15
Abijah In Judah Gam Lengvai Apoh
1 Jeroboam in Israel chunga avaihomna kum som le get lhin kum in, Abijam chu Judah te chung’ah vaihom in ahung pang in ahi.
2 Aman Jerusalem ah kum thum vai ana hom in ahi. Anu chu Absalom chanu Maacah ahi.
3 Aman jong, ama masanga leng vaihom ho bang bangin, thilse jeng anabol in, apului David kitah bangin a Pakai a Pathen ah ana kitah joupon ahi.
4 Ahin David jal’a, Pakai a Pathen'in achilhah te aban banna thaomei vah banga vah dinga vaihomna mun ahin ban losah ahin, achapa Abijam jong chu ama nunga Jerusalem'a vai ahin hop sah ahi.
5 Ajeh chu David in a Pakai mitmu a apha jeng anabol’a, Pakai thupeh hoitah a ahinkho lhumkeiya ana jui lhungkei ahin, Hit mi Uriah chung’a ana kipal bou chu ahi.
6 Hiche Abijam leh Jeroboam vaihom sung hin akikah lhon ah gal kisattona ana um mat chat in ahi.
7 Abijam vaihom sunga thilsoh dang ho Judah Lengte Thusimbu a aum sohkei jin ahi. Abijam le Jeroboam kikah a gal ana um jingin ahi.
8 Abijam athi phat in David khopia ana kivuijin ahi. Hijou chun achapa Asa chu leng ahung chang in ahi.
Asa In Judah Gam Lengvai Apoh
9 Jeroboam in Israel chung’a vai ana hom na kum somni ahung lhin hin, Judah chung’a Asa in vai ahin hom panin ahi.
10 Aman Jerusalem'a kum somli le khat vai ana hom in ahi. Api chu Maacah ahin, Abshalom tunu ahi.
11 Asa hin apului David bangin Pakai mitmun alung lhaina ngen anabol'in ahi.
12 Aman gamsunga numei pasal kijoh ho doiphung ho jouse chu ana paidoh in chuleh apu apaten ana hou u doiho jong asumang gam’in ahi.
13 Aman api Maacah jeng jong lengnu nu ahina a kon'in ana haisah in ahi, ajeh chu aman thet umtah Asherah doi ana kisem jeh ahi. Aman kidah umtah adoi ho chu asat lhan Kidron phaicham lamah aga hal lhan ahi.
14 Aman doiphung ho jouse chu ana suhmang lou vang'in, aman ahinkho lhung keijin kitah tah in Pakai anajui lhung keijin ahi.
15 Apa leh aman sana le dangka chuleh thil dang-dang ho ahin ana katdohsa lhon ho chu Pakai Hou-In'a ana polut in ahi.
16 Judah lengpa Asa leh Israel lengpa Baasha teni kikah a gal anaum jingin ahi.
17 Israel leng Baasha in Judah gam ahinsat in, Judah te leng Asa gamsunga mi alut le apot aum thei louna dingin Ramah chu kulpi aget khumin ahi.
18 Asa in hiche lethuhna in Pakai Hou-In sung le leng inpia sum kholna a sana dangka ho jouse chu aladoh in, hichu Hezion tupa Ben-Hadad , Tabrimmon chapa Aram lengpa chu aga pehsah in thu hicheng jong athot in ahi.
19 “Napa le kapa kikah a kinoptona anaum bang-bang chun, tunjong nang le kei kikah ajong kinoptona nei hite. Ven keiman sana le dangka kipa thilpeh kahin thot in ahi. Israel Lengpa Baasha toh kinoptona nanei lhon chu sukeh in, chutileh aman keima eidalhan tin eisuboi taponte,” ati.
20 Asa Lengpa tepna chu Ben-Hadad in jong ana noppeh in, Israel khopi ho nokhum dingin asepai te asoltan ahi. Hiti chun ama hon Ijon, Dan, Abel-beth-maacah chuleh Kinnereth pumpi leh Naphtali gam pumpi ana banjo gam tauvin ahi.
21 Israel Lengpa Baasha chun thilsoh ho chu ajahdoh phat in, Ramah khopi chu kulpi akaikhumna a kon chun akinungle in Tirzah langa achetan ahi.
22 Hichun Asa lengpa Judah gamsung a mijousen Baasha in Ramah aumkhum kulpi semna a amanchah thing le song ho chu lhoh mang dingin thu apen ahi. Asa in hiche ho chu Benjamin gamsunga um Giba khopi leh Mizpah khopi pal getkhumna in amang tan ahi.
23 Asa vaihomna sunga thilsoh ho leh athaneina dungjuiya anatoh le thilbol ho chuleh khopi ana tundoh min ho chu Judah Lengte Thusimbua kijihlutna Lekhabua chun aum'in ahi. Ateh langin akeng ahung natan ahi.
24 Asa athi phat in ama chu apu apate toh David khopiah anavui tauvin ahi.
Hijeh chun Asa chapa Jehosaphat chun leng mun ahin lotan ahi.
Nadab In Israel Gam Lengvai Apoh
25 Judah mite lah a Asa lengpan vai ahom akum ni channa in Jeroboam chapa Nadab chun Israel te lah a vai ana hom in ahi. Aman Israel te lah a kumni vai ahom in ahi.
26 Aman Pakai mitmu’n thilse jeng anabol’in, apa natoh nung ana juijin, Jeroboam in Israel te ana chonset sah chu ana chejompi in ahi.
27 Hijou chun, Issachar phunga konna Ahijah chapa Baasha chun Nadab chu tha ding ana gon, aman asepai te toh Gibbethon kiti Philistine khopia chu ana nokhum got laitah in ana that tan ahi.
28 Asa lengpan Judah mite lah a vai ana hopna kum thum channa in Baasha in Nadab ana that in Israel te leng in ana pangin ahi.
29 Aman Jeroboam chilhah te abonchan ana that gamin, leng insunga mite chu khatcha ana hinghoi pon ahi. Hiche hi Pakaijin Shiloh a Ahijah themgaopa mangcha a Jeroboam chung chang thu ana sei chu aguilhunna ahitai.
30 Hitobang thilsoh hi Jeroboam in Pakai Israel Pathen chu asuh lunghang jeh leh ama chonsetna chungchon na Israel mipite chu ana chonset sah jeh ahi.
31 Nadab in avaihom sunga thilsoh ho leh aman anatoh thil ho Israel Lengte Thusimbu a aum'in ahi.
Baasha In Israel Gam Lengvai Apoh
32 Judah lengpa Asa leh Israel lengpa Baasha kikah a kidouna anaum jingin ahi.
33 Judah gam’a Asa lengpan vai ahom kum thum channa in Ahijah chapa Baasha in Israel gam pumpia vai ana hom in ahi. Baasha in Tirzah a kum somni le li vai ana hom in ahi.
34 Ahin, aman Jeroboam chonna bangin Pakai mitmu’n thilse jeng ana bollin, Jeroboam in Israel te ana chonset sah chu aman jong ana chejom pin ahi.