat Gaza gei, Goshen khopi vel gamho le Gibeon gamgi geijin mihem ahin thatgam sohkeijin ahi.
42 Pakai Israel te Pathen chun amite dinga gal ahin satpeh jeh in khatvei pansa a agal konna ah Joshua’n hiche lengho jouse le agam hou ahin banlah sohkeijin ahi.
43 Hiche jou chun Joshua le Israel te sepaiho chu Gilgal ngahmun'ah ahung kilekit tauvin ahi.