13
Nehemiah In Thil Dang-Dang Asemphat
1 Hiche nikho ma-ma hin Mose Lekhabu chu mipi ho lah a asimdoh un ahileh Ammon miho leh Moab miho chu Pathen houkhomna a lut theilou diu ahi ti amudoh un ahi.
2 Ajeh chu ama hon gamthip noiya chun Israel te an le twi anape nom pouvin ahi. Chusangin ama hon Balaam chu apalah a sapset sah ding ana gouvin, ahin Pathen'in hiche sapsetna chu phatthei boha in ana lehei peh in ahi.
3 Hiche danthu kijihna laitah chu akiphah poh tengleh gamchom miho chu apet-pet a houkhomna a kon chun anodoh jiuvin ahi.
4 Hiche masang hin I-Pathen’u Hou-In’a thilkeo koina indan ho vesui dinga kinganse Eliashib hi Tobiah inko ana hikhan,
5 ama hin thil koina indan lentah khat chu Tobiah khut ah ana pedoh khan ahi. Hiche indan chu tumasang’a chang hopsom, gimnamtui, Hou-In thil ho leh, lengpitwi thah, olive thao chuleh thempu ho ding maicham koina a kinei anahi (hiche ho hi Levi te le, lasa miho, chuleh kelkot ngah hoa dinga ana kigong chu ahin), achukit leh thempuho thilto ho koina ding ahi.
6 Hiche pet hin keima Jerusalem a kana um'in ahi, ajeh chu Babylon lengpa Artaxerxes vaihom kum somthum le kum ni channa a chu akom'a kana kile kitna dingin phalna kahin kilah in ahi.
7 Jerusalem kahung nung lhun jouvin Eliashib in Pathen Hou-In dan sung khat ana pehdoh jenga hitobanga thil dihlou anabol khah chu kahedoh tan ahi.
8 Hichu keiman nommo kasa behseh jeng tan Tobiah thilkeo ho jouse chu indan sunga kon chun ka lemang peh tan ahi.
9 Hijou chun indan sung ho chu ka suhtheng sah in, Pathen Hou-In thilkeo ho leh, chang hopsom ho chuleh gimnamtui ho chu kale lhohlut kittai.
10 Chuleh keiman Levi te chan ding anneh kigongsa ho chu ana peh louvu kamudoh tan, hijeh a chu Pathen houkhomna a ana lamkai ding ho chu ama loulang cheh a natong dingin ana kinungle tauvin ahi.
11 Keiman gangtah in lamkai ho chu kakimaito pin kasei tan ahi, “Ipi dinga Pathen Hou-In hi nahsah moa kikoija hitam?” kati. Hiche jou chun Levi te chu kavel koudoh in atoh diu kin cheh uchu katohsah kit tan ahi.
12 Hiti chun Judah mipite ho chun achang hopsom hou, lengpitwi thahho chule olive thao ho chu Hou-In thil koina hoa ahin pelut kit tauvin ahi.
13 Keiman thil koina ina vaihom ho ka lhengdoh un: Shelemiah thempupa, Zadok danthu thempa, chule Pedaiah kiti Levi mikhat chu atohnau mun cheh a kakoi kit in ahi. Chuleh Mattaniah tupa Zaccur chapa Hanan chu akithopi diuvin kakiojin ahi. Amaho hi seiphat chang cheh ahiuvin hiti chun ama hon a Levi chan khompi hou chu kitah-tah in achan diu achansah soh un ahi.
14 Vo ka Pathen katoh phat nau ho hi geldoh inlang ka Pathen Hou-In ding leh akin kitohna hoa kitah-tah a katoh hi neisuhmil peh hihbeh in.
15 Hiche nikho laihin, Judah mihon cholngah nikhoa lengpiga achil’u kamun ahi. Ama hon chang le mim ahin pouvin sangan chunga akhangdoh un, alengpitwi ule lengpiga theichang ho leh thilsoh jouse Jerusalem’ah ahin pouvin cholngah nia joh dingin ahin pouvin ahi. Hijeh chun hiche khoa atohga soh u ajoh jeh un kaphoh in ahi.
16 Jerusalem a cheng hon Tyre gam a kon'in nga ahin, kiveina thil jat chom-chom ho ahin polut un ahi. Amaho hin Jerusalem a Judah mite lah a cholngah nikhon ajoh un ahi!
17 Hijeh chun keiman Judah lamkaite chu kakimaito pin hitin kasei tan ahi, “Ipi dinga nang hon hitobang tah a hi thilse nabol uva cholngah nikho hi na suhboh uhitam?” tin kadong uve.
18 “Ipu ipa teuvin hitobanga hi na anatoh jiu jeh a, Pathen'in eiho chung le ikhopi uva hi hahsatna ana chuhsah ji hilou ham? Tuhin nang hon hitobang tah hin cholngah nikho nasuboh un Israel chunga Pathen lunghanna khoh cheh nahin polut tauve!” kati.
19 Hichun keiman Cholngahni Misemni nilhah kho hungjin phat leh Jerusalem kelkot chu kha jeng ding cholngah ni kichai tokah a hon jilou dingin thu kapen ahi. Cholngah nia kiveina thil ho hung kipohlut louna dingin keiman lhacha ho phabep chu kelkot kangasah in ahi.
20 Kivei miho le thil jat chom-chom joh ho chu Jerusalem khopam’ah khatvei nivei ageh khovah un ahi.
21 Amaho chu kahousen, “Nangho hiche kulpi bang vella hi ibola geh khovah nahiuvem? Hitia hi naum kit ule kamat diu ahi!” kati. Hiti chun amaho Cholngahni ahung kit tapouve.
22 Hijou chun keiman Levi te chu amaho leh amaho kisutheng ding leh cholngahni athenga umsah jing nadinga kelkot ngah dingin thu kapen ahi.
O ka Pathen hiche katoh phatna jong hi geldoh in! Na mi ngailutna longlou kidangtah jallin kachunga na hepina koiyin.
23 Hiche phatlai tah chun keiman Judah mi phabep in Ashdod, Ammon leh Moab akon numei ho akichenpi uve ti kahin hedoh tan ahi.
24 Hiche ban a chun, achateu akeh khat in Ashdod pao le pao dang athouvin, Judah pao atho thei pouvin ahi.
25 Hijeh chun amaho chu kakimaito pin kasamsen ahi. Mi phabep chu kavon chuleh asam u kabolhah peh in ahi. Keiman amaho chu achateu hiche gam'a cheng hou neilou ho toh achateu akichensah louna diuvin Pathen min panin kakihahsel sah in ahi.
26 “Hiche jeh tah hi hilou ham Leng Solomon in Israel achonset sah chu?” tin kangeh in ahi. “Namdang leng ama toh tekahpi thei aumpoi, ama chu Pathen'in angailun Israel te jouse leng ahisah in ahi. Ahiyeng vang'in gamdang mi ajiten achonset sah in ahi.
27 Iti dan a nang hon gamchom a numei ho na kichenpi uva Pathen mitmua kitahlou tah a naum uva hitobang tah a chonsetna hi na tohdoh uhitam?” kati.
28 Thempulen Eliashab chapa Joiada chate lah a khat in Horon mi Sanballat chanu ana kichenpi jeh in kakom'a kon'in ka kaidoh tan ahi.
29 O ka Pathen amaho hi geldoh in, ajeh chu ama hon thempu ho leh Levi te gimneitah a akitep nau asuboh tauve.
30 Hiti chun keiman gamchom mi toh kitimatna jouse chu kasuthengin thempu ho leh Levi te chu akin cheh u pochil tah a atohna diuvin natoh ka gontoh peh cheh in ahi.
31 Chuleh keiman maicham a ding thing aninglhinga ahin pehna diu leh lhosoh masa apha cha-cha ahin pohlutna diuvin ka gongtoh in ahi.
O ka Pathen, hiche hi keima nei khohsahna in hin geldoh teiyin.