23
Josiah In Houdan Asemphat
1 Hijou chun lengpan Judah leh Jerusalem a lamkaiho jouse akoukhom’in ahi.
2 Chuin lengpa chun Judah le Jerusalem a mipi ho jouse toh thempu ho leh themgao hotoh mipi aneopen leh alenpen geijin Pakai Hou-In’ah akilhon khompi in, hichea chun Pakai Hou-In'a kimu Pakai toh kitepna lekhabu chu lengpan mipiho lah a abonchan asimphong in ahi.
3 Lengpa chu thuneina mun khompi panga chun adingin Pakai anga chun kitepna chu pan thah lahna aneipi in ahi. Aman mipi ho jouse kom'a chun, Pakai dan thupeh jouse, chondan ho jouse chu chu alungthim pumpiuva anit sohkei diuvin ngehna aneijin ahi. Hiti hin aman lekha jolla kijih Pakai toh kitepna chu asudet in ahi, chuleh mipi ho jong chun ama cheh in Pakai ang’a kitepna aneiyun ahi.
4 Chuin lengpan Hilkiah thempulen chule ama sanga neojo thempuho chutoh chuleh Hou-In kotngah ho chu Baal houna leh Asherah leh vanlaijol thuneiho houna thil ho jouse chu Pakai Hou-In a konna alahdoh dingun thu apen ahi. Lengpan hiche ho jouse chu Jerusalem polanga Kidron phaicham munnah meiyin ana go-lhah sah tan ahi, avam ho chu Bethel lang’a apo mangun ahi.
5 Tumasang’a Judah lenghon ana pansah u doi houna a kimangcha thempu ho chu aman ana sumang gamtan ahi. Ajeh chu ama hon Judah gamsung jouse ah, pathen neilouho doiphung ang’a kilhaina ana bolji jiu ahi. Ama hon Baal, nisa le lha, ahsi ho leh van thuneina ho jouse ang’a kilhaina ana bolji jiu ahi.
6 Hichun lengpan, Asherah kihouna doikhom jong Pathen Hou-In’a kon'in aladoh in Jerusalem pamlam Kidron phaicham’ah ahallha gam in ahi. Aman doikhom ho chu agoibong in vut ason mipi kivuina lhan chunga athe thang tan ahi.
7 Aman pasal kijoh ho leh numei kijoh ho achennau mun jouse chu aphelhan, Pakai Hou-In sunga akijohnau doiphung jong asuhset peh in, hichea numei hon Asherah ahounau ponlukhuh ding akhon nau ahi.
8 Josiah in, Judah khopi dang danga cheng thempuho jouse chu Jerusalem’ah ahin polut in ahi. Aman Geba le Beersheba kikah a um Pathen neilouho doiphung kilhaina gantha abolnau mun chu asuhboh peh in ahi. Aman Jerusalem a gamvaipo Joshua kelkot a hunglutna munna kithoina doiphung jong ana sumangin ahi. Hiche kelkot hi khopi lutna a kelkot veilanga um’ah ahi.
9 Hiche Pathen neilouho doiphunga thempu ana pang ho chun Jerusalem a Pakai maicham a na atoh diu ana phal pon, amavang thempu dang hotoh cholsolou changlhah aneh diu vang aphal in ahi.
10 Chujou chun lengpan Ben-hinnom phaicham a um Topheth maicham jong chu ana suhboh peh in ahi. Hijeh chun hilai munna hin koiman Molech anga kat ding’a achapa hileh achanu hileh meiya govam dia kilhaina abolsah tapouvin ahi.
11 Aman sakol lim kisemthu Judah leng masa hon nisa houna a ana tundoh jiu jong chu Pakai Hou-In'a kon'in ana ladoh in ahi. Hiche ho chu Nathan-melech kiti nukiso thu kitanna a pipui khat in toh kinaija uma ahi. Lengpan sakol kangtalai nisa houna a ana todoh jiu jong chu ana hallha tan ahi.
12 Leng inpia Ahaz indan chungnung chungvuma inchung’a Judah te leng dang hon ana sem’u maicham phungho chu, Josiah in ana suchip in ana subeijin ahi. Chuleh Pakai Hou-In hongcha teni a Manasseh in anasem maicham jong chu lengpan ana sumangin ahi. Aman ahel hellin ana vochip in, ahel ho chu Kidron phaicham’a ana thethang'in ahi.
13 Solomon lengpan kidah umtah semthu doiho houna dinga Jerusalem solang chuleh Olive mol lhang langa maicham ana tundoh ho chu Josiah in asuhboh peh in ahi. Solomon in ana semdoh doi ho chu, Ashtoreth kiti kidah umtah Sidon mite numei pathen, Chemosh kiti kidah umtah Moab te pathen chuleh Molech kiti Ammon mite pathen ahiuve.
14 Josiah in doikhom jouse ana volhun, chuleh Asherah ahounau doiphung jong ana phuhlhun, hijou chun hiche munho a chun mihem gu le chang ho chu ana thekhum’in, asuhboh peh sohkeijin ahi.
15 Nebat chapa Jeroboam in Israel te ana chonset sahna Bethel’a semthu pathen houna chu ana jep lhun ahi. Aman adoiphung’u chu ana halvam in chuleh Asherah doikhom jong ana hal-lhai.
16 Hijou chun Josiah ahung kiheiyin avekollen ahileh mollanga lhanmol tamtah ho chu ahin mudoh in ahi. Aman aguhou chu ahin chomdoh uva Bethel doiphung ho chu suhbohna dingin achung uva guho chu ahal lhahsah dingin athupeh un ahi. (Hiche thilsoh hi Jeroboam chu kut nikhoa maicham panga ana din phat a hiche thilsoh ding hi Pakaijin Pathen mipa ana phondoh sah ahi).
Chuin Josiah adadoh leh Pathen mipa lhan chu amun, ama chu hiche thilsoh ding ana phongdoh pa chu ahi.
17 “Hiche lhankhuh chu koija ham?” tia Josiah in adongin ahi.
Mipi ho chun, “Hiche lhan hi Judah a konna hung Pathen mipa tunia Bethel’a na nahintoh ding ho ana seidohpa lhan chu ahi!” atiuve.
18 Hichun Josiah in adonbut in, “Hichu limsah hih un, agu jong suboi hih un,” ati. Hijeh chun ama hon ama gu chu ahal tapouve, hitobang ma chun Samaria a kon themgaopa a jong asuloh pouvin ahi.
19 Hiche jou chun Josiah in Bethel’a abol bang bangin Samaria a jong ana bollin ahi. Khopiho sunga pathen neilouho doiphung ho leh a inhou aban vohset peh in ahi. Hiche ho chu Israel leng tamtah in ana tundoh uva Pakai ana lunghan sah u anahi.
20 Hichun Josiah lengpan, pathen neilouho doi houna a thempu a pangho jouse chu amaicham chung tah uva athat in mihem guho chu amaicham chung uva ahallin hiti chun ana suhboh peh jouvin Jerusalem'a ahung kile tai.
Josiah In Kalchuh Kut Aman
21 Chuin Josiah lengpan mijouse het dingin thupeh khat aphongdoh in, “Pakai toh kitepna lekhabu dungjuijin nang hon Pakai na Pathen’u kom’a Kalchuh Kut naman tei-tei diu ahi,” ati.
22 Israel ten thutan vaihom ho khanglai apat a Israel lengte khanglai le Judah lengte khanglai geija jong hitobang Kalchuh Kut hi ana kimang kha talou ahitai.
23 Josiah leng chan kal kum som le kumget alhin kum a bou hiche Kalchuh Kut hi Jerusalem khopia hung kimang pan kit bep ahi.
24 Josiah in gaochang miho jong asumangin, mitpheldoi them ho jong asubeijin, indoi le milim doi kisem tapou chu Judah gamsung le Jerusalem’a amudoh thet umtah thil tapou chu asubei jingin, Pakai Hou-In sunga Hilkiah thempu pan ahin mudoh lekhajol sunga kisun Pakai thusei jouse chu atohdoh thei teina din aboltan ahi.
25 Josiah masang'in ama tobang leng alungthim pumpi le ahinkho lhumkeija chule athaneina jousea Pakai jenga kingaija Mose danthua kisei ho aboncha jui sohkei koima ana umpon, ama nungin jong koima dang ahung umkit tapon ahi.
26 Ahijeng vangin Pakai chu Judah chungah ana lunghang lheh jengin ahi. Ajeh chu Manasseh in thil phalou tamtah ana tohdoh a Pathen ana choudoh ahi.
27 Ajeh chu Pakaijin hitin ana seije, “Keiman Israel katolmang banga Judah jong katolmang soh ding ahitai. Chule Keiman ka lhendoh Jerusalem khopi leh a Hou-In a kamin kija dinga kana lhendoh jong hi kapaidoh ding ahitai,” ati.
28 Josiah vaihom sunga thilsoh dang ho jouse le anatoh jouse hi Judah Lengte Thusimbu a aum sohkeijin ahi.
29 Josiah leng chan laijin Egypt lengpa Neco chun Assyria lengpa kithopi dingin Euphrates vadung lang ana jontan ahi. Josiah in asepai ho akipuijin aga kisatpin ahi. Ahinla Neco in Megiddo mun'a akimaitopin ahileh Josiah lengpa chu ama hon athat tan ahi.
30 Josiah noija sepai lamkai hon atahsa chu sakol kangtalai ah Megiddo a kon'in Jerusalem’ah ahin polut un ama lhankhuh achun ana vui tauvin ahi. Hijou chun agamsung mipi ten Josiah chapa Jehoahaz chu ama khel'in leng achansah tauvin ahi.
Jehoahaz In Judah Gam'a Lengvai Apoh
31 Jehoahaz chu leng ahung chan chun ama kum somni le thum ana lhingtan ahi. Chuleh aman Jerusalem’a lhathum leng ana changin ahi. Anu chu Libnah khopi a konna Jeremiah chanu Hamutal ahi.
32 Ama hin apu apateu chonna bang bangin Pathen deilou jeng ana bollin ahi.
33 Pharaoh Neco in Johoahaz chu Jerusalem’a avaihom louna dingin Hamath gam’ah Riblah mun’ah songkulla aheng in ahi. Chule aman Judah ten dangka pound 7,500 chuleh sana pound 75 kai apeh dingin ana ngeh in ahi.
Jehoiakim In Judah Gam'a Lengvai Apoh
34 Hichun Pharaoh Neco in Josiah chate lah a khat Eliakim kitipa chu apa khellin leng chang dingin atung in, amin jong akhel peh in, Jehoiakim asah tan ahi. Ahin Jehoahaz vang chu Egypt gam'a sohchang dingin apuijin hikom’a chun ahung thiden tan ahi.
35 Pharaoh Neco kom’a kai apeh jouna dingun Jehoiakim in Judah mipite lah a kon'in sana le dangka ama-ama nei le neilou dungjuijin adongin ahi.
36 Jehoiakim chu leng ahung chan kum chun ama kum somni le nga ana lhingtan ahi. Jerusalem'a chun kum som le khat sung vai ana hom in ahi. Anu chu Rumah khopi akon Pedaiah chanu Zebidah ahi.
37 Ama jong hin apu apate bang bangin Pakai mitmu’n thilse jeng ana bollin ahi.