19
Elijah Sinai Molsang Lam’a Ajam
1 Ahab chu a in agalhunin, Elijah thilbol ho jouse, Baal themgao ho athagam ho jong chu Jezebel aseipeh sohkei tan ahi.
2 Hichun Jezebel in Elijah chu hiti hin thu athot tan ahi, “Jing le tuphat tah a hi Baal themgao ho na thagam banga chu keiman jong nang katha ding ahi, katha lou pou-pouleh kadoi ho hin keima eithat jeng hen,” ati.
3 Chuin Elijah jong chu akicha lheh jengin, ahinkho kihuhdohna dingin ajamtan ahi. Judah khopi Beersheba langa chun achen hichea chun asohpa adalhan ahi.
4 Hijou chun ama achangseh in gamthip noiya nilhum keijin lam ajot in ahi. Ama Longlao phungnoi khat ah atouvin, athina dingin atao tan ahi. “Vo Pakai, ka khop lheh jeng tai, kahinkho hi lajeng tan ajeh chu kei jong kapu kapate sangin kaphajo dehpoi,” atin ahi.
5 Hiche Longlao phungnoi achun akumin a imu tan ahi. Ahinlah hitia chu agah imutlhah leh vantil khat in ahin tham in, hitin ahin seipeh in, “Thouvin lang an nen!” ati.
6 Elijah in jong aven ahileh alulhunna chun song el-lenglung chung'ah changlhah themkhat ana kisanggep in, Elijah chun changlhah chu anen twijong chu adonin alumkit tai.
7 Chujouvin Pakai vantil chu anivei channa in ahung kit in, Elijah chu ahin tham kit in, “Thoudoh inlang an nen, achuti louleh na kholjinna ding hi nang dinga hahsa val ding ahi,” ati.
8 Hichun ama athoudoh in, twi adonin hiche anneh husan chun nisomli le jan somli sungin lam ajot in Horeb molsang geijin achen ahi.
9 Hiche munna chun Elijah songko sung khatna alut in khovah geijin agehtan ahi.
Elijah Heng'a Pakaijin Thu Asei
Ahin Pakaijin thu ahin seijin, “Elijah hikom a chu ipi nabol ham?” ahinti.
10 Elijah in adonbut in, “Keima hatchungnung Pakai, Pathen kin kabolna a kalunglut behseh jengin ahi. Ahinlah Israel mipite hin namite toh nakitepnau hi asukeh un, na maicham ho asuchip un, na themgao te athat gam'un atha moh u keibou kaum tan, tun kei jengjong tha ding eigo tauvin ahi,” ati.
11 Hichun Pakaijin, “Kipatdoh inlang molsang chungvum akhun ka masang’a ga ding tan,” ati. Hitia chu Elijah aga din leh Pakai chun ahin hopan, huipi hattah chu ahung nungin molsang chu atat kha jengin ahi. Hiche huinun chu ahat behseh jengin, songpi ho chu ata leh achip lah-lah jengin ahinlah huilah a chun Pakai aumpon ahi. Huinun jou chun liing akihot in ahinlah liingkihona ah jong chun Pakai aum dehpon ahi.
12 Liing kiho jou chun mei ahung kong in ahinlah Pakai chu meikong lah a jong aumpon ahi. Hiche meikong chu akichai jouvin onem hiuheovin ahung ging in,
13 Elijah chun hichu ajah phat in, amai chu apon in akikhun, apotdoh in songko kom'a chun aga dingin ahi.
Ogin khat ahung ging in, “Elijah hikom mun a hi ipi bol nahim?” ati.
14 Aman adonbut in, “Keiman Pakai, Pathen hatchungnung kin kabol hi ka lunglut behseh jengin, ahinlah Israel mipite hin Pakai toh akitepnau asukeh un, na maicham asuchip un na themgao te jouse athat gam'un keima bou asohcha kahin tun kei jong eithat go tauvin ahi,” ati.
15 Hichun Pakaijin, “Nahung na lang ma-ma a nung chekit inlang Damascus gamthip noilang khu na galhun tengleh Aram te leng dingin Hazael khu thao ganu in,” ati.
16 “Hiche jouteng chuleh Israel te leng dingin Nimshi tupa Jehu khu thao nu in, chuleh nang khel’a ka themgao dingin Abel-meholah khopia kon'in Shaphat chapa Elisha khu thao nu in,
17 Hazael a konna jamdoh chu Jehu in atha ding Jehu a konna jamdoh chu Elisha in atha ding ahi,” ati.
18 “Tujengin jong Baal masanga kun khalou leh akam a jong chop khalouhel cheh adang jasagi Israel sungah kanei nalaije,” ati.
Pathen'in Elisha Akou
19 Hiti chun Elijah chu achen, Shaphat chapa Elisha chu aloukhoina aga mun ahi. Loulaiya chun bongchal to som le ni aumin, ahin Elisha chun som le ni channa chu mangchan lou ana khoijin ahi. Elijah chun aganailut in apon chu achunga aga seplhan achemang tai.
20 Elishan jong abongchal ading teni chu adalhan, Elijah nung adel in, “Amasan kanu le kapa availhah nan gabeng chop ingting nahin jui nang’e,” aga tin ahi.
Elijah in adonbut in, “Kinungle jengin, amavang ken kabol peh ipi ham gel in,” ati.
21 Hichun Elisha akinung le in bongchal chu athat in aloukhoina thing chu atih in bongchal chu ahonna in amang tan ahi. Aman khopi mite akhom khomin, sa chu anehsah sohkeijin ahi. Hiche jou chun Elijah nung chu ajuijin alhachan apang tan ahi.