14
Ahijah In Jeroboam Douna a Gaothu Asei
1 Hichun Jeroboam chapa Abijah ahung dammo tan ahi.
2 Jeroboam in ajinu kom'a, “Keima ji nahi hi min nahetdoh louna dingin kisem inlang, Shiloh a themgao Ahijah kom’ah gachen, ama chun leng kahung chan ding hi eina seipeh ahi.
3 Changlhah pheng som toh changlhah lum themkhat, khoiju thei khat toh po inlang ichapa khankho ding hi gadong tan,” ati.
4 Hiti chun Jeroboam jinu chu Shiloh a Ahijah kom’ah aga chen ahi. Ama chu ana teh lheh tan, kho jong amuchen thei tapoi.
5 Ahinlah Pathen'in Ahijah jah ah, “Jeroboam jinu chu lim chompu a hikom'a hi hung ding ahi. Aman achapa damlouna chung chang’a khu na hungdoh ding ahin adonbutna dia kahilchah bang’a na-na donbut ding ahi,” atipeh in ahi.
6 Ahin Jeroboam jinun Ahijah kot chu ahin phah chu ajah phat in, “Jeroboam jinu, ipi dinga midang dan’a na kilepma nahung ham? Hunglut in,” ati. Hijou chun aman, “Keiman na jah ding thungailou khat ka seipeh nom’e,” ati.
7 “Najipa Jeroboam chu ana seipeh in, Pakai Israel Pathen'in najah sah nom chu hiche hi ahi. ‘Keiman nangma hi milham’a konna ka dopsang’a kami Israel te chunga vaihom a kapansah nahin,
8 keiman David insunga kon’a lenggam kahe lhah a, nangma kapeh nahi. Ahinla nangma hi ka lhachapa David toh nabang pon ahi. Aman vang phattin in ka lungdei lamtah in ka thupeh jouse hi alungthim pumpin ajui jingin ahi.
9 Nangin vang nang masanga vaihom jouse sangin thilse nabol jon ahi. Nangman nang dingin semthu pathen ho nakisem in, na sana bongnou lim sem ho hin eiphin lunghang tan ahi. Nangin nei nungsun ahitah jeh in,
10 Keiman na chilhah ho chung’a hamsetna ka chuhsah ding chuleh na chilhah pasal jouse ka suhmang ding, soh hihen hilou hijongleh Israel lah a muntin’a na leng chilhah ho jouse aboncha kaban suhmang sohkei ding ahi.
11 Jeroboam insung mite kholaiya thiden jouse, uichan aneh chai ding chule gam lah a thiho jouse chu muthong in aneh sohkei ding ahi,’ tin Pakaijin aseiye,” ati.
12 Hijou chun Ahijah in Jeroboam jinu kom'ah, “Na inlang’a chetan khopi chu nalhun lhun le na chapa chu thi ding ahi.
13 Israel pumpin lunghempi uvin tin avui diu ahi, na insung’a phatecha kivuijah ama bou hung hi ding ahi. Ajeh chu Jeroboam insung pumpia hiche chapangpa bou hi Pakai Israel Pathen'in alunglhaina a amu ahi bouve,” ati.
14 “Hiche banna hin Pakaijin Israel a kon'in lengkhat hin tungdoh intin, ama chun Jeroboam insung pumpi asuhmang ding ahi.
15 Hiteng chuleh Pakaijin Israel chu luidung’a pumpeng kiling bang’a lonle le ding ahiuve, chuleh Israel te hi apu apateu ana pehna gampha a kon’a abodoh ding chuteng Euphrates vadung gallang peh a athe cheh ding ahi. Ajeh chu ama hon semthu pathen Asherah pou ahouvun ahi.
16 Jeroboam in Israel hi achonset sah jeh chun Pakaijin Israel pumpi hi adalhah ding ahitai.
17 Hijeh chun Jeroboam jinu Tirzah langa akile in a insung agah chot lut-lut achun chapangpa chu athi tan ahi.
18 Israel pumpin alunghempi uvin, Pakaijin Ahijah a phondohsah bang bangin avui tauvin ahi.
Jeroboam Thi
19 Jeroboam vaihom laija thilsoh dang ho jouse agalsat le avaihomna pum in Israel Lengte Thusimbua akijihlut sohkei jin ahi.
20 Jeroboam in Israel te chunga kum somni vai ana hom in ahi. Jeroboam athi phat in achapa Nadab leng ahung chang tan ahi.
Rehoboam In Judah Gam'a Lengvai Apoh
21 Alangkhat a Solomon chapa Rehoboam Judah lengpa chu leng ahung chan chun kum somli le khat anahi tai. Aman Pakai khopi Jerusalem'a kum som le sagi vai ana hom in ahi. Hiche khopi hi Pakaijin ama loupina dinga Israel phung jouse lah a kon’a ahin lhendoh ahi. Rehoboam nu chu Amon gam mi Naamah ahi.
22 Rehoboam vaihom sung hin Judah mipi ten Pakai mitmu'n thilse jeng anabol un, achonset nauvin Pakai ana lunghansah un ahi. Ajeh chu apu apateu sang'in thilse ana habol joh un ahi.
23 Ajeh chu ama hon muntin’ah milim semthu houna doiphung ho ana semdoh un chuleh thinglim noi tin le thinglhang sang tin ah Asherah doiphung ana tungdoh un ahi.
24 Gamsung jousea pasal leh numei kijoh ho doiphung jong anasem un ahi. Pakaijin Israel te masang’a ana nodohsa milim hou nam mite kidah umtah a achonna hou ana juijun ahi.
25 Rehoboam lengpa vaihom kum nga chanin Egypt lengpa Shishak chun Jerusalem ahin nokhum in ahi.
26 Aman leng inpi sung le Pakai Hou-In sunga sum kholna jouse ana chom ngimsel’in, Solomon in ana sem sana ompho ho jouse jong achom ngimsel tan ahi.
27 Rehoboam Lengpan hiche ompho chu sum-eng ana semin ana koi khel in ahi, hiche ho chu leng inpi ngah apipui hon anga tup diuvin angansen ahi.
28 Lengpa chu Pakai Hou-In a acheji phat tengleh hiche ompho ho chu ahin ladoh jiuvin chujou tengleh in-ngah ho umna indan sunga akoiji uvin ahi.
29 Rehoboam vaihom sung’a thilsoh adang ho jouse chu Judah Lengte Thusimbu achun akijihlut sohkeijin ahi.
30 Rehoboam le Jeroboam kikah a gal ana kisat matchet jingin ahi.
31 Rehoboam chu athi phat in apu apate toh David khopia anavui un ahi. Rehoboam nu chu Amon gam mi Naamah ahi. Ama bannah achapa Abijah leng ahung chang tan ahi.