3
Jerusalem Kulpi Pal Akaiphat U
1 Hiche jou chun thempulen Eliashib leh thempu dang ho chun Kelngoi Kelkot chu asempha uvin ahi. Hiti chun asemjou phat un athenso uvin, chuleh akot jouse jong asutoh un, Jakhat Insang kiti chan geijin asa phauvin, achaisoh phat un athenso uvin chuin Hananel Insung geipeh in asapha uvin ahi.
2 Jericho khopi a konna hung mipi ten amaho bang chun na atongun chuban’in Imri chapa Zakkur in atongin ahi.
3 Hassenaah chapa ten Ngapi Kelkot geijin asauvin ahi. Chule ama hon ajol jong ajam’un, akot jouse jong asuto uvin, chule akamna ding le thih jol ho jong asutoh un ahi.
4 Hiche ban a pal chu Hakkoz tupa Uriah chapa Meremoth in asemphan ahi. Chule ama ban’a hin Meshezabel tupa Berekiah chapa Meshullam in asempha in ahi. Chujongleh ama banin Baana chapa Zadok in asemin ahi.
5 Hiche ban in Tekoa a konna hung mipite hin alamkai houvin hiche natohna a vaihom hotoh atohkhom nomlou vangun ahung sempha uvin ahi.
6 Chule Khopi Kelkot Lui chu Paseah chapa Joiada leh Besodeiah chapa Meshullam in asempha lhon'in ahi. Chule ama hon ajol ajam’un, akot ho atungdoh un, chule akamna ho le thih jol ho jouse jong asutoh un ahi.
7 Amaho banin Gibeon a kon'in Melatiah, Meronoth a kon'in Jadon, chule Gibeon mipite, Mizpah a kon a hung mipi ten Eupharates lhum lam gamvaipo pa chenna mun gei asempha uvin ahi.
8 Chule hiche ban a hin sana khenga pang Harhaiah chapa Uzziel in ana semphan ahi. Chule ama ban a hin thaonamtui sema pang Hananiah in ana semphan, chule amaho hin Jerusalem kulpi pal lenpa geijin ana sempha uvin ahi.
9 Chule amaho bana pal sempha a panga chu Jerusalem gamkai akehkhat chunga lamkaiya pang Hur chapa Rephaiah anahi.
10 Amaho ban a hin Harumaph chapa Jedaiah kitipa hin in kotmai lam chu ana semphan, chuleh ama ban a chun Hashabneiah chapa Hattush chun asemphan ahi.
11 Hiche ban a hin Harim chapa Malkijah leh Pahath-moab chapa Hasshub in munchom banglai khat toh meilhum chung insang chung geijin asempha lhon'in ahi.
12 Hallohesh chapa Shallum leh achanu ten aban chu asem phauvin ahi. Chule ama hi Jerusalem gamkai akeh khat chunga lamkai ahiye.
13 Chule Phaicham Kelkot chu Hannun lamkaina in Zanoah mipi ten ana semphauvin ahi. Chule ama hon akot ho atungdoh un, chujongleh akamna ho le thih jol ho geijin asutoh un ahi. Chuleh pal chu feet 1,500 gei Ehkul Kelkot chan geijin ana semphauvin ahi.
14 Chule Ehkul Kelkot chu Beth-hakkerem gamkaiya lamkaiya pang Recab chapa Malkijah in asem phan ahi. Chule aman akot ho atungdoh in akamna ho le thih ho geijin asutoh in ahi.
15 Mizpah gamkaiya lamkai Col-hozeh chapa Shallum chun Twisam putna Kelkot chu asemphan ahi. Chule aman achung akhu'n, akot ho jong atungdoh in chuleh akamna ho le thih ho geijin asutoh in ahi. Hiche ban a chun lengpa hon kom Siloam twikul pal chu asemphan chule apal chu David khopia konna kidosuh kalbi gei chun asemphan ahi.
16 Hiche ban a hin Beth-zur gamkai akeh khat chunga lamkaiya pang Azbuk chapa Nehemiah in asemphan ahi. Chule aman David insung mite lhan toh kigalsai twikul chuleh gal-hat ho inmun chan geijin asemphan ahi.
17 Chule hiche ban a hin Bani chapa Rehum lamkai nan Levi te phabep khat in ana sempha uvin ahi. Chule hiche ban a hin Keilah gamkai akeh khat chunga lamkaipa Hashabiah lamkai nan ana sempha uvin ahi.
18 Hiche ban a hin Keilah gamkai akeh khat chunga lamkaiya pang Henadad chapa Binnui lamkai nan agamsung miten ana sempha uvin ahi.
19 Amaho ban a Mizpah lamkai, Jeshua chapa Ezer hin pal ningkoi kom, manchah ho kikoina lang se-se chu asem phan ahi.
20 Ama ban a Zabbai chapa Baruch in thempulen Eliashib in kot ninga pat in aninglang khat geijin asemphan ahi.
21 Chule ama nunga hin Hakkoz chapa Uriah chapa Meremoth chun Eliashib in kot a kon'in aninglang khat geijin asem phan ahi.
22 Ama ban a hin thempu ho leh phaicham a cheng hon asempha uvin ahi.
23 Amaho ban a hin Benjamin leh Hasshub amani toh kigalsaija um chu asempha lhon'in ahi. Chule amani ban a chun Ananiah chapa Maaseiah chapa Azariah chun ama inkom chu asemphan ahi.
24 Ama ban a hin Henadad chapa Binnui chun Azariah inkom'a pat aningkoi gei palgol chom khat chu asemphan ahi.
25 Uzai chapa Palal chun agal langkhat in ningkoi lai chule insang laitah toh kigalsai lai, chule lengpa indan chungnung, in vengtup ho panna indan laitah chu asemphan ahi. Chule ama bantah a hin Parosh chapa Pedaiah leh
26 Ophel vum'a cheng Hou-In lhacha a pangho toh Twi Kelkot gal nisolam insang toh kimai ngat lai chu asempha uvin ahi.
27 Hiche jou chun Tekoah mipi ho ahung uvin insang thupitah a kitungdoh gal Ophel pal geijin mun chom khat ahung sempha uvin ahi.
28 Chule Sakol Kelkot chung chu thempu hon asempha uvin ahi. Chule amaho khat cheh chun ama in toh kigalsai cheh chu asempha uvin ahi.
29 Aban chu Immer chapa Zadok chun ama in toh kigalsai akotmai laitah mun phabep chu asemphan, chule ama ban chun Solam Kelkot ngahpa Shecaniah chapa Shemaiah chun asemphan ahi.
30 Hiche ban chu Shelemiah chapa Hananiah leh Zalaph chapa agup channa Hanun chun munchom lai khat asempha lhon'in, alangkhat a Berekiah chapa Meshullam in ama chenna inmun gal a pal chu asemphan ahi.
31 Sana kheng ho lah a mikhat, Malkijah kitipa chun Hou-In lhacha ho leh kiveiho umna in chan gei kelkot ngah ho gallang chan gei a pal chu agen phan ahi. Hiche ban jong chun anunglam indan chung geijin asembe in ahi.
32 Sana khenga pang adang ho leh kivei miho chun Kelngoi Kelkot ningkoiya kon chun pal chu ahin sempha uvin ahi.