17
Hoshea In Israel Lengvai Apoh
1 Judah gam’ah Ahaz lengpan lengvai ahom kal kum som le ni alhin chun, Israel gam’ah Elah chapa Hoshea in lengvai ahin hom pantan ahi. Aman Samaria khopia kum ko vai ana hom’in ahi.
2 Aman Pakai mitmu’n thilse jeng ana bollin ahi. Ahinlah amasanga Israel te lengho bang lom-lom’in ana phamo sampon ahi.
3 Assyria lengpa Shalmaneser in Hoshea lengpa chu gal ahinsat khum tan ahileh, Assyria te chun Hoshea chu nomna in kai gihtah ana pohsah un ahi.
4 Ahinlah Hoshea in kumseh a apeh u kai chu anapeh da'n, chule Egypt lengpa So kitipa toh kithoa Assyria te thaneina a konna hoidoh ding aguh in tohgon ana neijin ahi. Ahinlah hiche aguh a tohgon anei chu amudoh phat in Assyria lengpan Hoshea chu ana mandoh in songkul'a akoitan ahi.
Assyria Ten Samaria Khopi Alah
5 Hiche jou chun Assyria lenpan agam pumpi chu ahinsat tan ahile, Samaria chu kum thum sung jen hunom'in alahpeh tauvin ahi.
6 Ajonan Hoshea vaihom kum ko alhin chun Samaria alhutan, Israel mipite chu Assyria gam'a sohchang in analut tauvin ahi. Amaho chu Gozan munna Habor vadung pang juiya Halah gam chenna munho a chu ana chensah u ahi. Hichu Medes khopi ho khat ahi.
7 Hitobanga Israel te chunga gim gentheina ahunglhun hi ama hon semthu pathen ana hou jeh u, chule Egypt lengpa Pharaoh thaneina a konna ahin huhdohpa chujongleh ahin puidoh uva Pakai a Pathe'u douna a chonset ana boljeh u ahi.
8 Ama hon Pakaijin amaho masanga ana nodoh peh u Pathen neilou nam mite chondan analah uva chuleh Israel lengte phabep in ahin pohlut u chonna ho anajui jeh u ahi.
9 Israel mipi loikhat in, Pakai a Pathen’u deilou lam le doumah thil tamtah aguh a anabol jeh u ahi. Ama hon Pathen neiloute, doiphungho, khovetna mun neo apatna khopi pal lenpen chung geija ama hon akisemdoh uva akitundoh u ahi.
10 Lhangvum dung jouse le thingna dum noi dung jousea doikhom ho leh Asherah doiphung ana kitun’un ahi.
11 Ama hon namdang te maicham phung dung’a gimnamtui alhut nam’un, agamsung a Pakaijin adeldohsa nam mite chonchan jouse ajom tauvin ahi. Hiti chun Israel ten setna tampi ana bollun, Pakai lung ahansah jiuvin ahi.
12 Pakaijin kichehtah a avel-vel'a aseipeh chule gihsalna avel-vel'a anapeh vangun semthu doi ana hou jing tauvin ahi.
13 Pakaijin avellin themgao ho leh michingho anasol'in Israel te leh Judah te chu avel vellin hilchahna anapen ahi, “Na thilse bol nauva kon'in hung kileheijun, kathupeh ho leh ka dan semho, ka themgaote le ka lhachate mangcha a napu napa teu kana thupeh hohi jui unlang ngaiyun,” ati.
14 Ahinlah Israel ten ana nahsah pouvin ahi. Apu apa teuvin, Pakai a Pathen’u tahsan ding ana noplou bang bangun alungu ana tah un ahi.
15 Ama hon adanthu le apu apateu toh ana sem kitepna ho chu apaidoh un chuleh ana hilchahna ho jeng jong ana nasah pouvin ahi. Ama hon panna bei doiho pou ana hou un amaho tah jong manlou asohgam tauve. Ama hon avel uva cheng namdang te chondan alauvin Pakai thupeh jui louvin anot thap tauvin ahi.
16 Ama hon Pakai a Pathen’u thupeh jouse apaidoh un, thih ahal jol’un bongnou ni lim asem tho uvin, Asherah doikhom’ah atungdoh un, Baal doi chuleh vanna ahsi te ho pou ana houvun ahi.
17 Ama hon chidang namdang te doi houna din achapa teu leh achanu teu pumgo thilto din kilhainan anei jiuvin ahi. Chule ama hon gaothem ho donga phun themho asansah jiu, Pakai mitmua thil dihlou bolna kipumpeh jeng ahiuvin, hijeh a chu Pakai chu aphin lunghang’u ahi.
18 Pakai chu Israel te chung’a alunghan val jeh in, Aman amaho chu amitmua kon'in ana tolmang gamtan ahi. Judah changseh bou gamsunga ana chensah in ahi.
19 Ahivangin Judah te jengin jong Pakai thupeh ananit nom pouvin, Israel ten anaphudoh’u chondan phalou ngen chu anajom’un ahi.
20 Pakaijin Israel chilhah te chengse chu abonchan ana paidoh in ahi. Hiti chun ama mitmua konna apaidoh kahsen agal mite khut ah ana pehdoh in asugenthei in ahi.
21 Pakaijin Israel te chu David lenggam'a konna alhekeh jouvin, ama hon alengpau dingin Nebat chapa Jeroboam chu ana kilhen tauvin ahi. Ahinlah Jeroboam in Israel te chu Pakai ajen ule ajui nauva kon'in ana puidoh in, chonsetna nasatah ana tohdoh sahtan ahi.
22 Hiti chun Israel ten Jeroboam nung ajuiyun, thilse lampia chun akimangcha un, achonset nauva kon'in ahung kiheidoh tapouvin ahi.
23 Themgao hon ana gihna bang bangun, Pakaijin Israel te chu amitmua konna apaidoh kahsen anga deh pouvin ahi. Hijeh chun Israel te hi agamsung uva konna paidoh a um uva tuni geija Assyria gam'a sohchang’a umden jing ahi tauve.
Israel Gamsung’a Gamdang Mite Achen'u
24 Assyria lengpan Babylon, Cuthah, Avva, Hamath le Sepharvaim khoho a kon'in mihem tampi ahin tollin amaho chu Samaria khopi dung’a chun Israel chate khellin achensah tai. Amaho hin Samaria gamsung alo uvin, akhopi dung jousea acheng tauve.
25 Ahinlah hiche gamchom mi ahung chenglut ho hin ahunglut til’un, Pakai ahou pouvin, hijeh chun Pakaijin alah uvah keipi bahkai ahin sollin mi phabep anathat un ahi.
26 Hijeh chun Assyria lengpa kom’ah thu athot un, “Nangin Samaria khopi sungho a cheng dinga nahin sollut mipi ho chun hiche gamsung mite Pathen hou le chondan ho ahetlou jeh un, Pathen'in amaho sugam dingin keipi bahkai ahin sollut in ahi, ajeh chu ama hon Pakai ahoudan u adihlou jeh ahi,” atiuve.
27 Assyria lengpa chun hiti hin thu apen, “Soh a kikaimang ho lah a thempu khat chu Samaria khopia lesolpeh un. Ama chu ahung chenglut thahho lah a chengin tin, agamsung mite Pathen houjedan le chondan ho gahil hen,” ati.
28 Hiti chun Samaria a konna hung sohchang thempu khat chu Bethel ah alesol un, aman achenglut thah ho chu Pakai houdan chu ahil pantan ahi.
29 Ahinlah gamchom mi ahon honna hunglut ho chun ama-ama pathen cheh chu akihoujom jingun ahi. Achennau khopi khat a kon'in khopi khat ah Samaria mipi ten ana tundoh u doiphung hoa chun milim semthu ho chu akikoijun ahi.
30 Babylon’a konna hung hon, Succoth-benoth pathen chu ahouvun, Cuthah a konna hungho chun Nergal pathen chu ahouvun, chuleh Hamath a konna hunghon Ashima ahouvun ahi.
31 Avvit ten jong Nibhaz le Tartak pathen ahouvun, chuleh Sepharvaim a konna hung hon achateu chu apathen’u Adrammelech leh Anammelech hounan pumgo thilto in atohdoh jiuvin ahi.
32 Hitobanga ahung chenglut thah ho hin Pakai jeng ven ahou jing nauve, alah uva kon'in thempu akilhengdoh un, chidang namdang te doiphunga doi hounan hiche thempu ho chu apansah jiuvin ahi.
33 Chule ama hon Pakai chu ahou jeng vang’un, ahung kondoh nau gamsunga kihou pathen ho jong adan dungjuiyun ama-ama indoi cheh jong akihou thouvun, chondan ho chu achepi jing nalaijun ahi.
34 Hiche achondan lui ho chu tunikho geijin achepiuvin ahi. Ama hon Pakai chu ahoutah tah pouvin, amavang tumasanga achonnau chu ajui-nalaijun ahi. Ama hon Pakaijin Israel tia amin ana khelpeh Jacob chihlhahte anapeh thupeh ho leh ajuidiuva dan ana sempeh ho chu khatcha jong ajui pouvin ahi.
35 Ajeh chu Pakaijin Jacob chilhah ho chu kitepna ana semin, ajui diuvin thupeh hitin anapei, “Pathen dang hou hih un ahilouleh a ang’a jong nakun theilou diu, jen jong najen theilou diu, akom uva jong kilhaina nabol thei louhel diu ahi.
36 Ahinlah, aban thahatna thaneitah a Egypt a konna nahin puidoh pa Pakai ama bou chu nahou diu, Ama angsung’a bou nakun diu chule kilhaina jong ama kom'a bou nasem diu ahi.
37 Nangho dia kipe danho le chonchan ding ho chule thupeh ho chu phattin le phatecha a nanit jing theina dingun phatseh in chingtheiyun lang semthu pathen kitiho nahou louhel dingu ahi.
38 Keiman nangho toh kasem kitepna chu sumil hihbeh un chujongleh pathen dang kiti pou-pou nahou thei louhel ding’u ahi.
39 Nanghon Pakai na Pathen bou nahou diu ajeh chu Ama chun na galmi houva konna nahin huhdoh diu ahi,” ati.
40 Ahinlah mipite chun hiche thu kisei ho chu ana nahsah pouvin, achonna u masa dungjui chun achon jom jingun ahi.
41 Hiti hin hiche ahung chenglut thah ho chun Pakai chu ahou vangun amaho milim doiho jong chu alhadeh pouvin ahi. Tuni chan gei hin achilhah teuvin jong achepi jingun ahi.