15
Uzziah In Judah Chunga Lengvai Apoh
1 Israel lengpa Jeroboam nina vaihom kum somni le sagi lhin chun, Amaziah chapa Uzziah chun Judah lenggam'ah vai ahin hom pantan ahi.
2 Ama leng ahung chan kum chun, ama kum som le gup alhing tan ahi, chuleh aman Jerusalem’ah kum somnga le ni sungin lengvai ana hom in ahi. Anu chu Jerusalem'a kon Jecoliah ahi.
3 Ama hin apa bangin Pathen mitmu’n alung lhaina jeng ana bollin ahi.
4 Ahinlah aman doiphung ho ana sumang dehpon chuleh mipi hon kithoina gantha ana bollun hal namtui jong ana lhut un ahi.
5 Pakaijin lengpa chu ana phah sah in athi nikho geijin aphah in ahi. Ama chu in chom’ah atum’in ana chengin ahi. Lengpa chapa Jotham chu leng inpi ngah in ana pangin ahi, hiti chun aman gamsung mite lah a vai ana hom in ahi.
6 Uzziah vaihom sunga thilsoh ho leh aman ana tohdoh ho jouse chu Judah Lengte Thusimbua aum'in ahi.
7 Uzziah athi phat in ama chu David khopia apu apate kivuina mun'ah ana kivuijin ahi. Achapa Jotham chun ama banin lengmun analo tan ahi.
Zechariah In Israel Chung’a Lengvai Apoh
8 Judah lengpa Uzziah in Judah gam anapoh kum somthum le get lhinin Jeroboam nina chapa Zechariah in Israel te chunga vai ana hom’in ahi. Aman Samaria ah lhagup vai ana hom in ahi.
9 Zechariah in apu apate bang bangin Pakai mitmu’n thilse jeng ana bollin, Nebat chapa Jeroboam in Israel te ana chonset sah bangin ama jong hiche chonsetna ho a kon'in kilehei ding ana nompon ahi.
10 Hijou chun Jabesh chapa Shallum chun Zechariah dounan lungthimse ana gongin mipi lah a ana that in, ama leng ahung chang tan ahi.
11 Zechariah vaihom sunga thilsoh ho jouse chu Israel Lengte Thusimbua chun abon'in aum’in ahi.
12 Pakaijin Jehu kom’a ana sei, “Na chilhah te khangli geija leng kachan sah ding ahi,” tichu guilhunna ahi.
Shallum In Israel Te Chunga Lengvai Apoh
13 Judah gam'a Uzziah in leng achan kal kum somthum le ko alhinin, Jabesh chapa Shallum hin Israel gamsung’a lengvai ana hom’in ahi.
14 Hijou chun Gadi chapa Menahem chu Tirzah a kon'in Samaria-ah agachen ama chu athat in, lengmun ahin lotan ahi.
15 Shallum vaihom sunga thilsoh ho chuleh alungthimse gonho pum chun, Israel Lengte Thusimbua abonchan aum’in ahi.
Menahem In Israel Chunga Lengvai Apoh
16 Hiche pat chun Menahem in Tappuah khopi leh avel'a gamho jouse, Tirzah geijin asumang hel in ahi, ajeh chu akhomite le akimvel a mite, akhopi ho chu akom'a ahin pehlut nomlou jeh u ahi. Aman agamsung mite jouse chu athat gam’in chule numei gailai ho jong akhedoh sohkeijin ahi.
17 Judah gam’ah Uzziah lengpan lengvai ana hom kal kum somthum le ko alhinin, Gadi chapa Menahem in Israel gam’ah lengvai ana hom’in ahi. Aman Samaria a hin kum som sungin lengvai ana hom’in ahi.
18 Ahin Menahem hin Pathen mitmu’n thilse jeng ana bol'in ahi. Avaihom sung hin Nebat chapa Jeroboam in Israel te achonset sahna a konna kilehei ding ana nompon ahi.
19 Hijou chun Assyria mi Tiglath-pileser lengpan gamsung chu gal’in ahin nokhum tan ahi. Ahinla Menahem in athaneina a vai ahomjom jouna dingin ama chu dangka ton somthum le sagi anapen ahi.
20 Menahem hin Israel mite lah a ahaoho kom’ah sum namna in ala in, mikhat cheh chun Assyria lengpa hi dangka som nga cheh apeh diuvin thu apen ahi. Hiti chun Assyria lengpa chu Israel gam'a kon chun ahung kinungle tan ahi.
21 Menahem vaihom sunga thilsoh ho chuleh aman atoh ho jouse chu Israel Lengte Thusimbua aum’in ahi.
22 Menahem athi phat in, achapa Pekahiah in leng mun ahinlo tan ahi.
Pekahiah In Israel Chunga Lengvai Apoh
23 Judah gam'a Uzziah in lengvai apoh kal kum som nga alhinin, Menahem chapa Pekahiah in Israel gam’ah lengvai ahin hompan in ahi.
24 Ahinlah Pekahiah chun Pakai mitmu’n thilse jeng ana bollin, Nebat chapa Jeroboam in Israel te ana chonset sahna a kon chun kiheimang ding ana nompon ahi.
25 Hijou chun Remaliah chapa Pekah, Pekahiah sepai lamkaipa chun achunga thilse ana gongin ahi. Aman Gilead a kon'in mi som nga leh Argob le Arieh toh akitho in Pekahiah chu Samaria leng inpi ah chun ana that un, hiti chun Pekah leng ahung chang tan ahi.
26 Pekahiah vaihom sunga thilsoh ho chuleh aman anatoh ho chu Israel Lengte Thusimbua abonchan aum’in ahi.
Pekah In Israel Chunga Lengvai Apoh
27 Judah gamsunga Uzziah lengpan aleng vaipoh kum somnga le ni alhinin, Remaliah chapa Pekah in Israel te chungah lengvai ana hom panin ahi.
28 Pekah in Pakai mitmu’n thilse jeng ana bollin, Nebat chapa Jeroboam in Israel te ana chonset sahna a konna kinung hei ding chu ana nompon ahi.
29 Pekah vaihom sungin Assyria lengpa Tiglath-pileser in Israel ahin sat in Ijon khopi, Abel-beth-maacah, Janoah, Kedesh, leh Hazor khopi ho ana kilah tan ahi. Aman Gilead gam leh avel ho, Galilee chule Naphtali ho ajouvin chuleh mipi ho chu Assyria gam’ah gal-hing in ana kaimang tan ahi.
30 Hijou chun Elah chapa Hoshea chun Pekah douna lungthim phalou ana gongin, ana that dohtan ahi. Aman Uzziah chapa Jotham vaihom kal kum somni lhinin Israel chunga lengvai ana hom pantan ahi.
31 Pekah vaihom sunga thilsoh ho, aman anatoh ho chu Israel Lengte Thusimbua aum’in ahi.
Jotham In Judah Chunga Lengvai Apoh
32 Pekah lengpan Israel gamsunga lengvai apoh kal kum ni lhinin, Uzziah chapa Jotham in Judah gam’ah lengvai ana hom’in ahi.
33 Aman lengvai ahinpoh chun ama kum somni le nga alhing tan ahi. Aman Jerusalem’ah kum som le gup sungin lengvai ana hom in ahi. Anu min chu Zadok chanu Jerusha ahi.
34 Jotham hin Pakai mitmu’n thilpha jeng ana bollin, ama hin apa Uzziah bol bangin thil ijakai ana tongdoh sohkeijin ahi.
35 Ahinlah aman doiphung ho chu ana sumang pon chuleh mipi ho chun hikom'a chu kilhaina gantha le gimnamtui jong ana lhut un ahi. Aman Pakai Hou-In sahlam kelkot jong chu ana semphan ahi.
36 Jotham vaihom sunga thilsoh jouse leh aman ana thilbol jouse Judah Lengte Thusimbua akijihlut sohkeijin ahi.
37 Hiche nikholai chun, Pakaijin Aram lengpa Rezin leh Israel lengpa Pekah chu Judah nokhum dingin ahin solpan tan ahi.
38 Jotham athi phat in David khopia apu apate kivuina mun'ah ana vuikhom tauvin ahi. Akhelin achapa Ahaz chun lengvai ahinpo tan ahi.