2
Elijah Themgao Van'a Lahtouva Aum
1 Pakaijin Elijah chu chimpei mangchan vanna alahtou ding konin Elijah leh Elisha chu Gilgal a kon’in ahung kijot lhon'in ahi.
2 Elijah in Elisha kom’ah “Nangma hiche mun ahin ana umtan, Pakaijin keima Bethel chan geija che dingin eiseije,” ati.
Ahin Elisha’n adonbut in, “Hing jing Pakai leh nangma hinlai sen, Keiman nangma ka dalhah louhel ding nahi!” ati. Hiti chun amani Bethel kho ah akijotlut lhon tai.
3 Themgao kiloikhom phabep ho chu Bethel’a konin Elisha komah ahungun hitin ana dong tauve, “Tunia hi Pakaijin na pupa hi nanga konna alahtou ding ahitai ti nahet hinam?” atiuve. Elishain adonbut in, “Kahenai, ahin, hiche thua hin thipbeh in um uvin,” atin ahi.
4 Chujouvin Elijah in Elisha kom’ah, “Nangma hikom’a hin ana umtan keima vang Pakaijin Jericho chan che dingin eideije,” ati. Ahin Elisha’n adonbut kit in, “Hinjing Pakai leh nangma na hinjing laisen keiman na dalha ponge” ati. Hiti chun Jericho geijin achekhom kit lhontai.
5 Hijou chun Jericho a kon'in themgao phabep Elisha kom’ah ahungun, “Pakaijin napupa hi nanga konna tuni nikhoa hi alahmang ding ahitai ti nahet hinam?” atiuve.
Elisha’n adonbut in “Kahenai, ahin thipbeh in um'un,” atin ahi.
6 Hijeh chun, Elijah in Elisha kom’ah aseijin “Hichea hin ana umtan ajeh chu kei hi Pakaijin Jordan Vadung geija che dingin aseije,” ati.
Ahin Elisha’n adonbut in, “Hinjing Pakai leh nangma nahin jing laisen, Keiman nangma dalha ponge” ati. Hiti chun amani akijot kit lhon tan ahi.
7 Themgao honho lah a kon'in mi somnga acheuvin Elijah leh Elisha Jordan vadung chan gei akijot lhon chu agalvet un ahi.
8 Hichun Elijah in aponsil chu ajel tumin twi chung chu ajep a ahileh vadung chu ahung kikhen in, anilhon chun agalkai lhon tan ahi.
9 Amani agalkai lhon phat in Elijah in Elisha kom’ah, “Keima lahtouva kaum kah a ipi kabolpeh thei ding um am seijin,” ati.
Chuin, Elisha’n adonbut in, “Nangma thalheng kahi theina dingin na lhagao chan hi jatni in nei chansah in,” ati.
10 Elijah in adonbut in, “Nathil thum hi thil hahsa tah khat nathum ahi, ahin nangin keima hi nanga konna lahtouva kaum neimua ahileh nathum chu namu ding ahi,” atipeh in ahi.
11 Hitia chu amani kihoulim puma akijotpet lhon chun, pohphungin sakol kangtalai meikong pum in ahung kilah in, meikong lomlah a chun sakol in ahin kaijin ahi. Amani kikah a chun atollut in, amani chu asep khen lhon'in, Elijah chu chimpaijin van langa apuitou tan ahi.
12 Elisha’n hichu amun apengjah jengin, “Hepa! Hepa! Keiman Israel te sakol kangtalai leh sakol kangtalai tol ho kamun ahi!” ati. Chuin Elijah chu akom'a konna amuphah lou phat in, Elisha’n lungkham tah in apon chu abot-tel in ahi.
13 Elijah lahtouva aum phat in, ahung lenglha Elijah ponchol chu Elisha in akilah tan ahi. Hijou chun Elisha chu Jordan Vadung panga chun ahung kile tan ahi.
14 Aman vadung twi chu Elijah ponchol chun ajep in hitin asamtan ahi, “Elijah Pakai, Pathen chu hoiya umma ham?” ati. Hichun vadung chu akikhen in Elisha agalkai tai.
15 Jericho a konna themgao kiloikhom ho chun Jericho a kon'in thilsoh chu agalmu uvin, hiti hin asam tauvin ahi, “Elijah lhagao chu Elisha chunga achutai,” atiuve. Amaho chu ama kimupi dingin acheuvin amasanga tol’ah abohkhup un,
16 “Hepu, nangin thu neipe uvin lang keiho lah a ahat cheh mi somnga in gammang lah a hi napupa hol uvinge. Ijem atileh Pakai lhagaovin molchung ham, phaicham ham khatna adalhah maithei ahi.” atiuve.
Elisha’n adonbut in, “Ahipoi, sol hih in,” ati.
17 Ahinlah ama hon asei tei-tei jengun ahileh, aman anil nomlou phat in, “Aphai sol tauvin,” ati. Hichun mi somnga in nithum lhingset ahol un amu pouvin ahi.
18 Elisha chu amaho hung kilekit geijin Jericho a ana um nalaijin ahi. “Che hih un kati hilou ham?” ati.
Elisha’n Thil Kidang Abol Masah Pen
19 Nikhat hi Jericho khopia lamkai hon Elisha chu ahung kimupi uvin, “Keihon boina khat kanei uve, Hepu” ahung tiuve, “Nangin namu bangin hiche khopi nomtah le hoitah ahi. Ahinla twi ahah in chuleh agam leiset a jong hin ima aputpon ahi,” ahung tiuvin ahi.
20 Elisha’n amaho kom’ah, “Khonthah khat a chi hinchoijun,” ati. Hichun ama hon jong ahin choijun ahi.
21 Hijou chun, aman hiche khopi sunga twi hung lonlut patna twinah a chun chi aga seplut in hitin aseitai, “Pakaijin hitin aseije: Keiman hiche twi hi kasutheng tai. Hichea kon a hi thina le ga phalou um talou ding ahi,” ati.
22 Hiti chun Elisha’n asei bangin hiche nikhoa pat chun twi chu atheng jeng tan ahi.
23 Elisha’n Jericho chu adalhan Bethel lam ajontan ahi. Hitia chu lamlen na achejing lai chun, hiche khopi sunga konna chapang phabep in atot khum’un noise tah in. “Lutolpa, chedoh in!, Lutolpa, chedoh in!” atiuvin ahi.
24 Elisha akiheijin amaho chu aven Pakai minin asamse tan ahi. Hichun gammang lah a kon'in Vompi ni ahung potdoh in chapang somli le ni chu abot tellun athat gamtan ahi.
25 Hichea kon chun Elisha chu Carmel Mol ajonnin khonungin Samaria langa akile in ahi.