13
Lahbe Ding Gam Ho
1 Joshua chu ateh tan, hichun Pakaijin akom'a hiti hin thu ahin seijin ahi, “Nangla nateh tan, nakum jong atam thim lheh tan ahinlah gam lahding hi atam lheh jeng nalaijin ahi.
2 Gam lahding vat nalai ho chu: Philistine te gam leh Geshur gamho sese,
3 Canaan mite gam alenjo, Egypt gamgi a Sihor vadung'a hung kipan, sahlam'a Ekron gamgi chan gei. Hichu Philistine vaipote nga ho, Gaza, Ashdod, Ashkelon, Gath, leh Ekron jong ahopmin ahi. Av mite gam
4 lhanglam gam'a ahileh Canaan mite gam pumpi ahin, chule Sidon mite gamsunga Mearah chan gei leh Aphek gei, chujongleh Amor mite gamgi chan gei ahin,
5 Gebal mite leh Lebanon gam pumpi, nisolam leng se-se, Baal-gad khopi apat Hermon molsang nisolam gei ahin, Lebo-hamath khopi jotna kotphung gei ahithai,
6 chule Lebanon apatna Misrephoth-maim chan geija mite ahiuvin, Sidon mite gam jouse hop ahi.
“Mihem hijat hi aboncha keima mong mong’in Israel chate masanga kadelmang ding ahi, nangma kahil'a kathupeh bang-bang chun agam hi Israel ten alouva achenpha diuvin hoppeh pou-pou tan.
7 Chuti ahijeh chun nangman tuhin hiche gam hi Israel phung ho leh Manasseh phung kehkhat goulo din hoppeh tan” ati.
Jordan Luigal Nisolam Gam Kihop
8 Manasseh phung kehkhat leh Reuben chate chule Gad chate chun Pakai lhacha Mose’n apehsau Jordan vadung gal nisolam gamsung chu agoulo achan diuvin akisem tauve.
9 Agam chu Arnon phaicham pamchin'a Aroer khopia pat phaicham lailunga khopi chan gei ahipeh in Medeba gam, Dibon chan gei ahi.
10 Heshbon lengvaipo Amor mite lengpa Sihon khopi jouse jong ahin Ammon mite gamgi chan gei ahi.
11 Chujongleh Gilead gam ahin, Geshur mite leh Maacah mite lhangmang geijin ahopmin Hermon Molsang pumpi jong ahin, chuleh Bashan pumpi ahop peh’in Salecah gei ahipeh’e.
12 Ashtaroth khopi le Edrei khopia lengvaipoa ana pang Bashan gamsunga Og lengpa lenggam abonchan ahopmin hiche Og kitipa hi Rephaim mite lah a achangseh a ana hingdoh mikhat jong ahi, hichengse hi Mose in gal’a akisatpia ajo sohkeija adelmang sohkei ahi.
13 Ahinlah Israel chaten Geshur mite leh Maacah mite chu tuni geijin Israel lailunga acheng cheng tauvin ahi.
Levi Phung Mite Chan ding
14 Mose in goulo ding apeh louhel phung chu Levi phung bou ahitai. Pakaijin aseipeh banga Pakai Israel Pathen henga govam thilto chengse chu Levi te chan ding agoulo diuva um'ah ahi.
Reuben Phung Mite Gam Kipe
15 Reuben chate phung jong chu Mose in ama-ama insung dungjui cheh in agoulo diu anapei.
16 Hijeh chun Reuben phung mite gamgi hop chu ahileh Arnon phaicham pamchin'a kisa Aroer khopia kipan chuche phaicham lailunga khopi chan gei ahin, Medeba gam dokhang banga kikhangdoh chengse jong ahopme.
17 Heshbon khopi jong ahin dokhang banga kikhangdoh gamsunga Heshbon khopi jouse chutoh ahithai, akhopi ho chu Dibon leh Bamoth-baal, Beth-baal-meon jong ahin,
18 Jahaz jong Kedemoth jong Mephaath jong,
19 Kiriathaim jong Sibmah jong phaikola thinglhang vumma Zereth-shahar jong,
20 Beth-poer jong Pisgah lhang panglang se-se jong Beth-jeshimoth jong ahi.
21 Hicheng lah a hi dokhang langa kido gamsunga khopi jouse leh Amor mite lengpa Sihon lenggam pumpi ahithai, hiche Sihon hi Heshbon khopia lengvaipoa ana pang ahin Mose in hiche Sihon hileh Midian lamkai ho Evi, Rekem, Zur le Hur chule Reba kiti Sihon lengpa chapa te agamsunga chengse chu ana jotha ahitai.
22 Baalam kitipa Beor chapa phunsan thempa jong chu Israel chaten midang atha lah uva chu chemjamma asatlih thau ahitan ahi.
23 Hiti hin Reuben chate gamgi chu lhumlam'a Jordan vadung hi ahi jeng'e. Hiche hi Reuben chate goulo ahin, ama ama insung dungjui cheh a khopiho jong khoneo ho jong chentha cheh ahiuve.
Gad Phung Mite Gam Kipe
24 Gad phung jong chu Mose’n ama-ama insung dungjui cheh in goulo gam anapei.
25 Chule Gad chate gamgi hopsese chu, Jazer kho ahin, Gilead gam khopi chengse ahin, Ammon mite gamsung kehkhat toh ahin, chule Rabbah nisolam'a um Aroer khopi gei ahiye.
26 Chuin Heshbon khopia pat Ramath-mizpeh le Betonim khopi gei ahin, chule Mahanaim khopia pat Lo-debar gamsung gei ahiye.
27 Chutengleh phaicham'a ahileh Beth-haram ahin, Beth-nimrah ahin, Succoth ahin, chule Zaphon le Heshbon lengpa Sihon lenggam sunga adang jouse toh ahitha’n, Jordan gamgia vadung gamgia panga Jordan vadung gallama niso lamma Galilee twilen tolam among lamtoh kimatpai ahitai.
28 Hiche hi ama ama insung dungjui cheh a akhopi jouse leh akhoneo jouse pum-pum'a kihoppeh Gad chate chan gam ahi.
Solam’a Manasseh Phungkeh Gam Kipe
29 Manasseh phung kehkhat jong chu Mose in goulo gam anapen agam goulo chu Manasseh phung kehkhat jong ama-ama insung dungjui cheh in akihom uvin ahi.
30 Manasseh phung kehkhat gamhop lhang le molchu Mahanaim a ahung kipanin, Bashan gamsung jouse ahin adeh in Bashan gam'a Og lengpa lenggam pumpi toh Bashan gamsunga um Jair khopi jouse jong ahin, abonchan khopi somgup jen alhing’in,
31 Gilead kikah toh, Ashtaroth toh Edrei toh ahin, abon a hi Bashan gamsunga Og lengpa lenggam'a khopi jong ahiuve, hijat hi Manasseh chapa Makir chate leh Makir phung mite alangkhat kihom'a ama-ama insung dungjuiya chan kipe sohkei ahiuve.
32 Gam goulo hijatpi hi Mose in Jordan vadung gal Jericho khopi nisolam Moab phaicham'a ana hopdoh ahitai.
33 Levi phung vang chu Mose in goulo gam achansah poi, ajeh chu Pakaijin ajah uva aseisa banga Pakai Israel Pathen chu Levi te goulo ahi jeng'e.