21
Naboth Lengpilei
1 Jezreel a kon'in Naboth kiti mikhat anaum in, ama hin Samaria lengpa Ahab leng inpi toh kinaicha in, Jezreel mun a chun lengpilei khat ana neijin ahi.
2 Nikhat hi Ahab in Naboth kom'ah, “Na lengpilei hi ka leng inpi toh akinai jeh in, hon a kanei dingin nei kichoh sah tan, akhel in hiche sang’a lengpilei phajo nape ingting ahilou le na deijoh leh aman dingin sum joh pelhon nang’e,” atipeh in ahi.
3 Ahin Naboth in adonbut in, “Kapu kapa khang’a pat a kagou chin khat chu nang ka pehdoh jeng ding vang chu Pakai jahnom lou himai hen,” atipeh in ahi.
4 Hiche Naboth donbutna chun Ahab chu alunghan sah lheh jengin, lung nommo tah in a inlang’a achetan ahi. Lengpa chun an jong ane nom tapon, bang lang angan alum tan ahi.
5 Ajinu Jezebel chun, “Ipi nati ham? Ipi dinga lung nommo tah a anne louva naum jeng ham?” tin adongin ahi.
6 Ahab in, “Naboth kom'ah na lengpilei nei kichohsah in ahilouleh akhel nape nang’e, kati leh anom pon ahi,” ati.
7 Jezebel in, “Nangma hi Israel te lengpa nahi hilou ham? Thoudoh inlang an nen, hiche chungthua chun lungkham tahih in, keiman Naboth lengpilei chu nape nang’e,” atin ahi.
8 Hichun Jezebel in Ahab khel in ama min'in lekha ajih in mohor anam khum in hichun khopi sunga lamkai ho leh upaho kom'a chun lekha athot in ahi.
9 Lekha achun hitin anajih e: “Mipiho chu an-ngol a tao dingin koukhom unlang, Naboth chu mun thupia tousah un.
10 Chuleh pannabei mini akom'a tousah unlang, amani chun lengpa le Pathen ataitom’e tin themmo chan uhen. Chujou teng kaidoh unlang songin seplih un,” ati.
11 Hiti chun khopi sunga upaho leh lamkai ho chun Jezebel lekha a kijih thupeh dungjui chun abol tauvin ahi.
12 Ama hon anngol ding asom’un, Naboth chu mipi masanga thupitah in atousah un ahi.
13 Hijou chun pannabei mini chu amasanga atousah un, Naboth chu mipi masanga themmo achan lhon'in, “Ama hin Pathen leh lengpa asamsen ahi,” ati lhon'in ahi. Hijeh chun ama chu khopi polanga akaidoh un songin aseplih tauvin ahi.
14 Khopi lamkai ho chun Jezebel kom'ah thu athot un, “Naboth chu akiseplih tai,” atiuvin ahi.
15 Chuin Jezebel in hiche thu chu ajah phat in, Ahab jah ah, “Naboth lengpilei nang kom’a ana joh nomlou chu nahet em? Ven ama athi tai, alengpilei khu na kilah thei ahitai,” ati.
16 Hichun Ahab jong gangtah in achesuh in Naboth lengpilei chu aga kichan tan ahi.
17 Ahin Pakaijin Elijah kom'ah thu ahin seitan ahi.
18 “Samaria a vaihompa Israel lengpa Ahab khu gakimupi dingin chesuh tan, ama chu Jezreel munna Naboth lengpi leiya ama dinga akichan pettah nato ding ahi,” ati.
19 Hiche thu hi ahengah aseipeh in, “Pakaijin hitin aseiye, Naboth natha chu pha khopset lou ham? Hitia pihi anei agou nachom kit nalaiset ding ham? Hitia hi thil nabol jeh in, uicha ten Naboth thisan ale na’u mun a chu nang thisan jong ale diu ahi,” agatisah tai.
20 Hichun Ahab chu Elijah kom'ah apeng jah jengin, “Tua hi kamelma pan, neihung mudoh kit hitam?” atileh, Elijah in adonbut in, “Henge, nangman Pakai mitmu a thilse jeng bolna a nakipeh jing jeh a kahung kit ahitai,” ati.
21 Hijeh chun tun Pakaijin hitin aseiye, 'Nangma na vallhum jeng thei manthahna kahin lhun khum sah ding, nangma chilhah te pasal ho chuleh nasohho chujongleh soh hilou ho jong Israel gamsung hoilai mun hijongleh ka suhmang ding ahi.
22 Keiman Ahijah chapa Baasha insung mite le Nebat chapa Jeroboam insung mite ka suhmang hel banga, nangma insung mite jong ka suhmang ding ahitai. Ajeh chu nangman keima nei sulunghang behseh jengin chuleh nangin Israel tehi na chonset sah tan ahi,' ati
23 Chuleh Jezebel chung chang ahin, Pakaijin hitin aseiye, ‘Jezreel mun’a gam behkhat chunga Jezebel tahsa chu uichan aneh ding ahi,' ati.
24 “Ahab insung mite jouse hiche khopi sunga thiho jouse jong chu uicha hon aneh dingu chuleh gamlah a thiho jouse chu muthong hon aneh diu ahi,” ati.
25 (Ajinu Jezebel in athunun jeh a Ahab in Pakai mitmua thilse bolna a akipehlut banga kipehlut a koimacha dang aumpon ahi.
26 Athil bolset nasapen chu, milim doi Amor miten ahou bang uva ahou chu ahipen’e. Amaho hi Israel te lhun masanga Pakaijin ana deldoh masat nam mite chu ahiuve.)
27 Hiche thupeh hi Ahab in ajah phat in, apon abottel in, khaodip pon akisil in, an angol in lunghem tah in khaodip pon chung'ah alum in ahi.
28 Hichun Pakaiya kon’a thupeh Elijah kom’a ahunglhung kit in,
29 “Ahab khu keima masanga ichan geiya ama le ama kisunem’a hitam ti namu em? Ama hichan geija aki suhnem tah jeh in, keiman ka bolgot chu ama damsung in bol taponge, achate cheng leh achilhah chunga bou kabol ding, alenggam ka suhmang ding ahitai,” ati.