12
Sahlam Israel Phungho Kiphin
1 Rehoboam chu Shechem’ah aga chen, hichea chun Israel pumpi’n ama chu leng chansah dingin ana kikhom khom uvin ahi.
2 Nebat chapa Jeroboam chun hichu ajah phat in Egypt a kon'in ahung kile tan ahi. Ama chu Solomon lengpa a konna Egypt a chu ana jamlut na ahi.
3 Israel lamkai ten ama chu ana kouvun hiti chun Jeroboam chu Israel pumpi chutoh Rehoboam toh kihoulim khom dingin ana cheuvin ahi.
4 Ama hon ajah a, “Napa Solomon chun eina bolgim lheh jengun ahi. Hijeh chun napa in poh hahsasa eikoiden un nangin nasuh lhomjep a nomdom a neilhau le na lenggam a kitahtah in pang unge,” atiuve.
5 Rehoboam in adonbut in, “Hiche thu a hin kingaitona ding nithum phat neipeuvin, chujou tengleh ka donbutna ngai dingin hung kit tauvin,” ati. Hichun mipi ho jong akile tauve.
6 Hichun Rehoboam lengpa chun apa Solomon thumop a anapang upaho chu ana kihou pin, “Hiche thua hi ipi nagel uvem? Iti ka donbut ding ham nei seipeh un,” ati.
7 Hichun upaho chun adonbut un, “Nangin amaho chunga hi na vaihom nom jing’a ahile adei bang uvin donbut in chuti leh amaho hi nangma midih tah hijing diu ahi,” atipeh uve.
8 Ahinlah Rehoboam in tehseho thumop la louvin khangdong ama toh hung seilen khomho ama thumop a hung pang ho joh chu ipi nagel uvem tin ana dong tan ahi.
9 Aman amaho jah a chun, “Hiche mipi hon napan kachung uva pohgih eipoh sah uhi neisuh lhompeh un atiu hi, iti ka donbut ding ham?” tin ana dongin ahi.
10 Hiche khangthah ho chun, “Pohgih nei suhlhom peh un tia phun ho chu hitin donbut in, ‘Ka khut jung neocha hi kapa kong sang'in asa jon ahi.
11 Kapan na chung uva pohgih na-na pohsah u chu keiman ka gihsah cheh ding ahi. Kapan khaojanga najep u ahi, kenvang sakol jepna a kajep diu nahiuve tipeh in,” atiuve.
12 Jeroboam le mipi ho chu abonchauvin Rehoboam in a thupeh bang bangin nithum chanin lengpa thupeh ngai dingin ahung kit tauvin ahi.
13 Ahin Rehoboam in amaho kom'a chun upaho thumop lalouvin, ngailou tah in thu ana sei tan
14 aman akhangthah chanpi ho thumop joh chu ana sangin, “Kapan pohgih na-na pohsah uchu tunia hi keiman ka gihsah cheh ding ahi. Kapan khaova najep u ahin keiman sakol jepna a kajep diu nahiuve!” tin ana donbut tan ahi.
15 Hiti chun lengpan mipite chu nahsah louvin anakoi tan ahi. Hitobang thilsoh hi Pathen thilgon ahi. Ajeh chu Shiloh a konna hung Ahizah Themgao mangcha a Pakaijin Nebat chapa Jeroboam kom’a athu hetsah chu guilhunna ding thilsoh ahi.
16 Israel mipi ten lengpa kom’a ataonau chu asanpeh tapoi ti ahet phat’un, ama hon hitin adonbut tauve,
“David insung mite mangthah uhen!
Jesse chapa chungah lunglutna kanei tapouve,
Vo Israel, inlam kijot tauvin!
Vo David! Nangin na insung bou kivet tan,” tin asam un,
hiti chun Israel mipi chu a inlam cheh uva akile tauvin ahi.
17 Ahinlah Rehoboam in Judah khopi ho cheng Israel ho chung’a chun vai ana hom nalai jin ahi.
18 Rehoboam in namna a natongho chunga vaihompa chu mipi thunun ding chun agah sol’in ahile ama chu mipi hon songin ana seplih tauvin ahi. Hiche thu chu Rehoboam lengpan ajahdoh phat in asakol kangtalai chung’a akaldoh loijin Jerusalem lang’a ajam tan ahi.
19 Hiche apat hin sahlam gamkai’a um Israel phungho jousen David chilhah khat in achung uva vai ahop dingu chu anom tapouvin ahi.
20 Israel mipi ten Jeroboam chu Egypt a kon'in ahung kilekit tai ti ajahphat un, kikhopna aneiyun, ama chu Israel pumpi chung’a vaipo din atung tauvin ahi. Judah phung bou chun David chilhah te apanpi uvin ahi.
Shemaiah Gao Thusei
21 Rehoboam chu Jerusalem alhung phat in, aman Judah le Benjamin phung’a kon'in achomkhom in alenggam tundoh kitna ding’a Israel mite sat dingin sepai 180,000 alhengdoh in ahi.
22 Ahinlah Pathen'in Pathen mipa Shemaiah kom’ah hitin ahin seije,
23 “Benjamin le Judah mipite ho jouse kom le Judah lengpa Solomon chapa Rehoboam kom leh mipi adang jouse kom’ah seijin,
24 ‘Pathen'in hitin aseiye, nasopi Israel tehi kisatpi hih in, na incheh uva kile tauvin ajeh chu hiche hi keima natoh ahi!’ ati. Hiti chun Pakai thupeh chu ajuiyun ama-ama inlam cheh a akile tauvin ahi.
Jeroboam In Sana Bongnou Lim Asem
25 Jeroboam in Ephraim thinglhang gam’ah Shechem khopi chu ana tungdoh in, hichu ama leng khopi ahung hitan ahi. Hijou chun ama achen Peniel khopi jong aga tungdoh in ahi.
26 Jeroboam chu akingaiton, “Keima ka chih theilou leh hiche lenggam hi David chilhah te langa le lut kit thei ahi.
27 Hiche mipite hi Jerusalem'a ache uva Pakai Hou-In a kilhaina agabol jing uva ahileh, Judah lengpa Rehoboam noiyah avel in hunglut kit get unte, chuleh keima hi eitha uva ama hi aleng uva akilahlut kit diu ahi,” tin ana gel in ahi.
28 Hijeh chun amiching ho thumop dungjuijin, lengpa chun sana in bongnou lim asemin amite kom’a, “Jerusalem'a Pathen houva nache jiu hi ahahsa behseh e, veuvin Israel te Egypt a konna nahin puidoh uva chu hiche pathen teni hi ahi,” ati peh in ahi.
29 Aman hiche semthu bongnou lim pathen teni hi Bethel khopi ah khat chule Dan khopi ah khat akoiyin ahi.
30 Ahinlah hiche chu amaho din chonsetna nasatah ahung hikha tai, ajeh chu mipin bongnou limsemthu chu ahou tauvin ahi, chule mipi ho chu Dan langpeh a chetouva hiche semthu pathen kikoi chu aga hou jiu ahi.
31 Jeroboam in semthu pathen houna mun achun doiphung phabep atungdoh in, Levi phungmi hilou milham phabep jong thempu in athenso tan ahi.
32 Chule Jeroboam in Bethel khopiah houthudol kut khat jong ana pandoh in, hichu lhaget channa nisom le nga nileh ana boljin ahi. Hichu Judah ten hoidohna golvah kum khat a khatvei aboljiu tobang ahi. Bethel mun'a chun ama tah in jong bongnou lim asemna achun kilhaina asemin chuleh semthu pathen houna in achun thempu phabep jong ana pansah in ahi.
33 Hijeh chun, ama tah in anagon nikho, lhaget lhinna nisom le nga channa alhin teng Jeroboam ama tah in Bethel a kilhaina maicham gantha ama lungdei tah in anabol jin, aman Israel te hou thudol’a kut ana phudoh a ama tah in kilhaina gantha maicham chungah anabol’a, gimnamtui jong ana lhutnam ji ahi.