14
Amaziah In Judah Lengvai Apoh
1 Israel lengpa Jehoash vaihom akum ni lhinin, Judah gamsunga Joash chapa Amaziah in lengvai ahin hompan tan ahi.
2 Amaziah chu leng ahung chan chun ama kum somni le nga ana lhing tan ahi. Aman Jerusalem'ah kum somni le ko sungin lengvai ana hom'in ahi. Anu min chu Jehoaddin ahin, Jerusalem kho mi ahi.
3 Amaziah hin Pakai mitmu’n thilpha jeng abollin ahi, ahinlah apu David toh ana bang joupon ahi. Chuti tah sangin apa Joash chondan joh ana juijin ahi.
4 Amaziah chun doiphung ho chu ana suse dehpon, chule mipi ho chun doiphunga chun kilhaina gantha leh gimnamtui lhutna chu abol jingun ahi.
5 Amaziah chun leng ahina akisuhdet phat chun, apa ana that ho jouse chu ana khailih tan ahi.
6 Ahijeng vang'in, aman apa ana that ho chate ho khatcha ana that pon ahi, ajeh chu aman Mose dan lekhabua Pakai thupeh chu ana juijin: “Achateu chonset jeh a anu apate tha louding ahilouleh anu apateu chonset jeh a achateu thalouding, thi dinga lomho chu ama chonset jeh a bou tha ding,” ti ahi.
7 Amaziah in Chikhuh Phaicham’ah Edom mite 10,000 ana that in ahi. Aman Sela khopi jong ana jouvin, akhopi min jong Joktheel in ana khellin, tuni chan geijin hiti hin akisah dentai.
8 Nikhat Amaziah lengpa in Jehu tupa Jehoahaz chapa Jehoash chu chounan thu athot in, “Hungin gal kisatto hite,” ati.
9 Ahin Israel lengpa Jehoash in Judah lengpa Amaziah chu hiche thusim hi athot in, “Lebanon lhang'a lingphung khat in, Lebanon molla Cedar thingphung kom'ah thu athot in hitin ana seije, ‘Na chanu chu kachapa ji dingin neipen,’ tin athum’in ahi. Ahin Lebanon lhanga cheng gamsa khat in lingphung chu ahin jotpan, akengin achon lhutai!
10 “Nangin Edom mite chu najo jeh a chu nalungthim’a nangma kichoisanga nahi. Ahin na minthanna a chun lunglhai inlang, inmun'a kitou thim’in, ajeh chu ipi ding penna nangin naboina ding le Judah gam mipite manthah lona dia mi phin lunghang’a nahim?” ati.
11 Ahinlah Amaziah in athusei angaipeh tapon ahi, hijeh chun Israel lengpa Jehoash in asepai te akigontoh in, Judah lengpa Amaziah toh kisat dingin akontai. Galsat ding hungkon sepai teni chu Judah gam Beth-Shemesh mun'ah chun ana kisatto tauvin ahi.
12 Judah te chu Israel sepai ten ano cheh gam tauvin, asepai teu akithe cheh uvin a inlang cheh uvah ajam gam tauve.
13 Hichun Israel lengpa Jehoash in, Ahaziah tupa chuleh Joash chapa Judah lengpa Amaziah chu Beth-Shemesh a chun ana man tan ahi. Chujouvin Israel ten Jerusalem khopi chu anopaiyun, Jerusalem kulpi pal feet 600 a sang, Ephraim kelkot apat a Palningkoi Kelkot gei asuhchim pehtan ahi.
14 Hichun aman Pakai Hou-In’ah sana le dangka chuleh thil jouse chu aki chomdoh in, chuleh leng inpi’a kon'in nei le gou jouse jong achom’in chuleh gal hingin mi tamtah jong akaimangin, Samaria khopi lamah akile tan ahi.
15 Jehoash vaipoh sunga thilsoh jouse leh aman ana tohdoh ho leh athaneina akhonna geija anatoh ho chuleh Judah lengpa Amaziah toh gal ana kisattona ho abonchan Israel Lengte Thusimbua aum sohkeijin ahi.
16 Jehoash athi phat in Israel lengte kivuina Samaria a chun avuijun ahi. Ama thi jou chun achapa Jeroboam nina chun lengmun ahin lotan ahi.
17 Israel lengpa Jehoash athi jouvin Judah lengpa Amaziah chu kum som le nga ahinbe nalaijin ahi.
18 Amaziah vaihom sunga thilsoh ho jouse chu Judah Lengte Thusimbu a aum sohkeijin ahi.
19 Jerusalem’ah Amaziah hinkho lahna dingin thil guh gonna anaum jeh in, ama Lachish lam’ah ana jam'in ahi. Ahinla adou hon athat ding mi anung-nung’a ana sol’un ahile, ama hon ajamna mun'ah chun agathat un ahi.
20 Ama hon atahsa chu sakol in Jerusalem ah ahin le pohlut un David khopia apu apate kivuina mun'ah chun avui tauvin ahi.
21 Judah mipi ten Amaziah chapa kum som le gup bep lhing, Uzziah chu apa Amaziah khellin leng dingin atung tauvin ahi.
22 Apa thijou phat in Uzziah in Elath khopi chu athah sem’in Judah a din ale la lut kittan ahi.
Jeroboam Nina’n Israel Chunga Lengvai Apoh
23 Judah gam'a Amaziah leng chan kal kum som le nga lhinin, Jehoash chapa Jeroboam nina in Israel chunga lengvai ahin hom pantan ahi. Jeroboam in Samaria a kum somli le khat sungin vai ana hom’in ahi.
24 Ama hin Pathen deilou lam thilse jeng ana bollin ahi. Nebat chapa Jeroboam in Israel te ana chonset sahna a kon'in ana kihei mang nompon ahi.
25 Jeroboam nina in Israel gam Lebo-hamath apat lhanglam twimang dung geiyin alelahdoh gam kittan ahi. Hiche hi Gath-hepher a konna themgao Amittai chapa Jonah kom'a Pakai Israel Pathen'in ana phondohsa dungjuiya thilsoh ahi.
26 Ajeh chu Pakaijin Israel te thohgimna nasatah chu ana mun, ahinla Israel te lah a soh hihen chamlhat hijongleh ahuhdoh diu mi ana mupon ahi.
27 Ajeh chu Pakaijin Israel tehi amin’u kathaimang sohkei ding ahi ana tilou jeh'in aman Jeroboam nina chu amaho huhdoh dingin ana mangchan ahi.
28 Jeroboam nina vaihom sunga thilsoh jouse leh anatoh ho chuleh athaneinaho agalsat ho chuleh Judah gam anahi’ah Damascus leh Hamath jong Israel a dingin ana lalut in ahi. Hiche ho jouse hi Israel Lengte Thusimbua aum sohkeijin ahi.
29 Jeroboam nina athi phat in Israel lengho kivuina Samaria ah ana vui tauvin ahi. Hichejou hin achapa Zechariah chu ama banin leng achangtai.