24
1 Jehoiakim vaihom laijin Babylon lengpa Nebuchadnezzar in Judah gam’ah gal ahin sattan ahileh, Jehoiakim in kisatpi louvin ama le agamsung jouse chu Nebuchadnezzar khut ah ana kipelut tan ahi. Aman kum thum sungin kai anapen, chuche jouvin akiphin tan ahi.
2 Hichun Pakaijin Babylon mite, Aram mite, Moab mite, Ammon mite ahin tildoh in Pakaijin themgao ho kam’a ana phondoh sah bang bangin aguilhung tan ahi.
3 Hitobang hamsetna Judah gam’ah ahunglhun hi Pakai thupeh akon ahi. Aman amitmua konna Judah te atolmang kigotna ajeh hi Manasseh in thilse tamtah ana boldoh jeh ahi.
4 Chule Jerusalem a themmona neilou thisan anaso a ana hesosah jeh ahi. Pakaijin hichu a ngaidam lou ahi.
5 Jehoiakim vaihom sunga thilsoh dang ho jouse jong Judah Lengte Thusimbu a aumin ahi.
6 Jehoiakim chu athi phat in, achapa Jehoiachin lengin ahung pang tan ahi.
7 Egypt lengpa hiche jou apat hin gal ahung kondoh jou tapon ahi, ajeh chu Babylon lengpan Egypt hi kagam ahi tia ahopsah chengse chu Babylon lengpan abon'a alahpeh soh ahitai. Aman ana kilahlut gam ho chu Egypt vadung apat Euphrates vadung chan gei ahi.
Jehoiachin In Judah Gam'a Lengvai Apoh
8 Jehoiachin chu aleng chan kum chun ama kum som le kum get alhing tan ahi, chuleh aman Jerusalem chu lha thum bou lengvai anapon ahi. Anu chu Jerusalem akon Elnathan chanu Nehushta ahi.
9 Jehoiachin in apa bang bangin Pakai mitmu’n thilse jeng anabol in ahi.
10 Jehoiachin vaihom sungin, Nebuchadnezzar in Babylon a kon'in anoija sepai pipuiho ahinsol'in Jerusalem ahung umkhum tauvin ahi.
11 Hichun Nebuchadnezzar ama tah jong hiche khopi aum sungu hin ahunglhung tan ahi.
12 Hichun Jehoiachin lengpan lengnu toh ama thumop hotoh, asepai lamkaiho le pipuho Babylon te khut ah akipelut tauvin ahi.
Nebuchadnezzar in lengvai ahom kum get alhin kumin, Jehoiachin chu songkul'ah akhum tauvin ahi.
13 Pakaijin ana phondohsa bangin Nebuchadnezzar in Pakai Hou-In a kon'in chuleh leng inpia kon'in sum le pai, sana dangka, nei le gou ho jouse le, sana a kisem thil ho jouse, Solomon’in Hou-In a ana koiho abonchan achomtheng heltan ahi.
14 Hiti chun Nebuchadnezzar in Jerusalem khopi sung’a cheng jouse, asepai lamkai ho jouse le sepai galsat themho jouse, khut thepna neiho le thilsem themho abonchan mihem 10,000 gal-hingin akaiyun ahi. Gamsung'a chun avaicha kheh ho bou adalha uvin ahi.
15 Nebuchadnezzar in Jehoiachin lengpa, lengnu anu, ajite ho chule apipuiho jaonan Babylon gam'a akaimang tan ahi
16 Chuleh aman sepai ahangsan cheh 7,000 leh khut thepna neiho abon’un mihat galsat thei cheh 1,000 ho chu gam chom’ah asoldoh tan ahi.
17 Hichun Babylon lengpan Jehoiachin pangah pa Mattaniah chu lengin atungin, chule amin jong akhellin, Zedekiah asahtai.
Zedekiah In Judah Gamsung Lengvai Apoh
18 Zedekiah leng ahung chan kum chun ama kum somni le khat ana lhingtan ahi. Aman Jerusalem’ah kum som le khat sungin lengvai ana pon ahi. Anu chu Libnah akon Jeremiah chanu Hamutal ahi.
19 Ahinlah Zedekiah in Jehoiakim bol bang bangin Pakai mitmu’n thilse jeng anabol’in ahi.
20 Jerusalem leh Judah chung’a thilsoh ho achuhna jeh hi, Pakai lunghan jeh ahi. Hijeh chun Pakaijin ama angsunga konna apaidoh a, hitia hi gamchom’a sohchang gam’ah ahi tauve.
Jerusalem Khopi Chim
Zedekiah hin Babylon lengpa a kon'in kiphinna anei tan ahi.