20
Ben-Hadad In Samaria Abulu
1 Hiche phatlai sung hin, Aram lengpa Ben-Hadad in asepai te jouse akhomin chuleh leng somthum le nin asakol ho leh akangtalai jouse pumin apanhun, hiti hin Israel te khopi Samaria chu aum uvin gal in anokhum tauvin ahi.
2 Ben-Hadad in Israel lengpa Ahab hengah mi asol'in, “Hiche hi Ben-Hadad kiti pan kasei ahi:
3 'Na insunga na sana leh na dangka chuleh najite le nachate aphalai chengse chu keiya hidiu ahitai!'” agatisah tai.
4 Chunin Israel lengpan adonbut in, “Kapu lengpan nasei ho chu adih sohkeije kanei jouse hi nanga ahi!” ati.
5 Ben-Hadad in gangtah in adonbutna thu chu athot kit in, “Hiche hi Ben-Hadad keima thuthot ahi: 'Na sana leh na dangka chuleh naji na chate neipeh ding ahi tia, thu kapehsa nahitai.
6 Ahinlah, jing nikho tuphat tah leh, na leng inpi le navaipote in jouse khol’a thil manlua agel jouseu kilah dia kavaipote kahinsol ding ahi!'” agatisah kit in ahi.
7 Hiche jou chun Ahab in agamsung upa chingthei ho jouse akhomin, amaho kom'a chun, “Veuvin hiche pa hin eisuboi lheh jengun ahi! Aman akingeh bangin keiman ka sana leh ka dangka chuleh kaji ka chate chu kana phalpeh tan ahi,” ati.
8 Amipite leh upa chingthei ho chun, “Hiche kalval chun imacha phalpeh tahih in,” atipeh un ahi.
9 Hichun Ahab in Ben-Hadad sottolle ho kom'a chun, “Kapu lengpa kom'a chun hiti hin seipeh tauvin, amasa a nathil ngeh ho chu ka phalpeh jeng e, ahinlah tua achaina a nathil ngeh ho vang hi kasang theipoi,” ati. Hiti chun sottole ho chun hiche thu chu apo uvin Ben-Hadad hengah akile tauvin ahi.
10 Hichun Ben-Hadad in Ahab chu hiti hin thu athot kit e: “Keiman na khopi Samaria hi vogoihel’a ahalsi sia khut a choidoh kham mihem kahin puilut ding ka suhmang ding ahi. Hichu kaboldoh lou le ka hou pathen ten eithat jeng hen,” ati.
11 Israel lengpa Ahab in ahin donbut in: “Galmun’a galsat dia sepai khat in achemjam akipoh nung’a, galsat chaisa ho ham hoithoa thucheng chu bol ngai ahipoi, tin seipeh un,” ati.
12 Ben-Hadad leh apanpi leng dang ho toh, ponbuh sunga ju ana donlai tah un, Ahab donbutna thucheng chu aja tauvin ahi. Hichun Ben-Hadad chun asepai te kom’ah galsat din kigo uvin tin thu apetan ahi. Hijeh chun khopi chu nokhum dingin akigo tauvin ahi.
Ahab In Ben-Hadad Galjona Anei
13 Hiche kahlah chun, themgao khat Israel lengpa Ahab kimupi din achen, “Pakaijin hiti hin thu aseiye, ‘Hiche galmi hon tamtah hokhu numu am? Tunia amaho khu nangma khutna ka pehdoh ding chule galjona nanei ding ahi. Hiteng chuleh nangman keima hi Pakai kitipa chu kahi nei hetdoh ding ahi,” ati.
14 Hichun Ahab in, “Ipiti ahinbol ding ham?” tin adongin ahi.
Chuin themgaopa chun ahin donbut in, “Hiche hi Pakaijin asei ahi: Gamkai vaipo hon abol dingu ahi,” ati.
“Keihon ka nokhum masat diu ham?” tin Ahab in adong'e.
Themgao pan, “Henge,” ati.
15 Hichun Ahab in gamkai vaipo ho chu asimtoh leh, mi 232 ahiuvin ahi. Chujouvin Israel sepai jouse chu asimtoh leh 7,000 alhing in ahi.
16 Sunkim dontah chun, Ben-Hadad leh akiloipi leng somthum le ni ho chun aponbuh sung uvah ju ana don khom’un ahi.
17 Hichun gamkai lamkaiho chu khopi sunga kon chun ahung kitoldoh masapen un ahileh,
Ben-Hadad sepai ho chun akom'ah, “Samaria a kon'in sepai phabep ahung kitol doh uve,” atin atiuvin ahi.
18 Ben-Hadad in, “Amaho chu chamna a hung hiu hen lang, galsat dinga hung hijongleu ahingin man pou-pouvun,” ati.
19 Ahinlah sepai te apumpi ahin, gamkai lamkaiho ahin, abon’un galsat dingin ahung kondoh tauvin ahi.
20 Israel sepai te chun Aram sepai akimaitopi cheh u athat un ahile, Aram sepaiho chu atiu ajan, ajammang gam tauvin ahi. Hichun Israel ten anungdel’un ahileh Ben-Hadad lengpa leh sakol kangtalaiya touthem phabep chu ana jamdoh man’un ahi.
21 Ahiyeng vang'in, Israel lengpa chun Aram mite sakol dang ho leh sakol kangtalai ho chu ana ban suhmang peh tan ahi.
22 Phat chomkhat jouvin themgaopa chun, Ahab Lengpa kom'ah, “Na hung nokhum kit diu ahin kigingphan, Aram lengpa chun khovei chavang phatleh hung kit ding ahi hijeh chun thil ho kigontoh in,” ati.
Ben-Hadad In Anivei Channa Ahung Bulu
23 Agallel jou nungin, agal lamkai hon Ben-Hadad jah a, “Israel te Pathen hi thinglhang gam Pathen ahiuve, hijeh a chu thinglhanga eijou ahi. Phaicham a kisatpi leuhen bailamtah a gal ijo jeng diu ahi.
24 Hiche chung’a bou hin leng ho athunei nauva kon'in haisah inlang, akhel in sepai lamkai ho pansah in!
25 Sepai alhasam jat hi subulhing kit in, sepai te sakol leh kangtalai te atil'a jat maman subulhing kit in, chutengleh phaicham ah kisatpi leuveng kajo tei diu ahi,” atiuve. Hiti chun Ben-Hadad in jong angaichat bang’un abolpeh soh tan ahi.
26 A kumkit chavang lai ahiphat in, Aram sepai te asemtoh sohkeijin Israel te kisatpi dingin tuchung hin Aphek lang ajon tauvin ahi.
27 Isrtael te jong akisemtoh un, neh leh chah jong hoitah in akigontoh un, galsat dingin ahung kitol tauvin ahi. Ahinlah Israel sepai te alhomdan uchu, kelcha hon lhomcha ni kijot a toh abangun ahi. Aram sepai te vang chu gamsung pumpi adim lha jengun ahi.
28 Hichun Pathen mipa chun Israel lengpa kom’ah achen, “Pakaijin hiti hin aseiye, Aram sepai ten hiti hin aseiyun ahi, a Pakai u khu thinglhang pathen ahin, phaicham pathen ahipoi. Hijeh chun hiche sepai tamtah tehi kajopeh diu ahi, chutengleh nang hon Pakai kahi chu nei hetdoh diu ahi,” ati.
29 Hiche galmi teni hin nisagi sungin kimai ngat ton ngahmun akisem’un, anaum un ahi. Nisagi lhinnin akisatto pan tauvin ahi. Israel ten nikhat sungin Aram keng sepai ho chu 100,000 ana that un ahi.
30 Adangse chu Aphek khopi sung’ah ajamlut un ahi, ahin akulpi pal’u chun ahin chimkhum un ahile, mi 27,000 jen athiuvin ahi. Ben-Hadad chu khopi sung’a ajamlut in, indan sungnung khat ah akisel tan ahi.
31 Ben-Hadad sepai lamkai hon akom’ah, “Pu, Israel lengte hi mikhoto athem un ahi, hijeh chun eihon khaodip pon itaibuh uva kiveiju hitin, iluchang uva khaohol kiveiju hitin chutengleh Israel lengpa henga chun, galut jeng tem uhite, ajeh chu ama khun na hinghoi jeng maithei ahi,” atiuve.
32 Hijeh chun ama hon ataibuh dung uva khaodip pon akiveijun, aluchung uva khaohol akikhu uvin, Israel lengpa henga chun acheuvin, “Nasohpa Ben-Hadad chun aseijin, 'Lungset tah in nei hinghoi tei-teijin!” atiuve.
Hichun Ahab chun adongin, “Ben-Hadad chu hing nalai ham? Ama chu ka sopipa ahi bouve!” ati tai.
33 Ben-Hadad sepai ten Ahab in asei chu thilpha ahi tin akilah un, gangtah in, “Henge, na sopipa Ben-Hadad ahi!” atiuve.
Ahab in amaho jah a chun, “Cheuvin lang, hin puidoh un,” ati. Chuin Ben-Hadad ahunglhun phat in, Ahab in akangtalai chung’ah akaldoh sah in ahi.
34 Hichun Ben-Hadad in Ahab jah a, “Kapan napa a konna ana lahpeh khopi ho jouse chu abonchan keiman nangma nalekit tang’e, chule nangman kapa in Samaria khopi sung’a abolna bang bangin nangin jong, Damascus khopi sunga kailhang tampi na semdoh thei ahi,” ati.
Chuin Ahab in, “Hitobang ding chun kenjong nangma nalha tang’e,” atin ahi. Hiti chun Ahab in Ben-Hadad chutoh kitepna asem tan, ama jong alhadoh tai.
Themgaopan Ahab Apho
35 Pakaijin themgao hon lah a mikhat chu midang khat kom’ah thu aseisah in, “Neivo in,” ati. Ahin mipa chun themngaopa sat ding chun anompoi.
36 Hichun themgaopan ama kom'ah, “Pakai thupeh nanit loujeh a, keima nei dalhah lhah tengleh keipi-bahkai jin natha ding ahitai,” ati. Hiti chun adalhah leh keipi-bahkai khat in athat tan ahi.
37 Hijou chun themgaopa chun midang khat kom'ah, “Neivo in!” ati. Hichun themgaopa chu avo'n amavo tan ahi.
38 Hichun Themgaopan ponin mai akitom in, limput akhel’in, Israel lengpa hungna ding lampia ana ngah tan ahi.
39 Lengpan ahung phat in themgaopan ahin kouvin, “Pu, keima gal kiha satna laitah a chun kana jaovin, phulou helouvin mikhat in gal hing khat ahinkai jin, 'Amapa hi phaten ana chingtup in, itiham khatna na lhaso a ahileh nathi ding ahilouleh dangka talent khat na leu ding ahi, ahung ti.'
40 Ahinlah keima thil khat bolla kakisahlel laitah in, ama chu ana jamdoh tan ahi,” ati.
Hichun lengpan, “Achutileh nangma thepmo hichula, nangman na chunga thutanna nakiloilut ahitai,” tin adonbut in ahi.
41 Hichun themgaopa chun amit kitom chu ahin ladoh in ahileh lengpan themgao ho lah a khat ahi tichu ahedoh tan ahi.
42 Chuin themgaopa chun, “Pakaijin hiti hin aseiye, keiman na suhmang ding ahi kati pa chu nalhaso jeh in tua hi nangma amakhel’a nathi ding ahitai chuleh ama mite khel’a nangma mite thi diu ahitai,” ati.
43 Hichun Israel lengpa chu lunghang tah leh maithim ketkut in a inlam ajon tan ahi.