18
Hezekiah In Judah Gamsung'a Lengvai Apoh
1 Israel gam’a Hoshea leng chankal kum thum alhinin, Ahaz chapa Hezekiah in Judah gam’ah lengvai ahin hom pan’in ahi.
2 Ama leng ahung chan chun akum somni le nga alhing tan, chuleh Jerusalem’ah kum somni le ko lengvai anahom’in ahi. Anu chu Abijah ahin Zechariah chanu ahi.
3 Ama hin apu David bangin Pathen mitmun Pathen deilam jeng ana bollin ahi.
4 Aman Pathen neilouho doiphung ana sumangin doikhom jouse jong avobong sohkeijin, Asherah doikhom ho jong aphulhun, Mose’n sum-eng gullim ana semjong chu ana suchip in ahi, ajeh chu Israel ten hiche gullim kisem kom'a hi kilhaina asem uva gimnamtui jong ahal uva alhut nam jiu ahi. Hiche sum-eng gullim chu Nehushtan tin ana kihe in ahi.
5 Hezekiah in Pakai Israel Pathen chu ana tahsan’in ahi. Ama masang hihen anung hijongleh, Judah gam lengho lah a ama tobang koima ana umpon ahi.
6 Aman Pakai chu imalam jousea kitah tah in ana juijin, chuleh aman Pathen’in Mose anapeh thupeh ho chu lhingtah in ana juijin ahi.
7 Hijeh chun Pakaijin ama chu ana umpi jingin, chuleh Hezekiah hi abolna atohna chan’ah alolhing in ahi. Ama hin Assyria lengpa dounan kai pehding jong ana nompon ahi.
8 Aman Philistine te chu Gaza chan le agamsung’u khoneopen apat khopi lenpen Gaza le akimvel kho kulpi kikaikhum khopi geijin ana jouvin ahi.
9 Israel gam'a Hoshea Lengpa vaihomkal kum sagi alhinin, Hezekiah lengvai hom kum alhin in, Assyria lengpa Shalmaneser chun Samaria khopi ahin um’in ahi.
10 Kum thum nungin, Israel lengpa Hoshea leng chan kal kum ko alhin chuleh Hezekiah leng chan kal kum gup alhinin, Samaria khopi chu pangjou talouvin alhutan ahi.
11 Hiche phat chun Assyria lengpan Israel te chu Assyria gam Halah mun’ah sohchang’in akoitan ahi. Hiche hi Medes khopi sung Gozan munna Habon vadung pang ahi.
12 Ajeh chu ama hon Pakai a Pathen’u thupeh ajuinom pouvin, chuti sangin Pakai toh akitepnao asukeh un, Pakai lhacha Mose in danho le anit diuva athupeh ho ana nitnom pouvin ahi.
Assyria In Judah Ahin Nokhum
13 Hezekiah lengpa leng chan kal kum som le li alhinin, Assyria lengpa Sennacherib ahung kon’in Judah khopi kulpi kigensa khopi ho jouse chu ahin nokhumin, abonin alatan ahi.
14 Hezekiah lengpan Lachish munna um Assyria lengpa kom’a hiti hin thu athot in, “Keiman kabol kheltai, galbol nangah a nakinungle kit pou-pou leh, ijat hijongleh nangin nangeh chan kai pejeng tange,” ati. Assyria lengpan akinopto thei lhonna dingin dangka ton som le khat chuleh sana ton khat angeh in ahi.
15 Hijat suh bulhitna dingin, Hezekiah lengpan Pakai Hou-In’a dangka kikoi jouse leh leng inpia sum le pai jouse jong achomkhom’in ahi.
16 Hezekiah lengpan Pakai Hou-In kot tomna a ananei sana ho chu akhoh lhan chuleh kot khom ho chunga kiloi sana ho jong chu akhoh lhan Assyria lengpa chu apetan ahi.
17 Ahijeng vang'in Assyria lengpan asepai lamkai lenpenpa toh, galmun a lamkaipa ahin asepai lamkaiho pipui chunga apipuipa chutoh Lachish a kon'in, sepai tamtah toh Jerusalem’a Hezekiah lengpa toh kimaito dingin asol'in ahi. Assyria mite hin sahlang twikul'a twi kilhana hohlam pang, louva kilhunglut a pon kisopna lamlen kom’a chun apangun ahi.
18 Ama hon Hezekiah lengpa chu kimupi dingin akouvun ahileh amaho toh kimuto ding anoija natong ho Hilkiah chapa Eliakim, leng inpia vaihompa, thutanna munna lekhasun Shebna chuleh lengte thusim chingpa Asaph chapa Joah hocheng chu ana sollin ahi.
Sennacherib In Jerusalem Gihna Anei
19 Hiche jou chun, Assyria lengpa noija lamkai pipuipa chun Hezekiah thuthot ana neiyin,
“Hiche hi Assyria leng lenpa ama tah kamcheng ahi: Koipen na tahsan a, koipen na kisonpia hitia hi lung olmo louhel a naum ham?
20 Nangin thuhom keova hi sepai galsat thepna le athahatna ho akhel thei dia nagel ham? Koipen chunga na kingaiya keima nei dou jeng ham?
21 Ole Egypt nakisonpi ham? Egypt chunga nakingai ahileh hiche Egypt khu peng tenggol natahsa gih in atouchip a nakhut asut tobangbep hi ding ahi. Egypt lengpa Pharaoh hi kingaina thei hilouhel ahi.
22 Ahin nangin kakom’a, Keiho Pakai ka Pathen uva kingai kahi nati diu ahi, ahinla Ama chu Hezekiah in noise tah a anabol hilouham? Judah gam le Jerusalem mite Jerusalem maicham phungseh a bou Pathen hou dia seipeh a, Pakai doiphung jouse le maicham ho sumang pa Hezekiah hilou ham?
23 Keiman naseipeh uvinge! Ka pakaipa Assyria lengpa hitoh kinoptona bol lhon’in, nangin mi nanei jou ding leh sakol 2,000 na penge.
24 Hitobang sepai hon lhomchakhat a hi, kapupa sepai hon ahatmopen jeng jong hi nachou ngam ding hinam? Egypt sakol kangtalai ho leh kangtalai touthem hotoh kitho jongle chun i-nalo ding ham?
25 Tua hi ipi mong-mong nagel ham, nagam kahin nokhum’u jong hi, Pakaijin eihinsol u ahi nahet lou uham? Gamsung khu ganokhum’un lang gasumang’un tia, Pakai ama tah chun eiseipeh lou uva nagel uham?” ati.
26 Hichun Hilkiah chapa Eliakim, Shebna le Joah chun Assyria mite gal lamkai pipuipa kom’achun, “Lungset tah in keiho kom’ah Aramaic paovin nei seipeh un, hichu keihon jong phaten apao chu kahe nauve. Hebrew paovin nei seipeh hih un, ajeh chu pal chung’a mipi ho hin jakha get unte,” atiuve.
27 Ahinlah sepai lamkai pipui Sennacherib chun ahin donbut in, “Ka pakai pauvin hiche thu hi napupau leh nangho chengseh jah dinga eiseisah uva nagel uham? Mijousen ajah ding hi aman adei ahi. Ajeh chu hiche khopi hi kalah tengu leh amaho jong nangho toh thohgim tha diu ahi. Genthei jeh a agilkel behseh tengleh a-eh aneh diu chuleh dangchah behseh tengleh ajun’u adon diu ahi,” ati.
28 Hichun sepai lamkai pipuipa chun pal chunga um mipi ho het dingin Hebrew paovin asap in asap thon, Assyria leng lenpa thupeh hi ngaijun!
29 “Lengpan asei chu hiche ahi: Hezekiah chu kilheplhah sah hih un. Aman itinama jongleh keima thaneina a kon'in na huhdoh jou pouvinte.
30 Aman nangho Pakai tahsan dingin kilhep lhahsah hih un, 'Pakaijin eihuhdoh tei diu ahi, hiche teho hi Assyria lengpa khutna lutlouhel ding ahi atiu chu tahsan hih un!' ati.
31 “Hezekiah thusei tahsan hih un! Assyria lengpan nangho napehnom’u kitepna chu hiche hi ahi: Keitoh chamna sem’un, khopi kelkot hi hong’un lang hung potdoh un. Achutileh nang hon na lengpithei ule nathei chang’u nakineh diu, chuleh na twikul uva nakidon diu ahi.
32 Chutengleh keiman nangho hiche tobang gamchom khatna kapohlut diu, chang phatna le lengpithei phatna changlhah leh lengpithei phatna, olive thing le khoiju lonna mun a kapuilut ding nahiuve. Thina sang’in hinkho kilhen joh un!
“Hezekiah in 'Pakaijin eihuhdoh diu ahi' atia nalhep lhah got’u chu ngai hih un!
33 Koipen nam apathen’un Assyria lengpa khut a ahuhdoh nahet khah uvem?
34 Hamath khopi le Arpad khopi tenia pathen'in ipi abolthei beh am? Chuleh Sepharvaim, Hena, leh Ivvah khopi ho a pathen'in ipi atohdoh beh am? Koi pathen'in ka thahatna a konna Samaria ahuhdoh beh am?
35 Itobang nam mite pathen'in ka thaneina a konna amite ahuhdoh beh am? Achutile ipi pentah chun Pakaijin Jerusalem hi ka khut a konna ahhuhing jou dia nagelsah mong’u ahidem?” ati.
36 Ahinlah mipite chu Hezekiah in, “Thipbeh un donbut hih un,” tia thu apeh dungjuijun athipbeh un, koimacha apaopoh aum pouvin ahi.
37 Hijou chun leng inpia vaihompa Hilkiah chapa Eliakim, thutanna a lekhasun Shebna, chuleh thusimbu chingpa Asaph chapa Joah chu Hezekiah kom’ah acheuvin lunggim tah in asangkhol abot-eh un, hiti chun lengpa kimupin acheuvin, Assyria sepai lamkai pipuipa thusei chu aseipeh tauvin ahi.