21
Manasseh In Judah Gam'a Lengvai Apoh
1 Manasseh chu leng ahung chan chun ama kumsom le kumni alhingbep in ahi. Ama hin kum somnga le nga sungin vai ahom’in ahi. Anu min chu Hephzibah ahi.
2 Ama hin Pakai mitmu’n thilse jeng ana bollin ahi. Ama hin Pathen'in Israel te masanga ana nodoh pathen neilou nam mite thet umtah chonna ho chu ana juijin ahi.
3 Apa Hezekiah in ana suhmang pathen neilouho doiphung chu atungdoh kit in ahi. Aman Baal maicham jong asemdoh kit in, chule Asherah doikhom jong atungdoh kit in Israel lengpa Ahab bol tobang bangin abollin ahi. Vanthamjol'a thaneiho jouse anga ana bohkhup in chuleh hiche ho chu ahouvin ahi.
4 Pakaijin, “Jerusalem’a kamin um jing ding ahi,” ana tina Pakai Hou-In mun’ah pathen neilouho maicham ana semdoh in ahi.
5 Aman hiche van thanei ho pathen doiphung ho leh maicham phungho jouse Pakai Hou-In mun jousea ana thah tundoh kit in ahi.
6 Manasseh in ama cha tahbeh jeng jong doi pathen ho hounan ana tohdoh in, meiya ana gouvin, themka pou ana dongin, ailhimpou ana bollin, gaochang miho jong atahsan in, mitphel doithem hopou anamang chan ahi. Hiti hin aman Pakai mitmu’n thilse jeng ana bollin Pakai chu ana sulunghangin ahi.
7 Manasseh hin Asherah semthu pathen lim jeng jong ana sem’in, Pakaijin David leh achapa Solomon ana seipehna mun laitah Hou-In sunga chun ana tungdoh in ahi. “Israel phungho jouse lah a konna kana lhendoh Jerusalem khopi leh a Hou-In'a hi kamin hi atonsot na kijabol jing ding ahi.
8 Israel te hin chingthei tah a kathupeh ho leh kasohpa Mose kana pehsa kadan semho hi anit sohkei uva ahileh keiman apu apateu kanapeh gamsunga konna gamdanga sohchanga kasoldoh louhel diu ahi,” ati.
9 Ahinlah hiche mipite hin sei angai pouvin, chuleh Israel te gamtepgam alut uva Pathen neilou namdang te Pathen’in ana suhmang ho sanga phamo joh boldohna ah Manasseh chun ana lamkaiyun ahi.
10 Hiche jou chun Pakaijin alhachate themgao ho mangchan thu ana seijin ahi:
11 “Judah te lengpa Manasseh in thet um tah-tah thil tamtah ana boldoh in ahi. Israel te hiche gam’a achenlut masang uva anacheng Amor mite sangin angoljon ahi. Aman Judah mite hi milim semthu doilim houna a ana chonset sah in ahi.
12 Hijeh chun Pakai, Israel Pathen chun hitin aseije: Keiman Israel te Judah mipite chunga kahin pohlut ding hamsetna hi bilkol neiya jajouse tijatna a kihot ling gam diu ahi.
13 Keiman Jerusalem chunga thu katan ding hi Samaria chung le Ahab insung mite chunga kana tan bang-banga katan tohchet ding ahi. Keiman Jerusalem mipite chu min anneh na kong asop a akhup athalla asop banga ka suhmang ding ahi.
14 Hijou teng chule kamite amoh chengse jeng jong kapaidoh ding chuleh agalmi teuvin achom gam diuva ka pehdoh ding ahi.
15 Ajeh chu ama hon kamitmu’n thilse jeng abol uvin, Egypt a konna apu apateu kahin puidoh apat tuni gei hin eilunghansah jing jengun ahi,” ati.
16 Manasseh in themmona bei mi tamtah athat in, Jerusalem ning langkhatna kon'in ning langkhat geijin themmona bei thisan adimset tokah in athat-that jengin ahi. Hiche hi aman Judah te achonset sah chung chonna chonset abolbe sah nahlai chu ahin, hitia hi Pakai mitmua thilse bolna a ana puilut jing ahi.
17 Manasseh in avaihom sunga thilsoh adang ho jouse chuleh anatoh athibol ho jouse, athilse bol ho jouse pum’in, Judah Lengte Thusimbu a aum’in ahi.
18 Manasseh athi phat in leng inpi honsung Uzza hon a chun anavui tauvin ahi. Hijou chun achapa Amon in lengmun ahinlo tan ahi.
Amon In Judah Lengvai Apoh
19 Amon chu leng ahung chan chun ama kum somni le ni alhingin chuleh aman Jerusalem’ah kumni sung lengvai anapo in ahi. Anu chu Meshullemeth ahin, Jotbah khopi akon Haruz chanu ahi.
20 Ama hin apa bol-bol ana bollin, apan milimdoi ho ana hou ho ma-ma chu ana houvin ahi.
21 Ama hin apa Manasseh in anabol bang-bangin Pakai mitmu’n thilse jeng ana bollin ahi.
22 Aman apu apate Pathen Pakai ana paidoh in, Pakai lampi chu anajui nompon ahi.
23 Hiti chun Amon noija natong pipuiho chun ama dounan tohgon ana neijun aleng inpi sunga ana that tauvin ahi.
24 Ahinlah agamsung mipi ten Amon lengpa douna tohgon ana neiho jouse chu ana that gam’un chuleh ama hon achapa Josiah chu leng mun ana losah tauvin ahi.
25 Amon vaihom sunga anasoh thil dang ho jouse chuleh anatoh thilbol ho jouse Judah Lengte Thusimbu a aum’in ahi.
26 Ama chu Uzza honsung lhan a chun ana vui tauvin ahi. Hijou chun achapa Josiah chu leng ahung chang tai.