11
Israel In Sahlam Sepaiho Ajo
1 Hazor lengpa Jabin in thilsoh ho hi ajah phatnin avel'a lengho chu kouna thu athotnin, Madon lengpa Jobab, Shimron lengpa, Acshaph lengpa,
2 sahlam gamkaija lengho jouse, Galilee lhanglang Jordan phaicham gam'a lengho, Galilee molbulla lengho, lhumlam Naphoth-dor lengho,
3 Solam le lhumlam gamkaija um Canaan lengho, Amor mite lengho, Hit mite, Periz mite, thinglhang gam'a um Jebus mite, Mizpah gamsunga um Hermon molken suhlanga khopiho a um Hivi mite ho jouse chu akouvin ahi.
4 Hiche lengho jouse hi galsat dingin ahungkon tauve. Amaho hi ahung kiloikhom'un asepai hou hi ahin titkhom'un ahileh alet-lha jengun ahi. Asakol hou leh akangtalai hou twikhanglen panga neldiho bangin damkom alosoh jengun ahi.
5 Hiche lengho hin athau ajekhomun Israel te sat dingin Merom kom'a twipang vellah ngahmun asem'un ahi.
6 Hichun Pakaijin Joshua kom'ah hitin ahin seijin, “Amaho khu kicha hih un, jing nikho tuphat tah le hin, amaho hi athisa banga Israel te kahin pehdoh ding ahi. Hiteng chuleh asakolte akeng nasuhbai uva akangtalai hou na hallhah diu ahi,” ati.
7 Hiti chun Joshua leh asepaite jousen Merom kom'a twipanga chun alhailut un gangtah in adelkhum tauvin ahi.
8 Pakaijin amaho chu Israel te khutnah ahin pedoh tan, hiti chun ama hon Sidon gamlen langgei leh Misrephoth-maim chan gei chuleh Mizpah solam phaicham geipeh in ahin dellut un amaho chu khatcha hinghoi louvin ahin that sohkeijun ahi.
9 Pakaijin aseipeh bang bangin Joshua’n asakol teu keng asatbai peh in chuleh akangtalai jouseu ahallhah peh in ahi.
10 Hiche jou chun Joshua ahung kinunglen Hazor chu alan chuleh alengpau chu athatnin ahi. (Phat chomkhat a chu Hazor hi hiche lenggam ho jouse khopi anahi ahi).
11 Israel ten hiche khopi sunga mijouse abonchan asumang sohkeijin mi khatcha jong ahing hoipon ahi. Hiti chun Joshua’n khopi chu ahallha tan ahi.
12 Pakai lhacha Mose’n athupeh bang bangin Joshua’n leng dang ho jouse leh amipi teu abonchan asumang sohkeijin ahi.
13 Joshua’n ana hallhah Hazor tailou Israel ten lhang chunga kitungdoh khopiho chu ana hallha pouvin ahi.
14 Israel ten khopi asuhmang houva achomdoh u nei le gou ho leh gancha ho chu akilah un ahi. Ahinla koimacha hinghoi louvin mihing jouse chu athatgam sohkeijin ahi.
15 Pathen thupeh dungjuiya Mose’n Joshua chu thu anapeh ahi. Hiti chun Joshua’n Pathen thupeh dungjuiya Mose’n ana thupeh ho jouse chu atongdoh sohkeijin ahi.
16 Hiti hin Joshua’n gamsung pumpi hi ana jouvin, thinglhang gam Negev gam pumpi, Goshen khopi le avella gam pumpi, Molbul solam gamho, Jordan phaicham gamho, Israel molsangho leh Galilee molbul gamho jouse anala sohkeijin ahi.
17 Tun Israel gam chu Halak Mol apatnin ahung kijedoh in lhanglanga Seir chan gei aphan, chuleh sahlang gam Lebanon phaicham Hermon Mol bul'a Baal-gad chan gei ahopmin ahi. Joshua in hiche gam'a lengho jouse ana thatgam sohkeijin ahi.
18 Hiche tohmolsona dinga hin phat sottah gal ana douvun ahi.
19 Hiche gam ho a hin Gibeon a Hivi mite tailou khat chan Israel te hi ana kichampi pon ahi. Hiche Gibeon miho tailou gamdang miho jouse vang chu ana thatgam sohhel'un ahi.
20 Ajeh chu Pakaijin alungu asuhtah peh a Israel te chu ana kisatpiu ahi. Hijeh a chu amaho chu Pakaijin Mose ana thupeh bangin khotona beihel'in ana sumang’un ahi.
21 Hiche phat sungah hin Joshua’n Hebron thinglhang gam pumpi le Debifr, Anab, Israel te le Judah gamsung pumpia cheng Anak chilhah ho jouse ana sumang sohkeijun ahi. Aman amaho hi achennau khopiho jouse pummin anathatgam sohkeijin ahi.
22 Israel gamsung pumpia Anak chilhahho hi khatcha akihinghoi anaum pouvin ahi. Ahinlah Gaza, Gath gam'a vang amoh themkhat aum nalaijin ahi.
23 Hichun Pakaijin Mose ana seipeh bang bangin Joshua’n gamsung pumpi chu anala tan ahi. Aman Israel te chu agou chan diuvin aphung aphung dungjuijin ana hoppeh in ahi. Hiti chun galsatna a kon'in gamsung chu ana kicholdo tan ahi.