20
Hezekiah Adammo Le Ahung Damdoh
1 Hiche phat laitah in Hezekiah chu aha nat lheh jingin ahileh, Amoz chapa Isaiah themgao chu aven achen ahi. Aman lengpa chu hiche thu hi aseipeh tan ahi: “Hiche hi Pakai thusei ahi: Na insung kisemtoh tan, ajeh chu nang nathi ding ahitai. Hiche na natna a konna hi nakiledoh joulou ding ahitai,” ati.
2 Hezekiah in hiche thu ajahdoh phat in, akiheijin banglang anga’n Pakai kom’ah atao tan,
3 “O Pakai, na ang’a kitah tah le gunchu tah a nakin kabol jing geldoh in, chuleh ichan geiya na lunglhaina a kana um jing ti neihin geldoh peh in,” atin, hijou chun lhasetah in hakan akap in ahi.
4 Hichun Isaiah in lengpa adalhan, ahinla leng inpi thutanna lailung aphah masangin 'Pakaiya kon'in hiche thu hi ahunglhung in:
5 “Kamite lamkaipu, Hezekiah kom’ah gache inlang hiti hin gaseijin, Napu David Pakai Pathen chun hitin aseije: Keiman nataona kajan kasanpeh tai chuleh namitlhi jong kamun, keiman nangma hi kadamsah ding nahitai, tu apat nithum nileh nalupna a konna nathodoh ding Pakai Hou-In'a nache ding ahitai.
6 Keiman nahinkho hi kum som le kum nga kapehbe ding nahi, chuleh hiche khopi hi Assyria lengpa a konna ka huhdoh ding ahi. Keiman hiche khopi hi kamin loupina ding leh kasohpa David khohsahna jal'a kavenbit ding ahi,'” ati.
7 Hichu Isaiah in, “Theichanga kon'in lounang sem’un,” ati. Hiti chun Hezekiah lhacha ten jong hiche lou chu anatna apomlai ho chun anu uvin ahileh Hezekiah ahung damdoh tan ahi.
8 Hichun Hezekiah in Isaiah kom’ah, “Tunia patna nithum nileh kadamdoh a Pakai Hou-In kaija kache thei ding chu Pakaijin ipi melchihna eipeh thei ding ham?” ati.
9 Isaiah in jong adonbut in, “Pakaijin na teppehna bang-banga na damdoh sah ding melchihna chu hiche hi ding ahi. Hiche kalbi leiya nilim khu kalsom amachon ding, nadeijem ahiloule anung chon ding nadei jem?” ati.
10 Hezekiah in jong, “Nilim khu kalsom amchon ding chu abainan hijeh chun kal som nungchon sah tan,” ati.
11 Hijeh chun Isaiah themgao chun Pakai kom’a ataovin ahile, Aman Ahaz kalbi leidoa nilim chu kalsom anungchon sah tan ahi!
Babylon a Hungkon Solle Ho
12 Hiche jou chun, Babylon lengpa Baladan chapa Merodach –baladan chun Hezekiah lengpa kipathu leh thilpeh ahin thot in ahi, ajeh chu aman Hezekiah chu aha nat lheh e ti ana jahdoh ahi.
13 Hezekiah in Babylon’a konna hung palai ho chu anei agoukholna insunga thil jouse chu sana, dangka, gimnamtui ahin thaonamtui ahin avetsah sohkeijin ahi. Aman amaho chu apuijin leng inpi sunga thil kholna a kikhol jouse chu gal manchah ho pum’in avetsah sohkeijin ahi. Aleng inpi sunga ahin alenggam sunga ahin Hezekiah in avetsahlou aum tapon ahi.
14 Hichun Isaiah themgao chu Hezekiah lengpa kom’ah achen hitin aga dongtan ahi, “Hiche ho chun ipi adei uham? Amaho hoiya hungkon hiuvem?” ati.
Hezekiah in adonbut in, “Amaho chu Babylon khopi gamla tah a hung kon ahiuve,” tin adonbut in ahi.
15 “Ama hon na leng inpia hi ipi pi amu uvem?” tin Isaiah in adong'e.
Hezekiah in adonbut in, “Keiman amaho chu kanei jouse kavetsah in, kaleng inpia kanei kagou jouse jong kavetsah sohkeijin ahi,” ati.
16 Hichun Isaiah in Hezekiah kom’a chun, “Pakaiya kon'in hiche thupeh hi ngaijin:
17 Na leng inpia thil jouse, napu napate hon ana khol'u leh tuchan geija um nanei nagou jouse hi Babylon khopi a akipohlut diu nikho chu hunglhung ding ahi. Thilkep ho chu khat a khatcha kidalha louding ahi.
18 Nangma tah chapate phabep jong kikai mang ding amaho chu Babylon leng inpi sunga nukiso ahisah uva soh a pang diu ahi,” atipeh tan ahi.
19 Hezekiah in Isaiah kom’ah, “Hiche thupeh Pakaiya konna eikipe hi apha lheh jenge,” ati. Ajeh chu lengpan ageldan’a chu, “Keima hinkho sung beh in chamna le lungmon umnante,” atin ahi.
20 Hezekiah vaihomlai sunga thilsoh jouse chuleh athaneina sunga ahin, chuleh aman twikul alaija, twilam anasem’a khopi sunga ana lonlutsah ho jouse chu Judah Lengte Thusimbu a aum sohkeijin ahi.
21 Hezekiah athin, hichun achapa Manasseh in lengmun ahinlo tan ahi.