14
Jordan Luigal Lhumlam Gam Kihop
1 Canaan gamsunga Eleazer thempupa leh Nun chapa Joshua chuleh apu apau, insung lhah dungjuiya Israel chate phung jousea lamkai hon Israel chate goulo dia ana hoppeh u, Israel chaten jong akisan cheh agoulo u gamsung cheh chu hicheng hi ahi.
2 Israel phungko le akeh khat gam kihop ding dol'a Pakaijin Mose thu anapeh bang bangin agoulo diu gam chan chu vang kisanga kihom anahi.
3 Israel phungni le phung kehkhat vang chu Mose in agoulo diuva Jordan vadung gallam a gam anapehsa ahitai, Levi phung mite chu Israel lah a goulo ding gam apehlou mong mong ahi.
4 Chujongleh Joseph chilhah chu phungni akisouvin, Manasseh le Ephraim ahi, Levi te vang chu gamsunga amaho chan ding gam akipepon, achenna diu khopi mai leh gancha avahna diu hamhing gamtoh athilkeo u mai-mai bou ahi.
5 Pakaijin Mose ahil'a athupeh bang bangin Israel chaten abol sohkeijin gam akihom tauve.
Caleb Hebron Khopi Kipe
6 Gilgal achun Judah chate thalheng in mi phabep Kenizz mi kitipa, Jephunneh chapa Caleb lamkai nan ahung kitol tauvin, Joshua jah a chun hitin aseijin, “Kadesh-barnea kiti mun a chu kei le nang chung chang thudol'a Pakaijin Pathen mi Mose jah a ipi ana seipeh geldoh in.
7 Pakai lhacha Mose Kadesh-barnea mun'a konna Canaan gam ve-lhi dia eina sol chun keima kum somli kana lhingtai, hichea chun keiman ka lungsunga kahet chan chu Mose henga thu kahin lhutnin ahi.
8 Ahinla kache khompi kasopiho chun Gamtep Gam jotlut ding chu mipi lungthim asulhadeh jengun ahi, ahinlah kei vangin Pakai ka Pathen chu lungthim pumpin kajui lhum keijin ahi.
9 Hijeh chun hiche nikho chun, Mose akihahsel in aseitan ahi, ”Tahbeh in na kengphangin achotphana muntin chu a itih a nang le na chilhah te goulo ding ahi, ajeh chu nangin Pakai ka Pathen chu na juilhum keiyin ahi” eina tin ahi.
10 “Tun vetan, Pakiyin aseibang bangin Israel gamthip gam'a akitolle laiya Pakaiyin Mose jah a hiche thu ana seija pat tuphat gei hin keima eihinghoi nalaiyin, tuhin kum somget le nga kalhingtai.
11 Tuni geihin Mose’n gamvea einasol lai bangin katha ahat nalaiyin, hichepet a ka thahat bang bangin kahat nalaiyin, galkon thei leh gallamkai thei kahi nalaije.
12 Chuti ahijeh chun chuche nikhoa Pakaijin eina teppeh bang-bang chun hiche mol khu neipe tan. Gam ve-lhai ichelai uva thupitah a khopi kul kigetkhum ho sunga cheng Anak chilhah ho chu nahen ahi. Ahijeng vang'in Pakaijin eiumpi leh Aman aseibang banga amaho khu kajoa kanodoh ding ahi,” ati.
13 Hiti chun Jephunneh chapa Caleb chu Joshua’n phatthei aboh in ama chan tum dingin Hebron chu anape tan ahi.
14 Hebron gam chu Keniz mi Jephunneh chapa Caleb a ahi ajeh chu aman alungthim pumpin Pakai, Israel Pathen chu ana juijin ahi.
15 (Tumasang chun Hebron hi Kiriath-arba ana kitin ahi. Hiche hi Anak chilhah gal hatpenpa Arba min'a kisah ahi.)
Hiti chun gam leiset chu galdouna a kon'in ana kicholdo tan ahi.