4
Galmi Hon Kulpi Kisapha Adoudal’u
1 Keihon pal kasah phat nauva ka natoh uhi Sanballat in ahin hetdoh phat in alunghang lheh jengin ahi. Ahin ama alunghan behseh jeh in Judah te chu isahlou tah in ahousen ahi.
2 Hiti hin aloi agol ho masang le Samaria sepai lamkai ho masanga hiti hin aseiye, “Hiche Israel mimo te le tahlel te hi ipi bol a kingaito hiuva ham? Gan kilhaina maicham gahbol mai-maiya konna hi nikhat sunga hiche pal hi agah tundoh jou jeng diuva angaitou ham? Chule hiche meijin akahsa song ho leh bohse nongnai ho hi mangcha a tohdoh ding agot u hintem?” ati.
3 Chule akom uva um Ammon mi Tobiah chun hitin ana seiye, “Itobangin kasaphai tijongleu, achunga khun sial khat che jongleh lhu tante!” ati.
4 Hichun keima hiti hin kataove, “Vo ka Pathen'u, katao nau hi neihin ngaipeh un, keiho hi noise tah in eikihouse tauve. Hijeh chun eihouset nau hi amaho chunga chuh sah inlang chule amaho joh migam a soh changin umsah jotan!
5 Asuhkhel nau hi nahsah mon koi hihbeh in, chule achonset nau hi geldao hihbeh in, ajeh chu amaho hin natongho masang laitah a hin nangma naphin lunghang tauvin ahi,” kati.
6 Hiti hin keihon khopi pumpi kimvel chu kagen jom toupeh un hiti chun akim kalhut tauvin ahi, ajeh chu mipi ten thanom tah in na atongun ahi.
7 Ahinla hitobang tah a hi natoh achal a Jerusalem pal achimsa lai jouse akisemphat hi Sanballat le Tobiah chuleh Arab mite, Ammon mite le Ashdod miten ajahdoh phat un alunghang lheh jeng tauvin ahi.
8 Hijeh chun amaho hin Jerusalem hin delkhum'a kisatpia suhboi dingin agong tauvin ahi.
9 Ahinlah keiho Pathen hengah kataovun khopi chu kangah un asun ajanin keiho le keiho kaki veng tauvin ahi.
10 Chuin Judah mipi ho akiphin pan tauvin, “Natong ho achol thei lheh tauvin, chule songboung tampi lhoh ding aum nalaijin ahi. Eiho seh in baang hi isah phat joulou diu ahi,” atiuve.
11 Alangkhatnah, kamelma teuvin jong, “Ipi thilsoh a ham ti ahetdoh kah uvin, eihon delkhum’u hitin ithagam uva anatoh uhi isuhtang diu ahi,” tin aseiyun ahi.
12 Hitia melma te toh cheng khom Judah ho ahungun avel vel in ahung seiyun, “Muntin a konna hung uva eihung delkhum diu ahi,” atiuve.
13 Hijeh chun keiman pal mun nemlang akilang dom mun hoa chun thalchoi angah ding kakoijin ahi. Chule keiman ama-ama insung dungjuijin chem, tengcha leh moltum kichoiya angah ding jong kaban goltoh in ahi.
14 Hiche jou hin keiman thil umdan chu kavetoh in, mithupi ho leh vaihom ho chule mipi dang ho chu kakou khomin akom uvah hitin kaseiye, “Melmate jeh khun kicha hihbeh un! Loupitah le thaneitah Pakai chu geldoh un chuleh nasopi te, najiteu, nachateu leh na insungu huhnan galsat din pangun,” katin ahi.
15 Ka melma teu chun athilse gon’u ka hetdoh uchu ajadoh tauvin chuleh Pathen'in alunglhah sah phat un keiho palmun'a ka natoh nau mun cheh a kakile kit tauve.
16 Ahinlah hichea kon chun kamite akeh khat in bou na atongun, adangsen tengcha akidop un, lum akichoiyun, chule thalpi akipat un, thih sangkhol aki-ah sohkei tauve. Chuleh lamkai ho chu Judah mipi
17 kulbang sapha ho nunga chun aum jingun ahi. Natong ho chun akhut langkhat in na atong jingun, chuleh akhut langkhat in manchah akichoiyun ahi.
18 Hiti chun natong ho jouse chun apangpeh uva chem akiko sohkeiyun ahi. Chule sumkon mut a pangpa chu mut dinga kigosa dem’in kei kom'a aum jinge.
19 Hichun keiman mithupi ho leh vaihom ho kom leh mipi ho kom'a chun, kahet themsah in, “Inatoh uhi akithe jal’in hijeh a chu eiho jong pal gol dungjuiya ikithe thang jengu ahi.
20 Hiche sumkon gin hi najah tengu leh aginna langa chun hindel cheh jengun chutengleh I-Pathen uvin gal eisat peh dingu ahi,” kati.
21 Keihon jingkah apat nilhah geijin, chule nisoa pat nilhun geijin na katongun ahi. Chule mi akeh khat chu manchah kichoi pumin eingah jingun ahi.
22 Keiman pal kom'a cheng ho kom'a chun Jerusalem khopi sunga hung um dauvin tin ka seipeh in ahi. Hitia chu amaho le alhacha hon jan leh eingah uva pang diu sun tengleh na atoh diu ahi, kati.
23 Hiche lai phat ahin, Keima kahin, ka kinaipiho, kasohte, kei toh umkhom mi veng’a pangho—koiman kavon’u kasut tapouve. Phat jousen gal manchah kaki choiyun, twi thal’a chena kisanin kachoiyun ahi.