13
Themgao Hon Jeroboam Apai-U
1 Pakai thupeh dungjuijin, Pathen mikhat Judah a kon'in Bethel’ah ahungin, Jeroboam in maicham ajot a gimnamtui hal ding agot laitah in aga lhungin ahi.
2 Hichun Pakai thupeh dungjuijin apengjah jengin, “Vo maicham, maicham! Pakaijin hitin aseiye, ‘David chilhah lah a Josiah kiti khat hung peng ding ahi. Ama hin tua chep tanloute maicham a lhacha a pangji ho, na chunga kilhaina gan thatji thempu ho hi nangma chunga athagam ding chule na chunga hi mihem gule chang hung kilhut vam ding ahi, tin ahung seije,” ati.
3 Hiche nikho mama chun Pathen'in athupeh adih ahi hetthei nan, melchihna khat apen ahi. Aman ajah a, “Pakaijin hiche melchihna hi pedingin kitepna aneiye; hiche maicham hi kehni hung kiso ding chule avutvam ho chu tol’a hung kithe lha ding ahi,” ati.
4 Jeroboam Lengpan Bethel maicham douna hung kisei chu ajah phat in, themgaopa chu akoh-in, “Hiche pa chu man un!” tin ahinsam tan ahi. Ahinlah hiche pettah chun lengpa khut chu ahung ngoijin adingden tan, anung lahdoh jou tapon ahi.
5 Hiche pettah chun maicham chu ahung lengkeh jengin, Pathen mipan aseibang bangin maicham sunga kon chun vutvam jouse chu ahung kibo lhan ahi.
6 Lengpa chu Pathen mipa kom’a ahung peng jah jengin, “Lungset tah in Pakai na Pathen heng’a ka khut adamtheina dingin nei taopeh tan!” ati. Hichun Pathen mipa chu Pakai kom’a atao tan ahile Lengpa khut chu adamhel jengin achat le thei tan ahi.
7 Hichun Lengpan Pathen mipa kom'a chun, “Hungin ka inlang’a che hitin, an hung nen lang kipa thilpeh jong nape ing’e,” ati.
8 Pathen mipan lengpa kom achun, “Na lenggam akeh khat neipeh ding hijongleh nang toh kilhon khom pong’e, keiman hiche mun’a hi neh le chah kahol louding ahi,
9 Ajeh chu Pakaijin, nangman hiche mun a naum laisea neh le chah nahol louding chuleh hiche lampi ma-ma a hi Judah gam nahung kile kit ding ahi, tin thupeh einei jin ahi,” ati.
10 Hijeh chun aman Bethel adalhan lam chom aho in a inlang ajon tan ahi.
Bethel’a Themgao Tehse
11 Hiche pet hin Bethel mun'a chun themgao tehse khat ana chengin, chuin achapa te chu a inmun’u ahunglhun phat un, Bethel a Pathen mipan athilbol ho chu ana seipeh tan ahi. Chuleh hiche lengpa kom’a athusei ho jong chu aseipeh un ahi.
12 Hichun tehsepu chun, “Hoilang che tantem?” tin adongin ahileh, ama hon Pathen mipan hoiche lang pen aho ham tichu apau chu ana seipeh un ahi.
13 Tehsepu chun achate kom'ah, “Gangtah in sangan chung’a chun toupha nei koipeh loiyun,” atin ahile achaten sangan chunga chun toupha chu akoipeh un, ama jong atoudoh tan ahi.
14 Pathen mipa chu adeltan ahileh, ama chu thingphung lentah khat noija ana tou agamudoh in ahi. Tehsepun, “Judah gam’a konna hung Pathen mipa chu na him?” atileh
aman jong, “Henge ama chu kahi naiye,” ati.
15 Hichun aman Pathen mipa kom'a chun, “Hungin ka in ah bu hung nen,” ati.
16 Aman adonbut in, “Ahipoi, kei hung thei pong’e, keiman hiche mun’a hi anneh twidon bol thei pong’e.
17 Ajeh chu Pakaijin hiche mun a naum laisea anneh twidon nabol louding ahi, chuleh nahung na lampi hi mangcha a nahung kile theilou ding ahi, tin ei sei peh in ahi,” ati.
18 Ahin tehsepun adonbut in, “Kei jong themgao khat kahi, Pakaiya kon'in vantil khat in hiche thupeh hi eihin pen: 'Ama chu na in’a pui inlang an nehsah in twi donsah in eiti,'” ati. Amavang tehsepu chun ajou asei ahi.
19 Hiti chun akinungle lhon tan, Pathen mipan tehsepu in achun an anen, twi adon tan ahi.
20 Hitia chu amani atou khompet lhon chun Pakaiya kon'in Themgao tehsepu kom achun thupeh khat ahunglhung tan ahi.
21 Ama jong Judah a konna hung Pathen mipa kom'a chun apeng jah in, “Nangin Pakai thupeh chu na sukeh in, Pakai na Pathen'in thu napeh dungjuijin na chon tapoi.
22 Hilai munna nahung kilen, na nen, na donin, nehih in don hih in kati chu na sumil tai. Hiti ahijeh chun, natahsa hi napu napate lupna a kivui louding ahitai,” ati.
23 Pathen mipan aneh a adon jouvin Themgao tehsepu chun ama sangan chunga chun toupha apha peh in,
24 hichun Pathen mipa chu akipatdoh tan ahi. Hitia chu inlam jona ache laitah in, humpi khat atoh khan athat tan ahi. Atahsa chu lamlen chung'ah akijamin, sangan le humpi chu ana ding khom lhon'in ahi.
25 Mi phabep in along lampia kijam le akom'a sakei ding atoh khauvin, hichun Themgao tehsepu umna Bethel geiyin acheuvin athilmu uchu aga seipeh tauve.
26 Themgao tehsepu chun athu ajahdoh phat in, “Hiche Pathen mipa hin, Pathen thupeh anit lou ahin, Pakaijin keipi chu athasah a athusei chu asuh bulhit ahitai,” atin ahi.
27 Themgaopa chun achate kom’ah, “Sangan chung’a chun toupha hin koijun,” ati. Chuti chun amaon akoipeh tauvin,
28 ama ache in, atahsa lamlen chunga lum chu agamu’n, a sangan leh humpi akom’a ana din nahlai vang'in, humpi chun ana nedeh pon chule Sangan jong chu ima ana tipon ahi.
29 Themgaopa chun Pathen mipa tahsa chu asangan chung’a chun akoiyin, khopi langa chun along op dingin ahin pon ahi.
30 Aman lhan’ah avuijin, lhase tah in akap in “Vo ka sopipa!” atin ahi.
31 Hichejou chun Themgao pa chun achate kom’ah, “Keima kathi tengleh Pathen mipa kivuina lhan ah hin neihin vui uvin lang, kagu hi ama gu panga hin lupsah un,” ati.
32 “Ajeh chu Pakaijin Samaria khopi sung’a khopi ho lah a kisemdoh semthu pathen houna maicham leh Bethel maicham douna Pakaijin ana phondohsa chu guilhung tei ding hija ahi,” ati.
33 Ahivangin hitobang thilsoh nung jengin jong, Jeroboam chu athilse bolna a kon'in akihei mang dehpon ahi. Aman milham lah a kon'in thempu ana lheng jing nalaiyin ahi. Semthu pathen houna doiphung’a thempu dingin apang nom jouse ana pansah jengin ahi.
34 Hiche hi chonset nasatah ahung hitan chule Jeroboam chilhah ho leiset chunga kon'in suhmang in aumlo tan ahi.