22
Jehoshaphat Le Ahab
1 Kum thum sungin Israel leh Aram mite kikah ah gal ana umpon ahi.
2 Hiche jou kum thum lhinin, Judah lengpa Jehoshaphat in Israel lengpa Ahab chu agavil in ahi.
3 Aman avil sung hin Israel lengpan asepai te kom'ah, “Nanghon Ramoth-gilead khopi hi eihoa ahi nahet uvem? Ahinla eihon hiche khopi hi Aram lengpa khut a konna nunglah dohna dingin imacha inabol pouvin ahi,” ati.
4 Chuin aman Jehoshaphat lang chu angan, “Nangin Ramoth-gilead nung lahdohna dinga galsatna a hi nei panhu nomlou ham?” atin ahile,
Jehoshaphat in Israel lengpa chu adonbut in, “Ibol a ka panhu da ding ham, nang le kei thakhat ihi chula em, ka sepai te jong na sepai ahin ka sakol ho jong na sakol ahi,” ati.
5 Jehoshaphat in, “Ahinla Pakajin ipi asei jem veuhite” tin aseibe kit in ahi.
6 Hichun Israel te lengpan themgao jali ho chu akouvin amaho kom'a chun, “Ramoth-gilead douna gal kakon ding ham ahilouleh kakon louding ham?” tin ana dongin ahi.
Ama hon abon uvin adonbut un, “Aphai, kondoh jengin, Pakaijin galjona napeh ding ahi,” atiuve.
7 Ahinlah Jehoshaphat in, “Hiche mun'a hi hitobang thudoh ma-ma hijongleh idoh thei diu themgao adang umlou ham,” atin ahi.
8 Israel lengpan Jehoshaphat jah a, “Hitobanga Pakai kom'a eidohpeh thei diu kahet mikhat aum nalaiye, ahinlah ama hin kei dingin thil phalou ngen aseijin ahi. Ama chu Imlah chapa Micaiah ahi,” tin ana donbut in ahi.
Jehoshaphat in adonbut in, “Leng khat in hitia chu thu asei ngai ahipoi! Aman ipi asei em ngaiju hite,” ati.
9 Hijeh chun Israel lengpan asepaiho khat chu akouvin, “Imlah chapa Micaiah chu gapui loijin,” ati.
Micaiah In Ahab Dounaa Gaothu Asei
10 Israel lengpa Ahab leh Judah lengpa Jehoshaphat chu leng vonin akivon lhon'in, Samaria khopi kelkot kom changvohna phol munna chun laltouna akido lhon'in atou lhon'in ahi. Ahab themgaoho chun amani masanga chun gaothu aphong-phong jengun ahi.
11 Amaho lah a khatpen Kenaanah chapa Zedekiah kitipa chun, thih saki lim in asemin hiti hin asamphong in, “Hiti hin Pakaijin aseiye: Hiche thih saki a hi Aram mite na sutlih ding ahi!” ati.
12 Themgao dang ho jong athusei chu anom un, hitin aseikit uve, “Ramoth-gilead a chun kaltou unlang gal gajouvun, ajeh chu Pakaijin lengpa chu galjona apeh ding ahi!” atiuve.
13 Alangkhat ah, Micaiah kom'a che asottolpa chun ajah a, “Ven, themgao dang ho jousen lengpa kom'a chun galjona ding ngen aseipeh un, nangin jong amaho bangin galjona ding seipeh in,” ati.
14 Ahinlah Micaiah in adonbut in, “Hingjing Pakai min’a kasei ahi, Pakaijin seijin ati bou kasei ding ahi,” atipeh in ahi.
15 Micaiah themgao chu lengpa kom alhun phat in, Ahab in jong ajah a, “Micaiah, Ramoth-gilead douna a kache diu ham ahilouleh ka chelou diu ham?” atileh
Micaiah in jong jonkap tah in, “Aphai, chetouvun lang gajouvun, Pakaijin lengpa galjona nape naveh ta!” ati peh in ahi.
16 Ahin lengpan gangtah in adonbut in, “Pakai thalhenga kakom'a thu nasei tengleh thudih bou seijin tia ijatvei ka ngeh hitam?” atin ahi.
17 Hichun Micaiah in, “Keiman gaovin thil khat kamu e, Israel te molchunga kelngoi achingbei tobanga akithe cheh kamun ahi, chule Pakaijin a pakai pau akithat ahitai, tun amaho chu lungmong in sol tauvin,” ati.
18 Israel lengpan Jehoshaphat jah a asaptho jengin, “Ka seipehsa hilou ham? Ama hin, kakom'ah thilse tilou thilpha eiseipeh khapon ahi,” ati.
19 Hichun Micaiah in aseiben, “Ngaijun Pakaijin aseiye! Pakai chu avan sepaiho chengin ajet avei’ah aumkim vellun Ama alaltouna a atouve,” ati.
20 Pakaijin, ‘Ahab hi athina dinga Ramoth-gilead douna a galkon ding’a koipen atildoh dinga che ding ham? atile, hichea chun
lunggel tamtah aseikhom uvin,
21 achaina in, lhagao khat in, Pakai kom'a chun keiman choudoh ing kate, ati.
22 “Pakaijin i-nalo got ham?” atile,
“Lhagao chun adonbut nin keima che ingting Ahab themgao ho thujou asei diuvin gatil doh ing kate” ati.
Hichun Pakaijin na lolhin ding ahi chenlang gabol tan,” ati.
23 “Tun vetan Pakaijin na themgao ho kom'a thujou aseisah ahitai, ajeh chu Pakaijin na manthahna dinga aphondoh joh ahi,” atipeh tai.
24 Hichun Kenaanah chapa Zedekiah chun Micaiah chu ajonin angeiphe abehpeh in ahi. “Hoiya patna chu Pakaijin keima eidalhah a, nang kom'a bou thu asei jeng ham?” ati.
25 Micaiah in adonbut in, “Nangma na insung dan sung khat a aguh a kisel’a nache tengleh hedoh tan nate,” ati.
26 Chuin Ahab lengpan, “Ama chu man unlang khopi gamvaipo Amon kom leh ka chapa Joash kom'a puilut un,” tin thu apen ahi.
27 Keima damsel'a kahung kilekit kahsen songkul’a ana hen unlang aneh dingin changlhah leh twi bou anape un, tin seipeh un,” ati.
28 Hichun Micaiah in adonbut in, “Nangma damsel'a nahung kile pou-pou leh Pakaijin keima eimanchah lou hi ding ahi,” ati. Aban aseibe kit in, “Mijousen ka thusei hi melchih un!” ati.
Ahab Thi
29 Hichun Israel lengpa Ahab leh Judah lengpa Jehoshaphat teni chu asepai jouse toh Ramoth-gilead sat dingin akon lhon tan ahi.
30 Israel lengpa chun Jehoshaphat jah a, “Hitia hi gal mun’a ilut tengu leh koiman eihetdoh louna dingin kahina khel ing kate, nangin vang na leng von chu kivon tan,” ati. Hiti chun Israel lengpan ahina akhel in galmun’a alut tauve.
31 Alang khatna Aram lengpan sakol kangtalai touthem lamkai somthum le ni ho jah a chun, “Israel lengpa bou chu nokhum un adang ho chu limsah hih un!” ati.
32 Hiti chun Aram sakol kangtalai touthem ho chun aleng vonna kivon Jehoshaphat chu adelkhum go tauvin ahi. Ama hon, “Hiche khu Israel te lengpa ahi,” tin ahin sam’un ahi. Ahinlah Jehoshaphat chu ahung penjah phat in,
33 Sakol kangtalai touthem lamkai ho chun Israel lengpa ahilou ahetdoh phat un adel tapouvin ahi.
34 Ahin Aram sepai khat in Israel sepai te lah a chu agah moh donkap leh Israel lengpa chu a ompho kikah a chun thal chu alut kha tan ahileh Ahab chun asakol kangtalai tolpa kom'a chun, “Sakol chu nungtol inlang, hichea kon hin nei toldoh tan,” ati.
35 Nilhum keijin gal chu akisat in, lengpa chu Aram mite lang angan sakol kangtalai chunga chun aki jamin ahi. Athisan chu amaha akon chun tol ah avalhan nilhah langin athi tan ahi.
36 Nisa chu ahung lhum phat in sepaiho lah a chun, “Gal ilel tauve, na kihinso theina ding cheh un jam tauvin,” tin ahung kisam tan ahi.
37 Hiti chun lengpa athi tan atahsa chu Samaria a ahin polut un avui tauvin ahi.
38 Hijou chun asakol kangtalai chu Samaria twikul pang ah asop theng un ahi. Pakaijin ana teppeh bang chun numei kijohho kisilna munna chun athisan chu uicha hon ahung lehgim un ahi.
39 Ahab vaihom sunga thilsoh ho leh aman ana tohdoh ho, saiha a asahdoh leng inpi ahin khopi ana tundoh ho ahin abonchan Israel Lengte Thusimbu a chun aki jihlut in ahi.
40 Hiti chun Ahab chu athitan ahileh achapa Ahaziah chun lengmun ahin lotan ahi.
Jehoshaphat In Judah Gam Lengvai Apoh
41 Ahab lengpan Israel mite lah a vai anahop kumli lhinin, Asa chapa Jehoshaphat in Judah mite lah a vai anahom pantan ahi.
42 Jehoshaphat leng ahungchan chun kum somthum le nga ana lhing tan ahi. Hiti chun aman Jerusalem'ah kum somni le nga vai ana hom’in ahi. Anu chu Shilhi chanu Azubah ahi.
43 Jehoshaphat chu leng phatah anahi. Ama hin apa Asa phatna hinkho ho chu anung ana juijin ahi. Aman Pathen mitmu’n thilpha jong anabol in ahi. Ama vaihom sungin kithoina doiphung ho chu ana suhtheng sahpon ahi. Hijeh chun mipi ho chun kithoina gantha anabol nalaiyun chuleh gimnamtui jong ana lhutnam jingun ahi.
44 Jehoshaphat chun Israel lengpa toh kichamna ana semin ahi.
45 Jehoshaphat vaihom sunga thilsoh ho leh a thaneina ho chuleh agalsatna ho jouse Judah Lengte Thusimbu a aum sohkeijin ahi.
46 Apa Asa khanglaiya jong ana chejom peh pasal le numei kijoh anaum nalai chengse chu gamsunga kon'in ana ban suhmang in ahi.
47 (Hichelai khang chun Edom gam'a leng ana umpoi.)
48 Jehoshaphat in Ophir munna sana podingin kiveina kong innei honkhat ana semdoh in ahi. Ahinlah hiche kong innei ho chun agamsung kongkai mun’ah tosetna anato jeh un ana kitol masa pouvin ahi.
49 Khatvei chu Ahab chapa Ahaziah chun Jehoshaphat kom'ah, “Keima mite leh nangma mite hon kong tolkhom uhen,” ana tin ahileh Jehoshaphat ana nom pon ahi.
50 Jehoshaphat chu athi phat in David khopi a apu apate toh anavui khom un ahi.
Ahaziah In Israel Gam Lengvai Apoh
51 Judah lengpa Jehoshaphat in vai ana homna kum som le sagi lhinin, Ahab chapa Ahaziah in Israel te lah a vai ana hom panin ahi. Aman Samaria mun'ah kumni vai ana hom in ahi.
52 Aman Pakai mitmu in thilse jong ana bollin ahi. Aman hichu anu le apa chonchan phalou tah ana jui ahin, chuleh Israel te ana chonset sah Jeroboam chondan hoilou tah chu ana jui ahi.
53 Aman Baal milim doi ana houvin, apa bangin Pakai Israel Pathen chu ana chou lunghang in ahi.