6
Elisha In Heichang Akiletdoh Sah
1 Nikhat hi themgao honkhat Elisha kom’a ahung uvin hitin aseijuve, “Nangman nahet ma bang hin nang toh ikimuto nau mun hi aneo behseh jenge.
2 Jordan Vadung langa chesuh uhitin thing gatan uhitin ikikhop khomna diu munthah khat kisahdoh uhite,” ahung tiuve.
Hichun aman adonbut in, “Aphai, nasei bangun bol uhite,” ati.
3 Amaho lah a khat in atem’un, “Neihung kilhonpi uvin,” ati.
Aman jong, “Hung nange,” ati.
4 Hichun Elisha jong amaho chutoh akilhon tan ahi.
Jordan aga lhun phat un, ama hon thing akitan tauvin ahi.
5 Ahin amaho lah a khat chun thing atan pet in aheichang chu vadunga alhahsah tan ahi. Ama jong ahung peng jah jengin, “Vo, hepu! hiche heicha chu mi a kahin lah ahi,” ati.
6 Pathen mipan ahin seijin, “Hoilai donna nalhah sah ham?” ati. Aman jong amun avetsah phat chun Elisha’n molkhat alan amun laitah a chu aga kholut a ahileh heichang chu twichungah ahung kiletdoh tan ahi.
7 Hichun Elisha’n, “Kilah in,” ati. Hichun mipan asangin akimat tan ahi.
Elisha Le Aram Mite
8 Aram lengpa chu Israel te toh akisatto laitah chun, ama asepai lamkaite toh akihoutoh un hitin asei uve, “Eihon isepai teu chu hilai mun khat a ngahmun kisem ute akitiuve.”
9 Ahinlah apettah chun Pathen mipa Elisha’n gangtah in Israel lengpa ana hilchah in, “Hichelai munna chun che hih un ajeh chu Aram ten asepai teu chu hilai munna chu changpang a ana um diu ahi,” atipeh tan ahi.
10 Hiti chun Israel lengpan Pathen mipan aseipehna mun mun’a chu asepai te asolji ahi. Kiging jing’a aum jing theina ding un, phatseh in Elisha’n Israel lengpa chu aseipeh jingin chule ana hilchah jingin ahi.
11 Aram lenpa chu hiche chung chang’a hin, alunghang lheh jeng tan, hijeh chun aman anoija lamkai pipu ho chu akou khom’in hiti hin aseitan, “Koipen hi galmi langa pang naum uham? Koipen hin Israel lengpa hi kei tohgon ana seipeh jiuham?” ati.
12 Hichun anoija lamkai pipuho khat in ahin donbut in, “Lengpa, ka pakai, keiho kahi pouve, Israel te lah a hin Elisha kiti themgao khat aumin, ama hin lengpa hi ijakai aseipehji ahi. Ama hin nachanga na jalkhunna naumpetna na thusei jouse jong hi ahet ahi,” atipeh tan ahi.
13 Hichun lengpan thu ahin pen, “Cheuvin lang ama chu hoiya um’aham, gahe chen unlang keiman ama man ding chu ka sepai te kasol ding ahi,” ati. Hiti chun ama hon jong aga hetoh un,
“Ama hi Dothan a aum'e,” tin ahung seipeh tauvin ahi.
14 Hichun Aram lengpan hiche khopi sung um dingin sepai tamtah leh sakol kangtalai tamtah asol tan ahi.
15 Pathen mipa sohpa chu jingpitah in ahung thouvin, pam lang aga potdoh leh sepai tamtah leh sakol kangtalai tamtah muntin’ah amutan ahileh, Elisha kom’a chun, “O, hepu, i-iti ding hitam?” tin apeng jah jengin ahi.
16 Elisha’n ama kom’ah, “Kicha hih in, amaho sangin eini panpiho atamjo uve,” ati.
17 Hijou chun Elisha jong ataovin, “O Pakai, amit hin hadohsah inlang, hin musah tan,” tin ataovin ahileh, Pakaijin gollhangpa mit chu ahadohsah tan ahileh Elisha vella molpang ho chu sakolte le akangtalai ho meikongin atom ana dimset in ahi.
18 Aram sepai te chu Elisha man ding’a ahungsuh phat uchun, Elisha ataovin, “O Pakai amaho hi amit u suhchot pehtan,” atin ahileh Elisha’n angeh bang bangin Pakaijin amit u asuhchot pehtan ahi.
19 Hichun Elisha apotdoh in amaho kom’a chun, “Nahung nau hi adih tapoi hiche hi nahol u khopi chu ahipoi, neihin juijun, keiman nahol nau kom’a chun napuilut nauvinge” ati. Hiti chun amaho chu Samaria khopia chun apuilut tan ahi.
20 Samaria khopi chu alhun phat un, Elisha ataovin, “O Pakai tun amit u hasah kit inlang kho musah tan,” ati. Hiti chun Pakaijin amit u ahasah in ahileh amaho Samaria khopi alailunga um ahiu akimudoh tauvin ahi.
21 Israel lengpan amaho chu amudoh phat in Elisha kom’a chun ahin samjah jengin, “Hepa, hiche ho hi ka thagam ding hitam? Ka thagam ding hitam?” ahintin ahi.
22 Elisha’n ahin donbut in, “Natha thei louding ahi! Gal-hing’a kiman ho hi kithatji ngai em? Aneh diu le adon diu joh pen lang aputeu kom langa nungsol tauvin,” ati.
23 Hiti chun lengpan ankong thupitah ahin sem’in, anehsah in, apupau kom langa alesol tauvin ahi. Hichejou chun Aram gal miten Israel gam ahin nokhum tapouvin ahi.
Samaria Khopi Aram Ten Aumkhum'u
24 Ahin phat chomkhat set jou hin Aram lengpa Ben-Hadad in agal mite jouse atit khom’in Samaria khopi ahin umkhum tauvin ahi.
25 Hijeh chun khopi sunga chun kellhahna nasatah aum tan ahi. Khopi aumkhum nau chu asot lheh jengtan ahileh sangan luchang khat chu dangka somget in akijoh in, gam louthul til jeng jong atena khat hoplia hopkhatna chu dangka nga in akijoh tan ahi.
26 Nikhat hi Israel lengpa chu khopi pal chunga chun avahlelen ahileh numei khat in ahin kouvin, “Kapu lengpa, lungset tah in nei kithopin,” ahin tin ahi.
27 Chuin aman adonbut in, “Pakaijin nakithopi louleh keiman ipi kabolpeh thei ding ham? Keiman changvohna pholla kon'in chang la kanei tapon, lengpitwi jong aheh lhahna a kon'in kanei tapon hoiya ipi kalah a nang kapeh ding ham?” ati.
28 Ahin lengpan adongin “Ipi ham na hahsatna,” tin adongin ahileh
amanun adonbut in, “Hiche numeinu hi kakom’ah ahungin tunin nang chapa chu nehitin jingleh kei chapa nena hite atin,” ahi.
29 Hijeh chun kei chapa kakihon lhon'in kane lhontai, ajingin ama chapa kitha hitin neta hite kati leh aman akisel mangtai,” ati.
30 Hichun Lengpan hiche thu hi ajah doh phat in lunghangtah in apon abottel jengin ahi. Hitia chu lengpa pal chunga avalena a chun mipi hon khaodip pon akisil chu amu uvin ahi.
31 Lengpa apengjah jengin, “Tuni tah a hi Elisha luchang katan louleh Pathen’in keima eithat jenghen” tin akihahsel jah jengtan ahi.
32 Hitia chu lengpan akou dia mi asol chun, Elisha chu Israel upaho toh a insungah ana toukhom’un, akoupa chu ahunglhun masang'in Elisha’n upaho jah achun, “Hiche tolthat pa khun kei loltan dingin mikhat ahin sol in ahi. Ama ahunglhun tengleh kot kamkhum'un hin lutsah hih un, ama nunga apupan ahin juipai ding ahi,” ati.
33 Elisha’n hitia thu asei jinglai chun thupole pa chu ahunglhung paitan, chule lengpa chun asei paijin, “Hiche lungkhamna ho jouse hi Pakaiya kon ahi, chuti ahileh ken Pakai chu iti kanga jing nahlai ding ham?” ati.