19
Hezekiah In Pakai Panpina Ahol
1 Hezekiah lengpan hiche thulhutna chu ajahdoh phat in, apon abot-eh in, khaodip pon akisil'in Pakai Hou-In na aluttan ahi.
2 Hichun aman leng inpi vaipo Eliakim, thutanna lekhasun Shebna, thempu lamkai hon abon'un khaodip akisil'un Amoz chapa themgao Isaiah kom’ah asol'in ahi.
3 Hiche hi Hezekiah lengpan asei ahi, “Tuni hi lungkham nikho, kisuhjumna le eikinoise na nikho ahi. Hiche hi naosen sohlhago a, ahinla anun nao aso-lhahsahna dinga tha anei joulou tobang ahi.
4 Ahinlah Assyria lengpan a sepai lamkai pipuipa ahinsol’a hingjing Pathen chouna a athusei jouse chu Pakai na Pathen'in hiche engkalna a kiseiho hi ngaihen chuleh ahing nalai keiho chengse dingin Pathen henga hung tao teijin!” ati.
5 Hezekiah noija natong lamkaihon lengpa thuthot Isaiah kom alhut nungun,
6 themgaopa chun hitin adonbut in ahi, “Na pakai pau kom’a chun hitin seipeh un, 'Pakaijin hitin aseije: Assyria lengpan kei douna thuchavai tah aseiho jeh hin lungkham hih hen.
7 Ngaijin! Keima tah in ama douna a pan kalah ding ahi, chutengleh hiche lengpa hin thulamleng khat ajah ding ainlam’a kile ding chuteng keiman katha ding ahitai,'” ati.
8 Hiche kahlah chun, Assyria sepai gal lamkai pipu chun Jerusalem a kon'in Assyria lengpa kom’a kihoutoh dingin agachen ahile, lengpa chu Lachish dalhan Libnah khopi sat dinga ana kondoh in ahi.
9 Hiche joutah chun Ethopia lengpa Tirhakah in asepai te ahin lamkaijin ama sat dingin ahung kon’e tithu ajah phat in, ama chutoh kisatto dinga ache masangin Jerusalem a um Hezekiah chu hiti hin thu athot e:
10 “Hiche thu hi Judah lengpa Hezekiah a ding ahi. Na tahsantah na Pathen chun Assyria lengpan Jerusalem hi alah joulou ding ahi atin, na Pathen chu kilhep lhah sah hih in.
11 Assyria lenghon agot gam leiset ipi aloji uvem, nangin hoitah in nahe in ahi. Koi hileh adou pen-pen ho chu asuhchip jeng’u ahi. Achutile nang chu ichom nahi deh em?
12 Namdang ho Gozan khopi, Haran khopi, Rezeph khopi le Tel-assar munna um Eden khopi mite ho chu, a pathen ho uvin ahuhdoh jou uvem? Kei masanga lenghon ana suhgam’u hilou ham?
13 Arpad khopi leng Hamath khopi chunga ipi soh em? Ivvah, Hena, Sepharvaim lengho itigam hiu hitam?” tin aseijin ahi.
14 Solle ho a konna hiche thuthot hi Hezekiah in amu phat in alan asimtai, Pakai Hou-In'a ache touvin Pakai angah akiphajallin ahi.
15 Pakai ang’a Hezekiah hitin ataovin: “Vo Vantil lhaving nei Cherub te kikah a laltounna a tou, Pakai, Israel Pathen, vannoi leiset a lenggam jouse chung’a Pathen nangbou nahi. Nang bouvin van leh leiset nasem ahi.
16 Vo Pakai, kachung uva thilsoh ho hi vengaijin!, chule Sennacherib in hingjing Pathen douna athuseiho pihi ngaitem’in.
17 Pakai, Assyria lenghon namtin vaipi asuhgam’a, agamsung jouseu asuhbei gam’u ahi.
18 Chule ama hon hiche namdang hon ahou u apathen hou jengjong meiya alelut uva ahal gamu ahitai. Ahi chu Assyria ten a pathen hou chu asuhset uva agovam thei mong’u ahinai, ajeh chu amaho chu mihem khut a kisem, song le thing’a kisemthu doi ho chu ahibouvui.
19 Tuhin, O Pakai, ka Pathen'u, Assyria mite thaneina a kon'in nei huhdoh un, chutileh vannoi leiset a lenggam ho jousen nangma bou hi O Pakai, ka Pathen'u nahi ahet diu ahi,” ati.
Judah Huhdoh A Aum Ding Isaiah Gaothusei
20 Hiche jou chun Amoz chapa Isaiah in Hezekiah chu thu athot in: “Hiche hi Pakai Israel Pathen chun asei ahi. Assyria lengpa Sennacherib chung chang’a nataona kajah peh tai.
21 Chule Pakaijin ama dounan hiti hin thu aseije:
“Nungah theng Zion chanu chun
nangma navetda in nahin nuisat in ahi.
Jerusalem chanu chun
nangma pum chun isahlou tah in alu nahin hih khum’e.
22 Koiham nangin noise tah’a naphin phin chu?
Koi douna thu nasap ham?
Koiham nangin changmel’a navet chu?
Hiche Israel Mitheng te ahiuve!
23 Na thupole’a pangho a kon'in nangman Pakai chu nachouve.
Nangin naseijin, 'Ka sakol kangtalaiho mangchan
molsangtah tah ho kalo uve natin,
heng'e, gamla tah’a um Lebanon chu.
Keiman ka tanbong tai Cedar thing ho
leh Cyprus thing hoipen ho.
Keiman agamlapen aningkoi ho jong kaphajou vin
chule gammang gilpen jong kakholdoh’in ahi.
24 Keiman gamdang ho gamsunga jong twikul kalaidoh’in
chuleh atwi jong kadonin kakisulip e.
Kakeng tenin jong
Egypt vadung jouse ka khamtan uve!'
25 Ahinlah nangin najah khahlou lai ham?
Hiche hi sotna ahitai.
Sotna kanagon pat ahitan,
tua hi kahinso dohsah ding ahi.
Keiman kul kigenkhum khopi ho nasuhchipna ding
nasuhgoihelna dinga kanagon ahi.
26 Hijeh a chu amite ho uvin tha anei joulou’u
chuleh amaho hi kichauva lungboija ahi tauve.
Amaho hi hampa banga thaneijoulou ahiuvin,
hampa hung poudohtil lhonal jing thei tobang ahiuve.
Amaho hi inchunga hampa hungpoudoh til tobang ahin,
akhan sang masanga nisan akahlihji tobang ahiuve.
27 “Ahinlah ken nangma kahei—
hoiya konna nahung,
hoilanga nache chuleh hoiya naum kahesohkeiye.
Ichan geiya keima douna-a nachon jong kahei.
28 Chule hitia hi keima douna a na chelhah jing
chujongleh neidou jing naho keima tah in kajah ahin,
Keiman nanahkuiya nahkhao kabupeh’a,
na nephu tenia kamdal kakoipeh ding nahi.
chutengleh nahung konna
nalampi mama a chu nakinung lekit ding ahi,” ati.
29 Hichun Isaiah in Hezekiah kom’ah, “Kathusei hi adih’e ti nahetna ding phatah chu hiche hi hi ding ahi:
Tukum sunga hi achamcham'a hung kehdoh muchi gabou naneh diu,
akumkit leh hichea kon ma-ma a hung gadoh chu naneh kit dingu ahi.
Ahin kum thum phat vang leh muchi natua konna chu naki-at ding;
chuleh lengpilei jong nabol’a aga naneh ding ahitai.
30 Chuleh Judah gamsunga kidalha chengse,
athimoh ahingdoh chasun chun ajung’u akhothuh chehdiu,
chule hung khangtou cheh uva
hung kisepdoh ding ahiuve.
31 Ajeh chu Jerusalem a konna kamite amoh changse,
Zion molla konna ahingdoh chengse chutoh hung kithejal ding ahi.
Hatchungnung Pakaijin amikhotona a pan alahna chu
ahin tahdoh ding ahi,” ati.
32 “Assyria lengpa chung changa Pakai thusei chu hiche hi ahi:
“Asepai teu chu Jerusalem’a lutlou diu ahi.
Ama hon thal changkhat jong ahin kaplut joulou diu ahi.
Ama hon a-ompho’u puma kelkot pam’a hi kijot loudiu
chujongleh khopi umna dinga leipel aset lou dingu ahi.
33 Lengpa chu gamsunga ahungna lampi mama a
hunglut louding ahi, tin Pakaijin aseje.
34 Kamin loupina ding leh kasohpa David khohsahna jal’a,
Keiman hiche khopi hi kavenbit a ka huhdoh ding ahi,” ati.
35 Hiche jan chun Pakai vantil khat Assyria te ngahmun'ah achen Assyria te sepai 185,000 ho chu aga that tan ahi. Ahing doh Assyria te chu jingkah a athodoh uleh mithilong chu muntin’ah amu tauvin ahi.
36 Assyria lengpa Sennacherib chun ngahmun ahin dalhan, ama gamsunga ahung kile tan ahi. Ama Nineveh khopia a inlam ajonin hichea chun aum tan ahi.
37 Nikhat hi semthu pathen Nisroch chu ahou-in’a aga hou pettah in, acha teni Adrammelech leh Sharezer chun chemjam’in athat lhon tan ahi. Amani chu Ararat gamlang’ah ajam lhon'in acha dangkhat Esarhaddon kitipa chun Assyria lengmun ahinlo tan ahi.