11
Athaliah Lengnu In Judah Chung’a Vai Ahop
1 Judah lengpa Ahaziah nu Athaliah chun, achapa thi ahetdoh phat in, aman leng insung mite jouse chu suhmanghel ding ana gotan ahi.
2 Ahinlah Ahaziah sopinu Jehosheba, Jehoram lengpa chanu chun Ahaziah chapa Joash chu chapang cha ana hinalaijin, leng insung mite jouse thagam ding thu ajahdoh phat in Joash chu ana guhdoh a ahin sintounu chutoh alupna insung dan sunga chun ana sellin, Athaliah khutthah a kon chun ana huhdoh in ahi.
3 Athaliah lengnu in kum gup sung jen leggam sunga vai ahop sungin Joash chu Pakai Hou-In sunga ana kisel’in ahi.
Athaliah Douna
4 Athaliah vaihom kal kum gup kichai akum sagi lhin kum in, Jehoiada thempu in asepai lamkaipa, Car mite sepai ho, chuleh khopi ngah a pangho Pakai Hou-In a akoukhom tan ahi. Hichun aman amaho chutoh Pakai Hou-In’ah khonung chan geiya dettah le kitah tah a adinpina diuvin akihahsel sah in chule kitepna khat ana sempeh in, hiche jou chun aman lengpa chapa Joash chu ahin puidoh in amaho chu avetsah tan ahi.
5 Jehoiada chun amaho kom achun, “Nangho hop thum a naki khen uva, hopkhat cholngah nileh leng inpi ngah a napan diu ahi, hiche hi nabol tei diu ahi.
6 Hopthum a hopkhat dangma chu, Sur kelkot ngah a napan diu chuleh hopthum a hopkhat dangma chu khopi ngah a napan diu, akisei hicheng thum a hi naboncha uva khopi na nga diu ahi.
7 Cholngah nikhoa kin bollou loini chun, Pakai Hou-In a lengpa nadinpi diu ahi.
8 Nakhut uva gal manchah nakichoi uva lengpa tahsa hoibitna dinga akimvel'a nadin diu, chule koi hijongleh ahung lhailut goa aum leh natha jeng diu ahi. Lengpa chu achena channa najui diu ahi,” ati.
9 Hiti chun sepai vaipo ho chun Jehoiada thempun aseipeh bang bangun abollun ahi. Sepai vaipo ho chun cholngah nia panla ding ho ahin alalou ding ho ahin asepai te cheh uchu Jehoiada thempu pa kom'ah ahin puijun,
10 chule aman amaho chu tengcha ho leh ompho ho chu ana ban hoppeh in ahi, hiche manchah ho hi David lengpan Pakai Hou-In a ana kikoi jing ahi.
11 Leng inpi ngah ho chun amanchah u kigosademin akichoi uvin alengpau chu aum kimvel un ana ngah un ahi. Ama ho chun Hou-In lhanglang ning apat sahlang ning geijin akigol lhungkei jun, maicham jong aumkimvel un ahi.
12 Hichun Jehoiada in lengpa chapa Joash chu ahin puidoh in, aluchanga lallukhuh akhuh peh in Pathen danthu lekhabu khat apen, hiti chun thao anun, leng ahitai tin aphongdoh un, mijousen khut abengun, “Lengpa damsot hen!” tin asam un ahi.
Athaliah Lengnu Thi
13 Athaliah in mipi ho leh leng inpi ngah ho husan chu ajahdoh phat in, ipi thil aso vedingin gangchal’in Hou-In langa chun aga lhailut tan ahi.
14 Amun aga lhun phat in, lallukhuh kikhuh a lengthah khat chonna ngaidolla thunei tah a khompi kom’a ana din chu amutan, chule sepai lamkai ho leh pengkul mut ho avel'a adin chule gamsung pumpia mipi ho chun kipah tah a sumkon amut u aga mudoh tan ahi. Hichun Athaliah in hiche ho jouse hi amudoh phat in, alung ana behseh jengin aponsil abotttel in, “Lengmun chu! Lengmun chu!” tin asam tai.
15 Jehoiada thempu pan asepaiho vesuija pang sepai lamkai ho chu thu apen, “Amanu chu man unlang Hou-In maija sepai ho lah akhun puilut un, chuleh koi hileh amanu huhna dinga hunglut aumleh that jengun,” atin ahi. Ajeh chu thempu pa chun, “Amanu chu Pakai Hou-In sunga tha louding ahi,” anati sa ahi.
16 Hichun ama hon, amanu chu aman un, leng inpia sakolte lutna kelkot langa chun apui mangun, hikom’a chun athat tauvin ahi.
Jehoiada In Hou Asemphat
17 Hichun Jehoiada in miho jouse chu Pakai mite ahina diuvin, Pakai leh lengpa kikah chuleh mipi kikah a kitepna khat asem tan ahi. Chujongleh aman lengpa leh mipi kikah a jong kitepna khat asemin ahi.
18 Hichun gamsunga mipi ho jouse chu acheuvin Baal doi houna hou-in ho chu asuseuvin, adoiphung u, maicham leh adoilimho jouse chu asuchip un chuleh Baal thempu Mattan jong chu adoiphung maicham maitah achun athat tauvin ahi.
Hiche jou chun Jehoiada thempu pan jong, Pakai Hou-In vengtup dingin sepai ana koiyin ahi.
19 Hijou chun sepai lamkai ho leh Car mite sepaiho chuleh leng inpi ngah sepaiho chuleh gamsung mipi ho chun Joash lengpa chu Pakai Hou-In'a kon'in ahin puidoh un, leng inpi ngah ho panmun kelkot achun ahung kitollut uvin, chuin lengpa chu lengte laltouna a chun atoutai.
20 Hiti chun gamsung mipi abonchauvin akipah sohkeiyun chule gamsung’a chamna ana lengpan tan ahi, ajeh chu leng inpia chu Athaliah kitinu ana tha u ahitai.
21 Joash in lengvai ahinpoh chun ama kum sagi bou ahi nalaijin ahi.