3
Israel te Le Moab Gal Kisat
1 Judah gam’a Jehoshaphat leng vaipoh kum som le get kum chun Ahab chapa Joram in Israel te chunga vai ana pon ahi. Aman Samaria khopia kum som le ni vai ana pon ahi.
2 Ama hin anu le apa tobang lom in thilse ana bolpon ahinlah Pathen mitmu’n thilse jeng ana bollin ahi. Ama hin apan ana tundoh Baal houna dia apan ana tun khompi theng ho vang ana volhun ahi.
3 Ahijeng vang'in Nebat chapa Jeroboam in Israel mipite ana chonset sahna hiche chonsetna chu ana chejompi jingin ahi.
4 Moab mi Mesha lengpa chu kelngoi chi punsah mi anahi. Ama hin Israel lengpa hi kumseh a kelngoi 100,000 chuleh kelchal 100,000 mul anapehji ahi.
5 Ahinlah Ahab athi phat in Moab lengpan Israel lengpa ana doutan ahi.
6 Hijeh chun Joram lengpan jong Samaria a kon'in Israel sepai gangtah in ahin toldoh in ahi.
7 Lampia chun Judah lengpa Jehoshaphat chu thu thot in, “Moab lengpan kei dounan gal ahin boltan ahi. Amaho toh kisatna dinga hi neihung panhu thei ding hinam? atin ahi.
Hichun Jehoshaphat in adonbut in, “Ibola kahung da ding ham? Nang le kei thakhat ihi chula em? Kei sepai ho chu nang sepai ahin, ka sakol ho chu nang sakol ahi,” ati.
8 Hijou chun Jehoshaphat in adongin, “Hoiche lampi iho ding ham?” ati.
Joram in adonbut in, “Edom gamthip noija konna inokhum ding ahi,” ati.
9 Hichun Edom lengpan jong ahin jop in, athum’un nisagi sungin gamthip noija chun avel lamin akitollun ahi. Ahin mihem le gancha dingin twi anei tapouvin ahi.
10 “Ipi iti diu hitam?” tin Israel lengpa chu ahung pengjah jengin ahi. “Pakaijin ithum uva Moab lengpan ajo dinga hi eihin puilut u hita hila,” ati.
11 Ahin Judah lengpan Jehoshaphat in, “Ilah uva themgao jaolouva ham? Aum'a ahileh i-iti diuham idoh theiju ahi,” ati.
Joram lengpa noija lamkai khat in ahin donbut in, “Shaphat chapa Elisha chu hikom’a aum'e. Ama hi Elijah noija natong ahi,” ahin tin ahi.
12 Hichun Jehoshaphat in, “Ama kom'a hi Pakaijin thu aseiji ahitai,” ati. Hiti chun Israel te, Judah te chule Edom leng ho chu Elisha gadong dingin ache tauvin ahi.
13 Elisha’n Israel lengpa kom’ah, “Ipi dinga kei kom’a nahung uham? Nanu le napa themgao kom’a nacheu le iti ham?” ati.
Hichun Israel lengpa Joram chun ahipoi, “Pakaijin leng thum ho hi Moab lengpan ajo dinga eihin puilut u ahi bouve,” ati.
14 Elisha’n adonbut in, “Keiman kahou Hatchungnung Pakai minna kasei ahi, Judah lengpa Jehoshaphat kaja lou hileh nang hi kadonlou ding nahi.
15 Koipen nahiuvem, nalah uva semjang saithem naum uvem? Ama chu kakom’a hinpuilut un,” ati.
Semjang chu asaipeh phat un Pakai thahatna chu Elisha chunga ahung chutan ahileh,
16 aman hiti hin aseipeh tan ahi, “Pakaijin aseije: Hiche phaicham hi twi dimna twikul hung hi ding ahi.
17 Nanghon hui le go gin najah lou diu ahi, ahinla hiche phaicham hi twi hung dimset ding ahi. Chutengleh, nang hon nangho ding leh na gancha ho leh ganhing dang ho dinga jong nanei letset diu ahi.
18 Ahin hiche hi Pakai dinga imacha ahipoi, ajeh chu aman Moab sepai te chunga jong gal najosah diu ahi.
19 Nanghon akhopiu phalai ho jouse jong chuleh kul kigetkhum ho jong nalah diu, athingphung phalai jeng jong nalah diu, natuh chai diu, atwikhuh hou jeng jong na dippeh diu agam phalai jouse jong song na dipsah diu, na suhmang peh diu ahi,” ati.
20 Ajing nikho jingkah gan kilhai phat donin, phulou helouvin twi ahung putdoh tan ahi! Hichu Edom lang ngen'ah alongin, chomlou kah in muntin'ah twi aum tan ahi.
21 Langkhat ah galmi thum, amaho doudin ahung kitol’e tithu Moab miten ajahdoh phat un, ama hon chempai kiko theibep chan geijin gamgi dungjui chun akigol jengun ahi.
22 Ahinlah ajing jingkah in, athoudoh un ahile nisa chun twi chung chu akhon ahileh Moab mite ding chun asan in, thisan abangtan ahi.
23 Moab miten asam’un “Hiche khu thisan ahi! Galmi thumho khu amaho le amaho kithat touva ahitai - Moab mite cheu hitin athil’u gakichom uhite!” akitiuve.
24 Ahinlah Moab mite chu Israel te ngahmun ahunglhun phat un, Israel galmi ho chu alhaidoh un amaho chu anokhum un, Moab gam geijin ano uvin achejom’un thil jouse asubei soh jengun ahi.
25 Ama hon akhopi hou chu asubeijun, agam phalaiho jouse chu songin adip un, atwikhuh hou asubing un, athingphung pha jouseu aphuh lhuh peh un ahi. Ajona in Kir-hareseth leh asongbang ho bou akhen tauvin, ahin song septhem hon aumkimvel un anokhum tauvin ahi.
26 Moab lengpan gal alel chu amudoh phat in chemjam lamthei cheh mi 700 toh Edom lengpa komlang chu phut vonga jamdoh agouvin ahileh ajou tapouvin ahi.
27 Hijou chun Moab lengpan achapa tahpen, ama khel a leng chang dingpa chu aman’in pal chunga chun kilhaina dingin atohdoh tan ahi. Hijeh chun Israel chungah lunghanna nasatah ahung chutan ahileh Israel te akinung heijun agamlang uvah akinungle tauvin ahi.