10
Jehu’n Ahab Insung Mite Jouse Asuhgam
1 Ahab in chapa somsagi aneijin amaho chu Samaria khopi sunga achengun ahi. Hichun Jehu in Samaria khopi sunga upaho le lamkai pipu hokom leh Ahab chate chingtup ho kom'ah lekha anathot in hitin aseije,
2 “Leng chate chu nakom uvah aum’in, chule sakol kangtalai ho leh sakol ho chujongleh kul kigetkhum khopi le manchah ho jong nangho khutna aum’in ahi. Hiche lekha hi namu phat-phat uleh,
3 napu chapa te lah a chun alolhing pentah khat na lengpa diuvin lhengdoh uvin lang chutengleh, Ahab son le pahte huhna a galsat dingin ana kigongun,” atin ahi.
4 Ahinlah amaho kichatna adim jeng tauvin, “Hiche pa masanga hin lengni ana ding joupoi ti eihon iheuvin ahi! Achutia ahileh eihon ipi ibol thei diu ham?” akitiuvin ahi.
5 Hijeh chun, leng inpi leh khopi sunga vaihom ho leh upaho, chuleh lengpa chapa te vesuiya panghon Jehu kom’ah hitin lekha ana thot un ahi: “Keiho hi nasohte kahiuvin nangin bollin nati tichu bolding kahiuve. Keihon leng dingin koima lheng pouvinge. Ipi hijongleh nangin aphapen dia nagel chu bol jengin,” atiuvin ahi.
6 Jehu’n ani channa in adonbutna lekha athotnin: “Nangho kei langa napan uva, kathu nangai diu leh napupau chapa te luchangho chu Jezreel mun’ah jing tuphat donleh hinpouvin,” atin ahi. Hiche leng chapa te somsagi ho hi aneolai uva patna Samaria lamkai ho hin kahin khoukhah u ahi
7 Hiche lekha chu ahung lhun phat in leng chapa te somsagi ho chu lamkai hon athat tauvin ahi. Ama hon aluchangu chu pocha sunga aheng’un, Jezreel munna Jehu kom’a chun ahin pelut tauvin ahi.
8 Sottole ho lah a khat chu, “Leng chapa te luchang chu ahinpo tauve,” tin Jehu kom'a ahung seitauve. Jehu’n thu apen, “Lhuhni in se uvin lang khopi lutna kelkot achun koi unlang jingkah hunglhun tokah in hilaiya chun dalha tauvin,” ati.
9 Ajing nikho jingkah in ama apotdoh in avel'a hung kikhom mipi ho lah a chun ahoulim in, aman amaho kom’a chun, “Nangho koima chan thepmona nanei pouve, kapupa douna a thil gong le athat a chu keima kahi. Ahinlah amaho cheng hi koitha hija ham?,” atin ahi.
10 “Pakaijin Ahab insung mite chung chang ana phondoh ho chu guilhung tei ding ahi ti nang hon naheuve. Pakaijin asohpa Elijah mangcha a hiche thilsoh ding hi ana phondohsa ahitai,” ati.
11 Hijou chun Jehu in Jezreel sunga cheng Ahab insung mite jouse, anoija natong lamkai pipuiho jouse, aman ana kigolngaipi leh athempu ho jouse athatgam sohkei tan ahi. Hiti chun Ahab kitipa hi ason apah khatcha ahingah aum tapon ahi.
12 Hiche jou hin Jehu chun Samaria lang ana jontan ahi. Aman akalsonna ah kelngoi chingho Beth-eked munnah,
13 Judah lengpa Ahaziah insung mite toh akimuto uvin, aman, “Koi nahiuvem?” tin adongin ahi.
Ama adonbut un, “Keiho hi Leng Ahaziah sopi te ho kahiuve. Ahab Lengpa chapa te ho leh lengpa anu chapa te ho villa kahungu ahi,” atiuve.
14 Hichun Jehu’n asepai te kom’a chun asam'in, “Ahingin man'un!” ati. Chuin ama hon mi somli le ni chu aman'un Beth-eked twikul munna chun athatgam tauve. Khatcha jong ana hinghoi pouvin ahi.
15 Jehu in hilai mun chu adalhah phat in, Recab chapa Jehonadab chun ahung kimupin ahi. Amani akichibai jou lhon'in Jehu in akom’ah, “Keima nang kom’a kakitah banga nang jong kei kom’a nakitah hinam?” tin adongin ahi.
Jehonadab in jong, “Kakitahnai,” tin adonbut e.
“Chuti ahileh nakhut neihin pen,” ati. Hijeh chun Jehonabab in jong akhut ahinpen ahileh Jehu in jong asakol kangtalai chungah agah kaidoh in ahi.
16 Jehu in akom’a aseijin, “Tun hungin Pakaiya katomngaina hung vetan,” ati. Hiti chun Jehonadab toh akilhon khom tan ahi.
17 Jehu Samaria agalhun phat in, Ahab insungmi amoh anaum nalai ho chu Pakaijin Elijah themgao mangcha’a ana kitepna dungjuijin abonchan athat sohkeijin ahi.
Jehu In Baal Thempuho Atha
18 Hijou chun khopi sunga mipi ho jouse chu akou khom’in ajah uvah, “Ahab in Baal doi ana hou chutoh keiman kahou dan imacha tekah thei ahipoi!
19 Hijeh chun, Baal doi hou ho leh thempuho chuleh themgaoho akoukhom sohkeiyun ahi. Baal hou jouse chu hungsoh nauvem veuvin, ajeh chu keiman Baal anga kilhaina lentah kabol ding ahi. Koihileh ahunglou chu thi ding ahi,” ati. Ahinlah Jehu chun Baal doi houho jouse suhmangna dinga duha thuhtah agonjoh ahi.
20 Hichun Jehu'n, “Baal doi houna dingin mipi kikhopna thupitah gong’un!” tin thupeh aneijin ahi. Chuti chun amahon abol'ui.
21 Aman Israel te chenna gam pumpia Baal houho gakoukhom dingin mi asol'in ahi. Hijeh chun Baal doi hou ho jong akidalha khatcha jong um louvin ahung sohkeiyun ahi. Hiti chun Baal doi houna hou-in chu alodim sohhel jengun ahi.
22 Jehu in vonchol vesuipa jah a chun, “Baal doi houva hung jousen hiche vonchol hi khatjoh joh akivon diu ahi,” ati. Hijeh chun vonchol chu apetauvin ahi.
23 Hijou chun Jehu chu Recab chapa Jehonadab chutoh Baal doi houna in a chun alut lhon tan ahi. Jehu in Baal doi hou ho kom’a chun, “Hiche munna hi Baal doi houho bou um ding ahi, ahinla Pakai houho vang naum sah louhel diu ahi,” ati.
24 Hiti chun amaho chu kithoina gantha ding leh hal namna bol dingin hou-in sunga chun adimset jeng tauvin ahi. Jehu'n amite somget ho chu phatah in ahilchah in inpolang’a chun aumsah tan ahi. Chuin Jehu in ajah uvah, “Ama ho hi khat nalhasou jongleh na hinkhou kila ding ahi,” atipeh tauvin ahi.
25 Jehu in kilhaina gantha leh halnam chu achaiphat in ama noija lamkai ho leh sepaiho chu thu apepaijin, “Lut unlang abonchauvin thatgam tauvin khatcha jamdoh sah hih un,” ati. Hichun amaho jong alut un, achemjam’un athat gam tauvin ahi. Lamkai ho leh sepaiho chun atahsa uchu polang’a ahin kaidoh un ahi. Hiche jou chun Jehu mite chu hou-in sungnungpen achun alut un ahi.
26 Ama hon Baal doi ahounau adoikhomho jouse jong ahin pudoh un ahal lha tauvin ahi.
27 Ama hon ahin putdoh u Baal houna doikhomho jouse jong chu avochip un Baal hou-in jong avolhu uvin mipi ehbuh in amang’un tuni geijin akimang nalaijin ahi.
28 Hiti hin Jehu in Israel te lah a kon'in Baal doi kihouna jouse chu ana subeijin ahi.
29 Ahinlah aman Bethel leh Daan a konna Nebat chapa Jeroboam in Israel mite chonsetna a ana puilut sana a kisem bongnou lim houna chu ana sumang tapon ahi.
30 Ahijeng vangin Pakaijin Jehu kom’ah, “Ka thupeh nanit a Ahab insung na suhmang jeh in nabol phalheh jenge. Hijeh chun na chilhah ten khangli geija lengmun ahinlo diu ahi,” atipeh tai.
31 Ahinlah Jehu'n Pakai Israel Pathen danthu chu alungthim pumpin ana nitpon ahi. Jeroboam in Israel te ana chonset sahna a kon'in kilehei sah ding ana gopon ahi.
Jehu Thi
32 Hiche phat laitah chun Pakaijin Israel lenggam chu ana lhekeh pantan ahi. Hazael lengpan hiche gam chu mun phabep ana gal in ana kilah tan
33 agam lahho chu solam Jordan apat Gilead, Gad, Reuben leh Manasseh gam pumpi ahop’in ahi. Aman Aroer khopi a patnin Arnon phaicham akon’in sahlang gamkaija Gilead leh Bashan chan gei ana lan ahi.
34 Hiche banna Jehu vaihom sunga thilsoh ho jouse, athibol ho leh atohdoh ho jouse chu Israel Lengte Thusimbu a akijihlut sohkeijin ahi.
35 Jehu athi phat in, Samaria khopiah avuijun ahi. Ama jou chun achapa Jeho-ahaz chu leng ahung chang tan ahi.
36 Jehu hin Samaria a kon'in Israel chunga chun kum somni le get vai anahom in ahi.