13
Jehoahaz In Israel Chung’a Lengvai Apoh
1 Judah gam’ah Joash lengpa vaihom kum somni le thum lhin kum’in, Jehu chapa Jehoahaz in Israel gam’ah lengvai ahin hom panin ahi. Ama hin Samaria gamsung'ah kum som le sagi vai ana hom in ahi.
2 Ahinlah aman Pathen mitmu’n thilse jeng ana bolin ahi. Aman Nebat chapa Jeroboam in Israel te ana chonset sah bang bangin Jeroboam chondan jouse chu ana juitan ahi.
3 Hijeh chun Pakai chu Israel chunga ana lunghang lheh jengin, hijeh chun Aram lengpa Hazael leh achapa Ben-Hadad chu avel vellin ana josah in ahi.
4 Hijou chun Jehoahaz chu Pakai kom’ah ana taovin panpina ana thum’in ahileh, Aram lengpan Israel te chu ana ha suhgenthei val jeh chun Pakaijin ataona ana sangin ahi.
5 Hijeh chun Pakaijin mikhat asol'in Israel te chu Aram te suhgentheina a kon'in aga huhdohsah tan ahi. Hijou chun Israel te chu tumasanga bangin lungmongin ana cheng tauvin ahi.
6 Ahinlah Jeroboam umchan ala uvin ana chonse jom kitji uvin ahi. Ama hon Samaria a um Asherah doiphung jong chu ana kitunsah jing nalai uvin ahi.
7 Ajona in Jehoahaz sepaiho jong ahung alhom lheh tan, sakol kangtalai touthem 50, sakol kangtalai 10, chujongleh keng sepai 10,000 bou ahitan ahi. Adangse chu Aram sepai ten ana thagam’u ahitan akeng uva vutvai bang’a ana chotpha gam'u ahitai.
8 Jehoahaz vaihom sunga thilsoh ho, ama natohdoh le thilbol ho chule athaneina ho chu Israel Lengte Thusimbua akijihlut tan ahi.
9 Jehoahaz athi phat in Samaria gamah avui tauvin ahi. Ama jouvin Jehoahaz in leng mun ahinlo tan ahi.
Jehoash In Israel Lengvai Apoh
10 Judah gam’ah Jehoash lengpa vaihom kum somthum le sagi lhinin, Israel gamah Jehoash in lengvai ahin hom pan tan ahi. Aman Samaria gamsung ah kum som le gup sungin lengvai ana hom in ahi.
11 Ahinlah ama hin Pakai mitmu’n thilse jeng ana bollin Nebat chapa Jeroboam in Israel te ana chonset sahna a konna chu kilehei ding ana nompon ahi.
12 Jehoash vaihom sunga thilsoh ho jouse leh aman ana tohdoh ho leh athaneina chan geija anatoh ho chuleh Judah lengpa Amaziah toh gal ana kisattona ho abonchan Israel Lengte Thusimbua abonchan akijihlut sohkeijin ahi.
13 Jehoash athi phat in Israel lengho kivuina Samaria mun'ah chun ana vui tauvin ahi. Hiche jou chun achapa Jeroboam nina in lengvai ahin popan tan ahi.
Elisha Gao Thusei Achaina
14 Elisha chu athikon natna jalkhun a aum jinglai ahin, Israel lengpa Jehoash in agavil’in aga ka khum’in , “ Hepa! Hepa! Israel te kangtalai tou them ho leh akangtalai hou kamun ahi!” ati.
15 Elisha’n ajah a, “Thalpi khat le thal chang phabep gakilah tan,” ati. Hijeh chun aman jong thalpi khat le thalchang phabep aga kilah in ahi.
16 Elisha’n ajah a, “Thalpi kisadoh tem’in,” atia ahileh amanjong akisadoh kittai. Hichun Elisha’n lengpa khut teni chunga chun ama khut tenin atuh in ahi.
17 Hitin aseitai, “Nisolam a bangkot chu hongdoh tan,” atileh amanjong ahongdoh tai. Chujouvin Elisha’n, “Kap jeng tan,” atileh aman thal changkhat akaptai. Hichun Elisha’n jong, “Hiche chu Pakai thal chang ahi, Aram mite chunga galjona thalchang ahi, ajeh chu nangin Aram mite chu Aphek munna nasuh gamhel ding ahi,” tin aphongdoh tai.
18 Chuin Elisha’n jong aseikti in, “Tun nangin thalchang dang ho chu kilah inlang tol chu jeptan,” ati. Hichun lengpan jong thalchang chun tol chu thumvei ajeptai.
19 Ahin Pathen mipa chu achung’ah alunghang lheh jengin, “Nangin tol chu nga vei ahilouleh gup vei najep ding ahi,” tin aman asamjah jeng tan ahi. “Chutileh nangin Aram mite chu na suhmang hel ding ahi. Tunvang nangin thumvei bou najo ding ahitai,” ati.
20 Hichun Elisha athin ahileh ana vui tauvin ahi.
Hichelai chun Moab sepai ten chavang lai seh leh Israel te chu gal in ahin nokhum jingkei uve.
21 Khatvei hi Israel te phabep in mithi khat hi anavui un ahileh hiche minokhum sepai ho chu amu uvin, amahon jong kinotah in mithipa tahsa chu Elisha kivuina lhan sung’a chun alehlut un ajamdoh tauvin ahi. Ahin mithi long chun Elisha guchu atohkhah phat in ahung hingdoh in, akengah ahung dingdoh kit tan ahi.
22 Jehoahaz lengpa vaihomlai sungsen Aram lengpa Hazael in Israel te hi ana ha suhgenthei lheh jengin ahi.
23 Ahin Pakai chun Israel te alungset le akhotona jeh in, abon'in asuhmang sah dehpoi. Abraham, Isaac chule Jacob toh akitepna jal chun ana panpi jing nai. Hiti chun aman tuni chan geijin amaho hi abonin asumang pon chuleh ama angsunga kon'in jong apaimang chom dehpon ahi.
24 Aram lengpa Hazael athitan ahileh achapa Ben-Hadad in ama khellin lengmun alotan ahi.
25 Jehoash pa Jehoahaz a konna ana lahpeh u khopi ho chu Jehoash in Hazael chapa Ben-Hadad a kon'in akile lahdoh kittan ahi. Jehoash in Ben-Hadad chu thumvei jen ana jouvin Israel khopi ho chu ana kile lahdoh gamtan ahi.