7
1 Elisha’n adonbut in, “Pakai thupeh ngaijin! Pakaijin hitin aseije: Tuphat don jing tengleh Samaria thil kijohna mun’ah antuitah atena dim khat chu dangka khatna kijoh ding, sakol chaang atena dim ni jong dangka khat dinga hung kijoh ding ahi,” ati.
2 Hichun lengpa kithopi jing asepai lamkaipa chun Pathen mipa jah a chun, “Pakai ama tah in van a konna van bangkot ahondoh a, hitobang thil chu abol ding hijongleh hithei mong ding hinam?” ati.
Ahinlah Elisha’n jong adonbut in, “Athilsoh ho chu namit tah a vang namu ding ahin, khatcha naneh khah louding ahi,” atipeh tan ahi.
Aphah Hon Gal Mite Ngahmun Agavil'u
3 Tun khopi kelkot lutna kom’ah miphah li anaum uvin ahi. Amaho chu khat le khat akidongto uvin, “Eiho hi thi ngah mai maija ihiti tou thim jing diu hitam?” akitiuvin ahi.
4 “Eiho hitia hi ium uleh anngol’a ithi tei diu ahi, khopi sunga lut jong leuhen kel-khoh jeh a ithi thou-thou diu ahi. Hijeh chun Aram sepai te kom’a kipelut jeng leuhen eihing hoi maitheiju ahi, ijemtia eitha jengu jongleh ithi thou-thou diu ahin, hichu phajolou ham?” akitiuve.
5 Hiti chun jingpi phalvah-in amaho Aram ngahmun ah alut tauvin ahi. Hitia chu angah munna agalut uleh koimacha ana umpon ahi!
6 Ajeh chu Pathen’in sakol lhaigin leh sakol kangtalai lhaigin chule sepai tamtah hung lhailut gin akithonsah in ahileh Israel lengpa hin, “Hit mite le Egypt mite akikou uva eihin nokhum'u ahitai,” atiuva kap le penga jammang gam'a ahi tauve.
7 Hijeh a chu kicha behseh uva aponbuh u, asakol teu, asangan teu chuleh athil dang hou jouse adalhah uva ahinkhou kihuhhingna dinga ana jamdoh gam’ah ahi tauve.
8 Miphah ho chu ponbuh sung khatna alut un chuleh khat ah alut un aneuvin adon’un, sana dangka leh ponho akichom’un akisel’un ahi.
9 Ajonan amaho akihouvun, “Ibol uhi adih tapoi, tuni hi nikhopha khat ahi bouve, hiche hi eiho mitoh ichankhom lou uhi adihpoi, eihon hitia hi jing geija ichepiuva ahileh hamsetna itotei diu ahi. Hijeh chun hung’un eiho cheu hitin lengte khopi sunga miho gahetsah uhite,” akitiuvin ahi.
10 Hiti chun amaho acheuvin khopi sunga kelkot ngah ho chu thilsoh ho aga hetsah tauvin ahi. “Keiho Aram mite ngahmun na kalut un ahile koimacha anaum tapon ahi! Sakol ho leh Sangan ho ana kihen nalaijin, ponbuh ho jong abang bangin ana um’in, mihem koimacha anaum tapon ahi,” atiuve.
11 Hichun kelkot ngahho chun khopi sunga mipi ho lah a chun hasap in asamphong tauvin ahi.
Israel ten Ngahmun Achom'u
12 Lengpa chu jan khangkim in alupna a kon'in ahung thoudoh in, anoija lamkai pipuiho kom’a chun hitin aseitan ahi, “Keiman thilsoh ho hi kahei, Aram mite hin eiho anngol'a ium uhi ahet u ahin, hijeh a chu angahmun u adalhah uva gamlah a gakisel’ah ahiuve. Amaho hin khopi idalhah uva ipotdoh tengu leh eiho hi ahinga matna khopi chu lonkhum ding atiu ahi,” ati.
13 Anoija lamkai holah a khat chun ahin donbut in, “Ipi hileh eihon gakholtoh pou-pou uhite. Sakol athimoh nga ho khu mangchau hitin akholtoh ding sol uhite. Ijemtia achung uva thil khat ahungso tah jongleh, hilai mun ah umjong leu eiho chengto ithikhom thou-thou diu ahin, akhoh dehpoi,” ahin tin ahi.
14 Hiti chun sakol kangtalai ni chu agongun lengpan Aram sepai te chunga thilsoh chu gakhol toh dingin asol tauvin ahi.
15 Amaho Jordan vadung geijin acheuvin Aram sepai te ponho, manchahho ajamcheh nauva apai thanghou chu aga mu uvin ahung kile un, lengpa kom’a asei tauvin ahi.
16 Hijou chun Samaria khopi miho chu alhaidoh un, Aram te ngahmun chu agachom tauvin ahi. Hiti chun antui tah-tah atena dim nga chu dangka khat aman’in chuleh sakol chang atena dim som chu dangka khat aman’in, Pakaijin ana tep bang-bang chun akijoh tan ahi.
17 Lengpan a sepai lamkaipa chu kelkot a mipi ting ding chun ana pansah in ahileh mipi hon anolhu uvin, achonlih tauvin ahi.
Hiti chun Pathen mipan ain'a hung lengpa kom’a ana phondoh tobang bang chun ana sohdoh tan ahi.
18 Pathen mipan lengpa koma chun, “Jing nikho tuphat dontah leh antui tah atena dim nga chu dangka khatna kicho ding chuleh sakol chang atena dim som chu dangka khatna kicho ding,” anati ahi.
19 Hiche pettah a chu lengpa noija sepai lamkai pa chun, “Pakaijin vanna van bangkot jouse ahon lhah ding hijongleh hithei ponte anati!,” ahileh, Pathen mipa chun, “Nangin thilsoh chu na mittah a namu ding amavang naneh man tahlou ding ahi!” anati.
20 Chutobang chun anasoh tai, ajeh chu mipi hon ama chu kotphunga chun ana chonlih tauvin ahi!