8
Shunem Khoa Numeinu Hung Kile Kit
1 Elisha’n achapa thisa ahindohsah peh numeinu kom’a chun hitin ana seijin ahi, “Na insung mite kipuijin lang mun dang khatna chetan ajeh chu Pakaijin Israel chunga kum sagi kel alhahsah ding ahi,” ati.
2 Hijeh chun Pathen mipan asei bang-bangin numeinu chun aboltan ahi. Amanun a insung mite apuidoh in Philistine gam’ah kum sagi aga cheng tan ahi.
3 Kellhah akichai jouvin Philistine gam’a kon'in a inlam'ah ahung kile kit tan ahi. Ain leh agam nungmu kitna dingin lengpa kom’ah achen ahi.
4 Hitia chu amanu lengpa kom’a agalut chun, lengpa chu Pathen mipa sohpa Gehazi chutoh ana kihoulim pet ahin, lengpa chun Gehazi kom’a chun, “Elisha thilbol kidang ho phabep nei seipeh in,” anatin ahi.
5 Chule Gehazi chun, Elisha in chapang thisa khat ahindoh sah kit thu chu ana seipeh in ahi. Hiche pet tah chun, hiche chapangpa nu chu lengpa kom’a a-in le agam thua tiemna nei dingin ahunglut in ahi.
“Ven, lengpa ka pakai!” tin Gehazi in asam'in, “Numeinu chu hicheva aum'e, chule hiche hi achapa ahi—Elisha'n ahinsah kit chu!” ati.
6 Lengpan numeinu chu adongin, “Hichu dih hinam?” ati. Hichun amanun athusim chu aseipeh tai. Chuin lengpa noija natong pipuiho khat chu akouvin numeinu thil le lo ho chu ale chan kitna dinga agontoh peh dingin anganse tan ahi.
Hazael In Ben-Hadad Atha
7 Elisha chu Ben-Hadad damlouva alupna Aram khopi Damascus a chun achen ahi. Mikhat in lengpa kom’a chun Pathen mipa ahunge tia aseipeh phat chun,
8 Lengpan Hazael kom’a chun, “Kipa thilpeh khat chu choijinlang Pathen mipa chu gapenlang, chule hiche ka natna a konna hi ka damdoh ding hinam? Pakai chu eidoh peh tan,” tin asol'in ahi.
9 Hiti chun Hazael chun sangonsang somli chu Damascus a thilsoh phapen ho chutoh, Elisha kom’a achen, hitin aseitan ahi, “Nasohpa Ben-Hadad Aram lengpan nangkom’a eihinsol ahi chule hiche kanatna a konna hi kadamdoh ding hinam? tin eiga dohpeh in atia eihinsol ahi,” ati.
10 Elisha'n adonbut in, “Chenlang hiti hin gaseipeh tan, nangma na damdoh tei ding ahi, tihi Pakaijin atahbeh in eimusah in ahi, amavang thitei ding ahi!” ati.
11 Hichun Elisha’n Hazael chun nommo asah tokah sen mitlha louhellin avechang mellin, chujouvin Pathen mipa chu ahung kaplha jeng tan ahi.
12 “Ipithu hitam, kapu?” tin, Hazael’in adongin ahi.
Elisha'n adonbut in, “Nangman Israel te chunga tijat um tahtah thil ho hi nahin bol ding kahen ahi. Nangin kul kiget khum akhopi hou nahin hallhah ding, agollhang hou chemjam'a nahin ban satlih gam ding, achapang teu toltoh nahin chotnat ding, anumei hou agailai nahin khojal ding hi kahe in ahi!” ati.
13 Hazael'in adonbut in, “Kei tobang imacha hilou khat mai maijin chutobang thil nasa chu katoh thei ding ham?” ati. Ahin Elisha’n adonbut in, “Pakaijin eimusah in nangma hi Aram leng nahung hi ding ahi,” ati.
14 Hazael in Elisha adalhan lengpa kom'ah akile kittan ahi, hichun lengpa jong ama kom'a chun, “Elisha ipi nahin seipeh em?” tin ana dongin ahi.
Hazael in adonbut in, “Nangma hi na damdoh tei ding ahi tin aman eiseipeh e.” ati.
15 Ahinlah ajing nikhon Hazael in ponlum twiya asukot in amai akhun athi tokah in amai ah akhuden pehtan ahi. Hijou chun Hazael chu Aram te leng ahung hitan ahi.
Jehoram In Judah Lengvai Apoh
16 Israel lengpa Ahab chapa Joram vaihom kum nga channa in Judah te leng Jehoshaphat chapa Jehoram min Judah te chunga vai ana homin ahi.
17 Jehoram hi leng ahung hichun ama kum somthum le ni ana lhingtan ama hin Jerusalem mah kum get lengvai anapon ahi.
18 Jehoram hin Israel lengte chonchan ajuijin Ahab lengpa phatmo tobangin aphamon ahi. Ajeh chu aman Ahab chanu ho lah a khat ana kichenpin ahi. Hiti chun Jehoram hin Pakai mitmu’n thilse jeng ana bollin ahi.
19 Ahinlah Pakaijin Judah mite ana sumang nompon ahi, ajeh chu aman David toh kitepna ana neijin achilhah ten vai ahopjom ding chule a-itih a thaomei banga vahjing dinga ana teppeh ahi.
20 Jehoram vaihom sungin, Edom ten Judah dounan gal ahin bollun, leng atum’in ahin kitundoh tauvin ahi.
21 Hichun Jehoram in asakol kangtalai chengse chutoh akonun Zair khopi aga nokhum tauvin ahi. Ahin Edom miten asakol kangtalai chule gal lamkaiho chu ahin umkhum tauvin ahileh ama jong jan noiya chun apotdoh in amaho chu jan muthim noija chun adelkhum'in ahi. Ahinlah Jehoram chu asepai ten ajam sannun a inlam uvah ana jamsan tauvin ahi.
22 Hiti hin Edom miten tuni chan geiyin Judah a kon'in chamlhatna ana mutauvin ahi. Libnah khopi injong hiche phat sunga chun kiphinna ahin neijun ahi.
23 Jehoram vaihom sunga thilsoh ho leh anatoh dohho jouse Judah Lengte Thusim bua akijihlut sohkeijin ahi.
24 Jehoram athi phat chun, David khopia apu apate toh akivui khom’in ahi.
Ahaziah In Judah Lengvai Apoh
25 Ahab chapa Joram leng vaipoh kumsom le ni channa ahin, Jehoram chapa Ahaziah hin Judah chungah lengvai anapo in ahi.
26 Ahaziah hi leng ahung chan chun ama kum somni le ni alhingin chuleh ama hin, Jerusalem ah kum khat vai ana hom’in ahi. Anu chu Israel leng Omri tunu Athaliah ahi.
27 Ahaziah chun Ahab lengpa insung mite chondan dihlou chu ana juijin ahi. Aman Pakai mitmu’n thil phalou ngen ana bollin ahi. Ajeh chu aman Ahab insung ana kichenpi in ahi.
28 Ahaziah hin Israel lengpa Ahab chapa Joram chu Ramoth-gilead munnah Aram lengpa Hazael toh kisat dingin ana pan khompi in ahi. Aram ten Joram lengpa chu gal kisatna munnah ana kisuhkhah jeh chun,
29 Jezreel langah akisuh khahna a adamna dingin ana kinunglen, Ramoth kho ah ana lamto un ahi. Hitia chu Joram ana kisuhkhah jeh in, Judah lengpa Ahaziah chu ama vedingin Jezreel langa ana chen ahi.