22
Josiah In Judah Lengvai Apoh
1 Josiah hi leng ahungchan kum chun ama kum get bou anahi, chuleh aman Jerusalem’ah kum somthum le khat sung lengvai anahom’in ahi. Anu chu Jedidah ahin Bozkath kho a konna Adaiah chanu ahi.
2 Ama hin Pathen mitmu’n thilpha jeng ana bollin, apu David khonung chu ana juijin ahi. Ama hi thildih bolna dinga ana nungchon pon ahi.
3 Ama vaihom kum som le get alhinin, Josiah lengpan Meshullam tupa Azaliah chapa Shaphan chu thutanna munna lekhasunpa chu Pakai Hou-In’ah ana sollin, hiti hin thu anapen ahi,
4 “Nangma thempulen Hilkiah kom'a gache inlang, kotngah pan Pakai Hou-In'a mipi a konna adondoh u sum ho chu simtoh henlang,
5 Hou-In semphatna dinga vaihom ho khutna pelut hen, chutileh ama hon Pakai Hou-In sahphatna a natong ho chu athaman u pehnan mangcha theiyunte.
6 Ama hon thingthembol ho, insa ho chule songkhengthem ho goina a amanchah thei diu ahi. Chujongleh Hou-In semphatna man dingin thing chuleh song kikhengsa ho chule adang Hou-In semphatna dinga ngaichat umho chu chohnan mang uhen.
7 Ahinla insahna dinga vaihom ho chun akhut uva sum hunglut ho chu ajat simtoh suhtoh le kholtoh angaipoi, ajeh chu amaho lungtheng cheh leh tahsan theidol cheh ahinauve,” ati.
Hilkiah In Pathen Danthu Ahin Mudoh
8 Hilkiah thempu lenpa chun thutanna lekhasunpa kom’a chun, “Keiman Pakai Hou-In sunga chun Danbu chu kamudoh tai!” ati. Hichun Hilkiah chun hiche lekhajol chu Shaphan kom’a apen aman jong asim’in ahi.
9 Shaphan chu lengpa kom’a achen thilsoh ho chu alhut in, “Nanoija mopohna neiho chun Pakai Hou-In'a sum hunglut ho chu Hou-In’a natong ho leh tohlamkai ho khutna apelut tauve,” ati.
10 Shaphan chun lengpa chu aseipeh kit in, “Hilkiah thempupa chun lekhajol khat eipe in ahi,” ati. Hichun Shaphan in jong lengpa chu asimpeh tan ahi.
11 Lengpa chun hiche Dan lekhabua kijih chu ajah phat chun, lungkham tah in apon abot eh jengin ahi.
12 Hiche jou chun aman, Hilkiah thempupa, Shaphan chapa Ahikam, Micaiah chapa Acbor, Shaphan thutanna a lekhasunpa chuleh Asaiah lengpa thumop a pang, amaho kom'a chun hiche thupeh apetan ahi:
13 “Nangho cheuvin lang keima leh Judah mipi ho jouse thalhengin Pakai kom’ah tao unlang, akimudoh lekahjol akijih thucheng ho chung chang hi gakhol toh tauvin. Ajeh chu ipu ipateuvin hiche lekhajol kijih thucheng ho dungjuiya hi ana chonlou jeh uvin achung uva Pakai lunghanna hi adeojah jingin ahi. Eihon itohtei diuva kisei itoh diu thil ho chu khatcha jong ihin tong pouvin ahi,” ati.
14 Hijeh chun Hilkiah thempupa, Ahikam, Achor, Shapahn leh Asaiah chu Jerusalem a chenna ding munthah langa chun Huldah themgaonu gadongtoh dingin acheuvin ahi. Amanu hi Harhas chapa Tikvah chapa Shallum jinu, Hou-In a vonchol vesuija pang ahi.
15 Amanu chun amaho kom’ah chun, “Pakai, Israel Pathen chun aseije! Kile uvin lang nahinsol pau kom’a chun seiyun,
16 'Hiche hi Pakai thusei ahi, Keiman hiche khopi le amite chunga hi thohgimna kahin chuhsah ding ahi. Judah lengpan asimdoh hiche lekhajol'a kijih ho chengse hi hung guilhung tei ding ahi.
17 Ajeh chu ka miten eipaidoh tauvin, Pathen neilou namdang te semthu pathen ho kom’ah kilhaina gantha atohdoh tauvin, athilbol ho jouse jeh in keima eilunghan sah lheh tauvin ahi. Hiche mun douna a kalunghan hi deojah jeng ding ahin hiche chu chenmit jou hilou ding ahi.'
18 Ahinlah Pakai hol ding’a nahin sol uvah Judah lengpa kom’a chun cheuvin lang hitin seipeh un: 'Hiche hi Pakai, Israel Pathen'in na thujah thupeh chung changa chun hitin aseije:
19 Nangma na lungkham’in , nang le nang nakisunem lheh jengin, nangin hiche khopi le amite douna a kasei hiche gam hi sapsetna aching ding chule ahomkeo hung hi ding ahi, kiti chu najah phat in lungkham tah in napon nabottel jengin chuleh kisihtah in nakap jah jengin ahi. Hijeh chun keiman tahbeh in na taona chu kajatai tin Pakaijin aseije.
20 “Hijeh chun keiman kateppeh hamsetna chu nangma nathi a lungmong’a nakivui kahsen hin chuhsah taponge. Keiman hiche khopi chunga kachuh sah ding suhgimna chu nangin namutah louding ahi,” ati.
Hiti chun amanu a konna thupeh chu lengpa kom’ah ale pohlut peh tauvin ahi.