5
Naaman Kiboldam
1 Aram lengpa hin asepai lamkaipa Naaman hi ajabol lheh jengin ahi. Ajeh chu Pakaijin ama hi amangchan galjona thupi tah-tah ana pejin ahi. Ahinla Naaman hi mihangsan galsatje themtah anahi vangin, ama hi miphah ana hin ahi.
2 Ama hin agalsatna a Israel gam hi ana delkhum’in gal-hing tamtah ahin mat lah ahin nungah chapang khat ana pang khan ahileh ajinu jen dingin ana pansah in ahi.
3 Nikhat hi hiche nungahnu hin apinu kom’a, “Kapupa hi Samaria um themgaopa khu gaki mupi leh aman aphah hi aboldam peh tei ding ahi,” ati.
4 Hiche Israel a konna nungah chapangnu thusei chu Naaman hin lengpa kom’ah aga lhut tan ahi.
5 Aram lengpan, “Chenlang themgaopa chu gakimupi tan kenjong Israel lengpa kom’ah nang chung changah lekha thot nange,” ati. Hichun Naaman akipatdoh in kipa thilpeh dingin dangka pound 750, sana pound 150 chuleh pon hoitah tah jatsom akipoh in ahi.
6 Israel lengpa dinga alekhajih chun hitin aseijin ahi: “Hiche lekha pum'in ka lhachapa Naaman hi kahinsol'e ahithei leh aphahna hi hin boldam peh in,” ati.
7 Hiche lekhathot hi Israel lengpan asimdoh phat chun avon abottel jengin, hitin aseitan ahi, “Hiche pa hin kakom’a miphah khat boldam dinga ahinsol hi kei Pathen kahi beh a, ken mihem kahinsah a kathisah thei beh ding ham? Ama hin kisatpi dinga eichouna ahi bouve,” ati tai.
8 Ahinlah Pathen mipa Elisha chun Israel lengpan avon abotse jenge ti ajah phat chun hitin thu athot tan ahi, “Ibol'a lunghang’a nahim? Hiche Naaman chu keikom’ah hinsol tan chutileh aman Israel telah ahin themgao dihtah chu aum'e ti henante,” ati.
9 Hichun Naaman chu asakolte toh akangtalai toh Elisha kotbullah angah tauve.
10 Ahinlah Elisha’n ama kom’a chun thu agah thot in, “Chenlang Jordan vadunga khun sagi vei gaki delut lechun navun chu hung kiledoh intin chuleh na phahna jong damdoh tan nate,” atin ahi.
11 Ahinlah Naaman chu alunghang in, akihei mangin hitin aseije, “Keima geldanin ama hung potdoh intin, eiki mupi intin, ka phahna chungah hin akhut hin peilen tin, Pakai a Pathen min hinpan intin eidamsah ding ham kati ahi,” ati.
12 Hiche Israel te vadung ho jouse sanga hi Damascus a hung longlut Abana le Pharpar vadung teni hi phajo louding ong? Hichea chu kaki delut leh kadam jeng louding ong?” atin Naaman chu akihei mangin lunghang tah in achemang jeng tan ahi.
13 Ahinlah anoija asepai te chun hetthem sah tei agouvin hitin aseijun, “Hepu, themgaopa hin, thil hahsa khat tong dinga nasol leh ibola nabolda ding ham? Aman chenlang gakidelut in chutileh nadam ding ahi ati chu nabol jeng leh iti ham!” atiuvin ahi.
14 Hichun Naaman chu Jordan vadunga aga chesuh in themgaopan aseipeh bang-bang chun sagi vei aga kidelut in ahileh ahung damdoh in avou jong chapang voutoh abang jeng tan ahi.
15 Hijou chun Naaman le aloi ho cheng chu Pathen mipa kom’a dingin ahung kile tauvin ahi. Amaho amasanga adingun Naaman in hitin aseije, “Israel gam tilou vannoi leiset gam danga hin Pathen aumpoi ti kahe chentai, hijeh chun nasohpa a kon'in kipa thilpeh hi nei sanpeh tan,” ati.
16 Ahin Elisha’n adonbut in, “Keiman kahou jing Pakai minna kasei ahi, keiman thilpeh imacha kilah ponge,” ati. Naaman in kilahsah tei agot vang'in Elisha anom pon ahi.
17 Hichun Naaman'in, “Aphai ahileh sakol ni poh khopset hiche leiset hi ka inlanga kipoh ingting tua pat in Pakai kom tilouvin semthu pathen dang kom’ah kilhaina gantha bol taponge.
18 Ahinla hiche thil khat chunga vang hin Pakaijin eingaidam hen. Hiche kapu lengpa hi Rimmon munna, milimdoi houva ache tengleh keima banjanga kingaiji ahin, keima jeng jong kabokhup teng Pakaijin nasohpa hi hiche thudolla hin eingaidam hen,” ati.
19 Hichun Elisha’n ajah a “Lungmongin chetan” atin, Naaman in jong a inlang ajontai.
Gehazi Duamna
20 Ahinlah Pathen mipa Elisha sohpa Gehazi hi ama le ama akihouvin, “Kapupan Aram mipa thilpeh khatcha lalouva asoldoh jeng hi adihpoi, hingjing Pathen minna kasei ahi keiman del ing kating themkhat beh kalah ding ahi,” ati.
21 Hiti chun Gehazi hin Naaman nung adeltan ahi.
Naaman in Gehazi in ahin nungdel chu amu phat in, asakol kangtalaija kon chun ahung kumlhan, “Ima jouse pha-pha a hinam?” ati.
22 Gehazi in “Aphanai, Ephraim gam’a kon'in themgao gollhang ni tutah chun ahung lhon'in ahileh kapupan nakom’a eihinsol ahi. Aman dangka pound 75 leh pon hoi jatni hi amani peh dingin angaichan hijeh a chu eihin sol ahi,” ati.
23 Naaman in jong, “Dangka nasei jatni chu kilah in” atin, ponhoi jong jatni apen sum chu sakhaoni in achun in asohte mini achoisah in ahi.
24 Khopi chu alhun phat un Gehazin soh tenia kon chun thil chu alan amani alesol tan ahi. Hijou chun ama chan thil ho chu insunga asel tan ahi.
25 Ama a Pakaipa kom'a agalut chun Elisha’n, “Gehazi hoiya nache ham?” ati.
Aman “Hoikom'a kachepoi” ati.
26 Ahinlah Elisha’n, “Naaman asakol kangtalaija konna ahung kumlhah a nakimuto lhonna chu keima lhagaova hiche kom’a chu kaum nahet louham? Hiche phat chu sum le pon kilah phat hija, Olive thingboh le lengpilei kilah phat hija, kelngoi le bongchal te kisan phat, soh pasal le soh numei tampi kisan phat mong hinam?” ati.
27 Hitobanga nachon jeh hin Naaman phahna hi nang le nason napah ho chunga atonsot geijin chuta hen,” ati. Gehazi chu indan sunga konna agah potdoh leh apum changin aphah in; avun jong buhbang bangin abang letlut jeng tan ahi.