25
1 Hiti chun Zedekiah lengvai ahom kal kum ko alhin kum, Tolbol 15 nin Babylon lengpa Nebuchadnezzar in asepai jouse ahin puijin Jerusalem khopi chu ahin bulu tan ahi. Ama hon khopi chu aum’uvin pal akai khum tauvin ahi.
2 Zedekiah lengpan lengvai ahom kal kum som le khat alhin in, Jerusalem chu galmi ten aumkhum tan ahi.
3 Zedekiah vaihom kal kum som le khat lhin kum'a Lhamul 18 nikhon, khopi sunga neh ding akilhasam'in, akhoh lheh tan, anneh twidon ding akinehchai gam tauvin ahi.
4 Hijou chun khopi pal chu themkhat avutvang’un, chule sepai ho jouse chu ajam gam tauvin ahi. Ajeh chu khopi chu Babylon ten aumkhum chahkheh chule janbkhovah hella achanlhih jeng vangun, pal le pal kikah a lengpa honleiya chun ajamdoh tauve. Amaho chu Jordan Phaicham lang jonin ache tauvin ahi.
5 Ahinlah Babylon sepai hon lengpa chu adellun Jericho phaicham’a chun aman tauve, ajeh chu asepai ten adalhah uva kithecheh gam'a ahi tauve.
6 Ama hon Riblah kho mun'a Babylon lengpa kom alhut tauvin, hilai mun'ah chun Zedekiah lengpa chu achungthu atan tauvin ahi.
7 Ama hon achateu atha peh uchu avetsah un ahi. Hijou chun amit akaldoh peh un sum-eng khaoguija akanun Babylon lang’ah akai tauvin ahi.
Hou-In Kisuhchim
8 Nebuchadnezzar lengpa leng chan kal kum som le ko lhin kum, Lhajing 14 nikhon Babylon lengpa sepai pipui chuleh leng vesui lah a lamkaipa Nebuzaradan chu Jerusalem ahunglhung tan ahi.
9 Hichun aman Pakai Hou-In, leng inpi chuleh Jerusalem a in jouse ahal lhan chuleh khopi sunga insang aphadom jouse jong asuse gam tan ahi.
10 Chujongleh aman Babylon sepai ho jouse chu Jerusalem pal ho avohlhuh sah in, ajet aveija um jouse jong asuhset sah sohkeijin ahi.
11 Babylon lengpa tahsa vesuija pang ho lamkaipa Nebuzaradan chun, Jerusalem khopi sunga ana kidalha mipi amoh chengse, Babylon lengpa lang’a ana pang chengse chutoh mipi ahon jamah amoh chengse chu sohchang dingin ahin toldoh tauvin ahi.
12 Hichea hin Sepai lamkaipa hin mipiho lah a avaichapen ho chu lengpilei leh lou lhou dingin adalhan ahi.
13 Pakai Hou-In maiya sum-eng khom kiphut ho leh Pakai Hou-In sunga sum-eng twikonglen atunna sum-enga kisem chengse jong chu Babylon sepai ten avochip del'un, sum-eng chengse chu Babylon lamah akipoh tauve.
14 Chujongleh Babylon mite chun bel jouse le tupheng jouse jong, chaiche ho ahin gimnamtui halnamna lhengho ahin, Hou-In kin bolna dinga kisem sum-enga kibol um le bel, lheng le kong abonchan akipoh mang tauve.
15 Sepai lamkaipa Nebuzaradan chun gimnamtui kihalna le kong ho chule sana le dangka thengsel'a kisem thil dang-dang ho jouse jong akilah gam’in ahi.
16 Sum-eng’a kisem khompi teni, twikonglen, akhom atunna tenia kimang um le bel, lheng le konga kimang sum-eng chengse chu agihdan anasa behseh jengin tejou hilou ahi. Hiche thilkeo ho se-se hi Solomon lengpan Pakai Hou-In'a pang dinga anasem ho chu ahi.
17 Khomkhat chu asandan feet 7-1/2 alhingin, aluvum'a chu alutom ding sum-enga kisem asandan tong thum cheh alhingin,chule khut them lah a kijempah a kolbuthei pahcha jem banga aluvum kimvella kisem sohkei ahi.
18 Nebuzaradan, sepai lamkaipa chun thempulen Seraiah le thempu ni lhinna Zephaniah kitipa chutoh kelkot ngah a pangji mithum chutoh sohchang dingin akai mangin ahi.
19 Chujongleh khopi sunga akisel nalai mipi holah a kon'in, Judah te dia gal lamkaipa leh lengpa thumop a pang mi nga, sepai te gamsungmi simtoh le a pang alamkai pauvin lekhasun’a amanpa leh khopi sunga kimandoh mi somgup chutoh ana kaimang than ahi.
20 Sepai lamkaipa Nebuzaradan chun, amaho jouse chu Riblah khomun ah Babylon lengpa henga ahinkai luttan ahi..
21 Riblah kho Hamath gamsunga chun Babylon lengpan abonchauvin adengin athat sohtai. Chuin Judah mite chu agamsung uva kon'in sohchang din aki kaimang soh tauvin ahi.
Gedaliah In Judah Gam'a Vai Apoh
22 Hijou chun Nebuchadnezzar lengpan Shaphan tupa, Ahikam chapa Gedaliah chu Judah gam’a hung kidalha mipi ho chunga gamvaipo dingin ana pansah in ahi.
23 Babylon lengpa Nebucahdnezzar in Gedaliah kitipa hi gamvaipon apansah tai ti Judah mi sepai ho leh apipui houvin ajah phat un, ama hon Gedaliah chu Mizpah a kimupi din ana cheuvin ahi. Amaho chu Nethaniah chapa Ishmael, Kareah chapa Johanan, Netophath khomi Tanhumeth chapa Seraiah, Maacath khomi chapa Jezaniah chule akho midang jouse ahiuve.
24 Hichun Gedaliah chu amaho kom’a chun akihahsel’in hitin aseije, “Ima kichatna le tijatna nei hih hellun, gamsunga chun lungmong in chengun, chule Babylon lengpa thu hi ngaiyun, chutile nangho dinga ima jouse phajeng ding ahi,” tin alungmon sah’un ahi.
25 Ahivangin hiche kum'a lhasagi lhin phat in leng insunga peng mi, Elishama tupa Nethaniah chapa Ishmael chu sepai somkhat toh ahung kon'in Mizpah khoa hin Gedaliah leh Judah mite toh Babylon mite umkhom apanpi chengse chu ahung delkhum'un athat tauve.
26 Hiche jou chun Judah ho aneova pat alenpen geijin chujongleh asepai lamkaiho geijin kichatah in Egypt lang’ah ajam gam tauvin ahi, ajeh chu Babylon miten i-ahinlo diu ham tichu kicha a ahiuve.
Jehoiachin Babylon Gam'a Hung Kilhadoh Le Kijabol
27 Judah lengpa Jehoiachin sohchanna kum somthum le sagi lhin kum'in Evil-merodach chun Babylon lengmun ahinlo tan ahile, Jehoiachin chu akhoto in songkul'a kon'in alhadoh tan ahi.
28 Ama hin Jehoiachin chu ngailutna neitah in akihoupi in, Babylon’a leng dang kihen ho sangin mun sang apen jana ana pen ahi.
29 Aman Jehoiachin chu songkul von khel chun vonthah anapen chuleh ahinkho lhung keija lengpa toh an nekhom dingin phalna ana pen ahi.
30 Hiti chun Babylon lengpan ahinkho lhumkeiya niseh a aneh ding an agontoh peh in, ama neh ding chan khat akisem jing jeng tan ahi.